ភ្នំពេញ៖ កីឡាករមានភាពអំណោយខ្លាំងផ្នែកកាយសម្បទា នី វីរ៉ាផា ដែលត្រូវបានអ្នកគាំទ្រដាក់ឈ្មោះក្រៅថា «មេឆាន» នោះ បានអះអាងថា ខ្លួនលែងចង់ប្រកួតជាមួយកីឡាករខ្មែរគ្នាឯងទៀតហើយ បន្ទាប់ពីអ្នកប្រយុទ្ធមានមាឌធំ ទម្ងន់ ៦៥ គីឡូក្រាមរូបនេះ បានបន្តផ្តួលកីឡាករបរទេសឱ្យសន្លប់ជាលើកទី២ ស្របពេលដែល ធន់ វិស្ណុ បានទម្លាក់កីឡាករជាមិត្តភក្តិ ប៊ន ពន្លឹក ដើម្បីឡើងទៅប្រកួតដណ្តើមខ្សែក្រវាត់វគ្គផ្តាច់ព្រ័ត្រ។
បើទោះបីជា ទើបប្រកួតបាន ១០ ដង ឈ្នះ ៩ និងចាញ់ ១ ដង ប៉ុន្តែកីឡាករជើងថ្មី មេឆាន អាចដណ្តើមបានប្រជាប្រិយភាពលឿនគួរសម តាមរយៈឆន្ទៈ និងទឹកចិត្តប្រកួតដ៏អង់អាចរបស់ខ្លួន ដែលតែងតែចូលវាយសម្រុកទៅលើគូប្រកួត ជាមួយការប្រើកែង ជង្គង់ ទាត់ ជាពិសេសគឺកណ្តាប់ដៃតែម្តង។
សម្រាប់ការទទួលបានឱកាសប្រកួតមិត្តភាពអន្តរជាតិ ជាលើកដំបូង នៅលើសង្វៀនថោន កាលពីថ្ងៃទី១៤ ខែមីនា កន្លងមកនេះ កីឡាករ នី វីរ៉ាផា បានវ៉ៃសម្រុករហូតធ្វើឱ្យអ្នកប្រដាល់ Enrico De Witt អស់ខ្យល់ និងសុំចុះចាញ់ នៅចុងទឹកទី១ ហើយជ័យជម្នះនេះ ធ្វើឱ្យប្រជាប្រិយភាពរបស់ មេឆាន ឡើងមួយកម្រិតទៀត។
ដោយឡែកសម្រាប់ការទទួលបានឱកាសប្រកួតអន្តរជាតិជាលើកទី២ នៅក្នុងកម្មវិធី Krud Kun Khmer របស់សង្វៀនប៉ុស្តិ៍លេខ៥ កាលពីថ្ងៃទី២៤ ខែមីនានេះ មេឆាន បានវ៉ៃកីឡាករឡាវ Deksayam Simokunpet ឡើងចង់អស់ខ្យល់តាំងពីទឹកទី១ តាមរយៈការចូលបុកជង្គង់ វាយកែង ជាពិសេសកណ្តាប់ដៃវាយស្រោចដូចទឹកភ្លៀងរបស់គេ ប៉ុន្តែ Deksayam មិនព្រមសន្លប់ដោយងាយនោះទេ។
កីឡាករឡាវម្នាក់នេះ បានព្យាយាមវាយកែង និងម៉ាត់សង ដែលធ្វើឱ្យ មេឆាន ចង់អស់វិញ នៅចុងទឹកផងដែរ។ តែទោះបីជាយ៉ាងណា ឈានចូលទឹកទី២ មេឆាន បានប្តូរយុទ្ធសាស្រ្តប្រកួតពីវាយសម្រុក មកវាយមួយៗវិញ តែបែរជាបានផលល្អ ដោយរូបគេបានវាយកែងឆ្វេង បណ្តាលឱ្យកីឡាករ Deksayam បែកធំនៅលើក្បាលផ្នែកខាងឆ្វេង នាំឱ្យគ្រូពេទ្យសម្រេចបញ្ឈប់ការប្រកួតនៅដើមទឹកទី១ ដោយផ្តល់ជ័យជម្នះទៅឱ្យ មេឆាន យ៉ាងរំភើបបំផុត។
បន្ទាប់ពីបានឈ្នះកីឡាករឡាវ នៅទឹកទី១នេះ មេឆាន បាននិយាយថា៖ «ការវាយកែងនេះ គឺចូលពេញតែម្តង។ តាមពិតខ្ញុំចង់ផ្តាច់គាត់តាំងពីទឹកទី១ ប៉ុន្តែគាត់ល្អ និងធន់ដែរ វាយគាត់មិនទៅ ដល់អ៊ីចឹងនៅចុងទឹក លោកគ្រូបានប្តូរឱ្យខ្ញុំវ៉ៃមួយៗវិញ ព្រោះបើនៅតែបន្តវាយសម្រុកខ្លាំងទៀត យើងអាចនឹងដាច់កម្លាំងស៊ុហ្វខ្លួនឯងវិញ ហេតុនេះខ្ញុំក៏ធ្វើតាមគាត់ ហើយក៏បានផលល្អ»។
កីឡាករមានវ័យ ២៥ ឆ្នាំ កម្ពស់ ១,៧៥ ម៉ែត្ររូបនេះ បានបន្ថែមថា៖ «ខ្ញុំបានវាយចូលផ្ទៃមុខគាត់ច្រើនណាស់ ជាពិសេសកណ្តាប់ដៃ ប៉ុន្តែគាត់ពិតជាស៊ូខ្លាំង ហើយបើសិនជាខ្ញុំវាយគាត់មិនបែកធំរហូតដល់គ្រូពេទ្យបញ្ឈប់ទេ គឺខ្ញុំអាចយ៉ាប់វិញក៏ថាបាន ព្រោះចង់អស់ហើយដែរ។ តែទោះបីជាយ៉ាងណា បើបុកគេមិនទៅ ខ្ញុំនឹងវាយមួយៗវិញ គឺមិនវាយបុកគេរហូតធ្លាក់ស៊ុហ្វខ្លួនឯងដូចមុនទៀតនោះទេ»។
តាមរយៈការផ្តួលកីឡាករឡាវ Deksayam Simokunpet ឱ្យសន្លប់នៅទឹកទី២នេះដែរ នី វីរ៉ាផា ហាក់លែងមានចិត្តចង់ប្រកួតជាមួយកីឡាករក្នុងស្រុក ដោយបញ្ជាក់ថា៖ «ចិត្តរបស់ខ្ញុំពេលនេះ ចង់បន្តប្រកួតអន្តរជាតិទៀត គឺមិនចង់ប្រកួតជាមួយកីឡាករខ្មែរទេ ព្រោះវ៉ៃខ្មែរគ្នាឯងយើងអាណិត ហើយខ្ញុំពិតជាមានអារម្មណ៍រំភើបខ្លាំង ដែលទទួលបានឱកាសប្រកួតអន្តរជាតិ នៅក្នុងកម្មវិធី Krud Kun Khmer ជាលើកដំបូងនេះ»។
សម្រាប់ការប្រកួតនៅយប់ថ្ងៃអាទិត្យនោះដែរ កីឡាករ ធន់ វិស្ណុ និង ប៊ន ពន្លឹក ដែលជាមិត្តភក្តិនឹងគ្នានោះ បានសម្រេចផ្តាច់ចោលមនោសញ្ចេតនាផ្ទាល់ខ្លួន ក្នុងពេលអ្នកទាំង២ បានឡើងមកជួបគ្នា ក្នុងការប្រកួតវគ្គពាក់កណ្តាលផ្តាច់ព្រ័ត្រដណ្តើមខ្សែក្រវាត់គ្រុឌគុនខ្មែរ ទម្ងន់៥១គីឡូក្រាម ហើយតាមរយៈការខំប្រឹងប្រកួតគ្នាឡើងខ្សោះអស់ពីខ្លួននោះ ធន់ វិស្ណុ បានឈ្នះដោយពិន្ទុ ដើម្បីឡើងទៅប្រកួតផ្តាច់ព្រ័ត្រ ដោយរូបគេ អាចនឹងជួប ឡៅ សៃណេត ឬ ឡុង ពិសិដ្ឋ ព្រោះអ្នកទាំង២នេះ នឹងប្រកួតវគ្គពាក់កណ្តាលផ្តាច់ព្រ័ត្រ នៅថ្ងៃទី៣១ ខែមីនា ខាងមុខនេះ៕