ពោធិ៍សាត់: ដំណើរកម្សាន្ដតាមម៉ូតូទៅកាន់តំបន់ទឹកធ្លាក់អូរសោម (ជាឈ្មោះប្រជាពលរដ្ឋអូរសោមបានហៅតៗគ្នា) ដែលជ្រកក្នុងព្រៃភ្នំដ៏ដាច់សង្វែងពីភូមិឋានប្រជាពលរដ្ឋមានភាពទាក់ទាញដោយសារតែភាពស្រស់ត្រកាលនៃទឹកហូរធ្លាក់ដ៏ខ្ពស់លើផែនថ្មតោងដោយស្លែ បុប្ផាផ្កាព្រៃ និងរុក្ខជាតិតូចធំដ៏ត្រជាក់ស្រេង។
ដោយសារតែមិនមានស្ថិតិបញ្ជាក់ពីទឹកធ្លាក់ខ្ពស់ឬទាបជាងគេនិងជម្រៅប៉ុន្មានម៉ែត្រនោះ បន្ទាប់ពីទឹកធ្លាក់ឆាយប្រុយកម្ពស់ជាង ៥០ ម៉ែត្រទឹកធ្លាក់អូរសោម ក៏មានកម្ពស់ដល់ ៤០ ម៉ែត្រ ព្រមទាំងមានថ្លុកទឹកប្រមាណ ២៥ ម៉ែត្រ និងជម្រៅជិត ២ ម៉ែត្រ ដែលស្ថិតនៅក្នុងភូមិឆាយលូក ឃុំអូរសោម ស្រុកវាលវែង ខេត្ដពោធិ៍សាត់តែមួយ។