.jpg)
ស្ថិតនៅភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ចម្ងាយប្រមាណ ៣ ឬ ៤ គីឡូម៉ែត្រពីក្រុង ដោយចូលតាមខ្លោងទ្វារ វត្តកុឍ្ឍបព្វតា លើផ្លូវជាតិលេខ ៥ ស្របទិសដៅឆ្ពោះទៅកាន់ក្រុងប៉ោយប៉ែត ភ្នំជញ្ជាំងគឺជារមណីយដ្ឋានធម្មជាតិ មានបណ្តុំផ្ទាំងថ្មធំៗ លាយឡំដោយព្រៃឈើតូចៗ កាំជណ្តើរឡើងទៅលើជាច្រើនរយកាំ អមដោយបង្កាន់ដៃដែកងាយស្រួលតោងឡើង។
ទាំងមានអំណោយផលល្អពីធម្មជាតិ និងស្ថិតនៅទីតាំងមិនឆ្ងាយពីទីប្រជុំជន រមណីយដ្ឋានធម្មជាតិភ្នំជញ្ជាំង បែរជាមិនសូវមានទេសចរពីចម្ងាយដឹងថា ទីនោះមានបណ្ដុំទេសភាពល្អប្លែកៗ ហើយថែមទាំងអាចគយគន់ទិដ្ឋភាពទីក្រុងទាំងមូលយ៉ាងច្បាស់។ រឹតតែលន្លង់លន្លោចទៅទៀតនោះ ភ្ញៀវទេសចរ ក៏អាចជ្រើសរើសវេលារសៀលជ្រាលជ្រេ អង្គុយមើលព្រះសុរិយាហៀបអស្តង្គត ចែងចាំងពន្លឺពណ៌មាសលើផ្ទៃទឹកស្ទឹងសិរីសោភ័ណទៀតផង។
