ភ្នំពេញៈ ដោយកើតនៅឆ្នាំ ១៩៧៥ ក្នុងខេត្តកំពង់ស្ពឺគាប់ជួននឹងពេលវេលាមួយដែលខ្មែរក្រហមជម្លៀសប្រជាពលរដ្ឋចេញពីទីក្រុងភ្នំពេញដើម្បីឲ្យទៅរស់នៅ និងធ្វើការបម្រើអង្គការដោយប្រើកម្លាំងមនុស្សនោះ ទារិកា កែវមុំ ដែលបច្ចុប្បន្នក្លាយជាអគ្គនាយិការោងចក្រផលិតនំស្រួយ លីលី និងជាប្រធានសមាគមសហគ្រិនស្រ្តីកម្ពុជា សុទ្ធតែបានឆ្លងកាត់នូវយុគសម័យមួយជាមួយនឹងឪពុកម្ដាយដែលពួកគាត់បានជួបការលំបាកមិនខុសពីពលរដ្ឋខ្មែរនៅទូទាំងប្រទេសឡើយ។ ប៉ុន្តែជាភ័ព្វសំណាងល្អដែលគ្រួសារគាត់អាចរក្សាជីវិតបានក្រោយពីឆ្លងកាត់របបវាលពិឃាតរយៈពេលជិត ៤ ឆ្នាំ។
លុះនៅដើមទសវត្សរ៍ទី ៨០ មួយឆ្នាំក្រោយរបបខ្មែរក្រហមដួលរលំ ឪពុកម្តាយបាននាំកុមារី កែវ មុំ មករស់នៅទីក្រុងភ្នំពេញវិញដោយពួកគាត់ចាប់ផ្ដើមប្រកបមុខរបរលក់ដូរតូចតាចតាមទម្លាប់ពីដូនតា។ ទម្លាប់នេះបានចម្លងជានិស្ស័យនៃការធ្វើអាជីវកម្មខ្នាតតូចជាលក្ខណៈគ្រួសារដល់កុមារីម្នាក់ក្នុងការចាប់ផ្ដើមរៀនធ្វើតាមតាំងពីនៅវ័យក្មេង។ ទាំងនេះគឺជាប្រវត្តិសង្ខេបខ្លះៗរបស់លោកស្រី កែវ មុំ។