កំពត: ស្ថិតនៅចម្ងាយតែ ១២ គីឡូម៉ែត្រពីដែនកោះត្រល់អតីតទឹកដីសុវណ្ណភូមិ ដែលអាចគន់ឃើញភ្លើងយានយន្ដពេលរាត្រីយ៉ាងច្បាស់ ក្ដាតឡាតង់ (Kdark La Tente) ចំទើតអើតលយមាត់សមុទ្រស័ក្ដិសមជា ទីកន្លែងបោះជំរំ ចាប់បង្គា ស្រូបខ្យល់អាកាសបរិសុទ្ធ ព្រមទាំងគយគន់បូកគោ និងកោះត្រល់ដ៏ធំល្វឹងល្វើយ។ ក្ដាត ជាឈ្មោះភូមិដ៏ស្រស់ស្អាតមួយស្ថិតនៅតាមបណ្ដោយផ្លូវជាតិលេខ ៣ ក្នុងឃុំព្រែកត្នោតស្រុកទឹកឈូ ខេត្ដកំពតចម្ងាយប្រមាណ ២១ គីឡូម៉ែត្រពីទីរួមខេត្ដ។ ភូមិនេះស្ថិតនៅជាប់ជើងភ្នំបូកគោ ក្បែរមាត់សមុទ្រ ជាភូមិនេសាទ មានព្រៃកោងកាង ទឹកធ្លាក់ ព្រែកដ៏ស្រស់ស្អាត ជាពិសេសក្បែរកោះត្រល់យ៉ាងកៀកបង្កើយ។