លោកនាយករដ្ឋមន្ត្រី ហ៊ុន សែន បានប្រកាសប្រាប់ជាសាធារណៈ ឲ្យបណ្ដាប្រធានគណបក្សនយោបាយដែលមានសញ្ជាតិច្រើនចូលរួមបោះឆ្នោតដោយសេរីក្នុងការបោះឆ្នោតឃុំសង្កាត់ ២០១៧ និងការបោះឆ្នោតជាតិក្នុងឆ្នាំ២០១៨ខាងមុខនេះ។ សារនេះបានថ្លែងទៅកាន់ក្រុមអ្នកគាំទ្ររបស់លោកប្រមាណ ១ម៉ឺននាក់កាលពីព្រឹកម្សិលមិញនេះ ក្នុងពិធីរំឭកខួបលើកទី៣៧នៃទិវាជ័យជំនេះ៧មករា។
គួរំឭកផងដែរថាលោកនាយករដ្ឋមន្ត្រី ហ៊ុន សែន តែងតែទទូចម្ដងហើយម្ដងទៀត ក្នុងការជំរុញឲ្យមានការចែងនៅក្នុងច្បាប់ដោយតម្រូវឲ្យមេដឹកនាំគណបក្សនយោបាយមានសញ្ជាតិតែមួយ ដោយក្នុងពេលថ្មីៗនេះលោកក៏បានបានថ្លែងនៅក្នុងពិធីចែកសញ្ញាប័ត្រដល់និស្សិតបញ្ចប់ការសិក្សានៅសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ចកាលពីថ្ងៃទី ២៩ ខែធ្នូ ចុងឆ្នាំកន្លងទៅផងដែរ ដែលធ្វើឲ្យមតិសាធារណជនគិតថាលោកមានបំណងផ្ដួលរំលំគណបក្សប្រឆាំង។