កោះកុង: រាប់ចាប់ពីតំបន់រមណីយដ្ឋានធម្មជាតិ ជីផាត់ ត្រពាំងរូង ទឹកធ្លាក់តាតៃ ព្រៃកោងកាង ពាមក្រសោប ឆ្នេរសមុទ្រ កោះតូចធំ ដល់ តំបន់ព្រៃឈើអារ៉ែង គឺសុទ្ធសឹងជាតំបន់ទេសចរណ៍មានឈ្មោះល្បីរបស់ខេត្ត កោះកុង ដែលភ្ញៀវទេសចរជាតិ និងអន្តរជាតិ ធ្លាប់បានឮ បានស្គាល់ និងខ្លះក៏ធ្លាប់បានទៅឃើញផ្ទាល់។
ប៉ុន្តែសម្រាប់ខេត្តនៅភាគនិរតីរបស់កម្ពុជាមួយនេះ ក៏នៅមានទឹកធ្លាក់មួយទៀត កំពុងចង់បង្អូតសម្រស់ខ្លួន អន្ទងចិត្តភ្ញៀវទេសចរជិតឆ្ងាយ មកកម្សាន្តលេងផងដែរ។ នោះគឺ តំបន់សហគមន៍ទេសចរណ៍ធម្មជាតិទឹកជ្រោះ សិលាមានជ័យ ឬអ្នកស្រុកនិយមហៅថា ទឹកធ្លាក់ តាយ៉ុង។