.jpg)
ព្រះវិហារៈ ហាក់ដូចជាអស់កម្លាំងបន្តិច ដោយសារដំណើរកម្សាន្តរបស់លោកអ្នកជាដំណើរថ្មើរជើង ត្រូវដើរកាត់ចម្ការចេក និងចម្ការសណ្តែក តាមផ្លូវដើរព្រៃក៏ពិតមែនក្តី តែចំណាយពេលដើរប្រមាណ ១៥ នាទី ប៉ុណ្ណោះ នឹងបាត់អស់ក្តីនឿយហត់ និងក្តីកង្វល់ក្នុងចិត្តរលីង ពេលបានឃើញបណ្តុំទេសភាពបែបធម្មជាតិដ៏ស្រស់បំព្រង បៃតងខ្ចី នៅអែបអមតំបន់រមណីយដ្ឋានទឹកធ្លាក់បេងកោង មានទឹកត្រជាក់ស្រេង គួរជាទីមនោរម្យ គ្រាន់តែឃើញភ្លាមចង់ចុះទៅងូតលេងភ្លែតតែម្តង។
ទឹកធ្លាក់បេងកោង គឺជាផ្នែកមួយនៃតំបន់រមណីយដ្ឋានវប្បធម៌ និងធម្មជាតិភ្នំត្បែង នៅក្នុងភូមិបេងកោង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ មានចម្ងាយ ៦ គីឡូម៉ែត្រ ចេញពីទីរួមខេត្តព្រះវិហារលើផ្លូវជាតិលេខ ៦២ ដែលមានផ្លូវចូលតាមខ្លោងទ្វារវត្តលើភ្នំត្បែង ហៅវត្តដំបូកខ្មៅ។
ដោយសារតែមានអំណោយផលពីធម្មជាតិ ទេសភាពស្រស់ស្អាត អមដោយម្លប់ឈើត្រឈឹងត្រឈៃ ក្រោយពីបានដើរកាត់ចម្ការចេក ចម្ការសណ្តែក វាលស្បូវ វាលដើមចាក និងមានផ្ទាំងថ្មធំៗ ដែលអាចឲ្យភ្ញៀវអង្គុយញ៉ាំអាហារ ជាលក្ខណៈមិត្តភក្តិ ក្រុមគ្រួសារ និងគូស្នេហ៍បាន មានទឹកធ្លាក់ចំនួនពីរជាន់ ខណៈប្រភពទឹកហូរបានមកពីភ្នំត្បែង នារដូវវស្សា ដែលសម្បូរភ្លៀងធ្លាក់។ ជាន់លើមានវាលធំអាចចុះងូតទឹកលេងបានដោយងាយស្រួល ទាំងក្មេងទាំងចាស់ តែជាន់ក្រោមវិញ នៅមានលក្ខណៈលំបាកចុះលេងបន្តិចព្រោះផ្ទាំងថ្មជាប់ស្លែអាចនឹងរអិលគ្រោះថ្នាក់ ប្រសិនបើធ្វេសប្រហែសនោះ។
