ក្រោយពីចំណាត់ការរឹតបណ្តឹងចំពោះពលករបរទេសតាមរយៈការចាប់បញ្ជូនដោយទាន់ហន់ដោយរបបយោធាថៃបានលេចចេញជាពាក្យចរចាមអារាមយ៉ាងក្តៅគគុកអំពីការបាញ់សម្លាប់ទៅលើកម្មករខ្មែរយ៉ាងឃោរឃៅពីសំណាក់ទាហានថៃ។ ចំណាត់ការនេះបានបំភ័យ ឲ្យពលករចំណាកស្រុកកម្ពុជាជាបន្តបន្ទាប់រាប់ម៉ឺននាក់ត្រលប់មកប្រទេសវិញ។ រដ្ឋាភិបាលបានចំណាយយ៉ាងហោចណាស់ ៥ លានដុល្លារក្នុងការដោះស្រាយវិបត្តិបន្ទាន់នេះ។ ប៉ុន្តែអង្គការទេសន្តប្រវេសក៍អន្តរជាតិនៅតែសម្តែងក្តីបារម្ភចំពោះការប្រឈមផ្សេងទៀតដែលនឹងកើតមានបន្ទាប់ពីពលករចំណាកស្រុកទាំងនេះបានទៅដល់ស្រុកកំណើតរបស់ពួកគាត់វិញ។