ថ្មីៗនេះរាជរដ្ឋាភិបាលបានសម្ពោធដាក់ឲ្យប្រើប្រាស់ នូវសេវាត្រួតពិនិត្យលក្ខណៈបច្ចេកទេសយាន្តយន្តចល័ត ក្នុងគោលបំណងភ្ជាប់សេវាសាធារណៈឲ្យកាន់តែខិតជិតប្រជាពលរដ្ឋ និងលុបបំបាត់ករណីអសកម្មរបស់ជញ្ជីងថ្លឹងតាមគោលដៅមួយចំនួន។
ដោយឡែករឿងរ៉ាវពាក់ព័ន្ធករណីនេះ មួយចំនួននៅតែជាមន្ទិលចំពោះកំណែទម្រង់នេះនៅឡើយ តួយ៉ាងបណ្ដឹងលើករណីរថយន្តដឹកស្រូវលើសទម្ងន់ ដែលអូសបន្លាយអស់រយៈពេល៣ឆ្នាំ ត្រូវបានម្ចាស់រថយន្តតស៊ូប្ដឹងបន្តទៅកំពូល ក្រោយពីសាលាឧទ្ធរណ៍កាត់ឲ្យចាញ់កាលពីថ្ងៃទី ២៩ ខែធ្នូ ឆ្នាំ២០១៦។
អ្នកស្រី សាំង ដាលីន បានហៅខ្លួនឯងថា អ្នកស្វែងរកជញ្ជីងយុត្តិធម៌ និងជាម្ចាស់រថយន្តបានអះអាងប្រាប់ភ្នំពេញប៉ុស្តិ៍ថា គាត់មានឯកសារគ្រប់គ្រាន់ដែលបញ្ជាក់ថា រថយន្តរបស់គាត់មិនបានដឹកលើសទម្ងន់ទេ ប៉ុន្តែអ្នកស្រីភ្ញាក់ផ្អើលនៅពេលដែលតុលាការបែរជាមិនអើពើទៅវិញ។
គួររំឭកឡើងវិញផងដែរថា ករណីនេះក៏ត្រូវបានអន្តរាគមន៍ដោយលោកនាយករដ្ឋមន្ត្រី ហ៊ុន សែន ដោយបានបញ្ជាឲ្យបង្កើតឲ្យមានគណៈកម្មាធិការស៊ើបអង្កេតដើម្បី បញ្ចប់ករណីចម្រូងចម្រាស់នេះ ប៉ុន្តែអ្នកទទួលភារកិច្ច ដោះស្រាយបញ្ហានេះបែរជាមិនអើពើភាពត្រឹមត្រូវរបស់គាត់ ដោយគ្រាន់តែប្រគល់ឡាន និងស្រូវដើម្បីបញ្ចប់រឿង ហើយបដិសេធមិនទទួលខុសត្រូវនៅពេលឡាន និងស្រូវរបស់គាត់ត្រូវបានខូចខាត។
នៅឆ្នាំ២០១២ គឺមុនពេលដែលឡានអ្នកស្រីត្រូវបានក្រុមជញ្ជីងចល័តស្រុកត្បូងឃ្មុំ ចាប់ឃាត់ទុក អ្នកស្រី ដាលីន បានខ្ចីលុយពីធនាគារក្នុងស្រុកមួយ ចំនួន ៣២០០០ ក្នុងគោលបំណងបង្គ្រប់ទិញរថយន្តមួយគ្រឿងដឹក កសិផលក្នុងស្រុកទៅលក់ឲ្យប្រទេសជិតខាងដើម្បីផ្គត់ផ្គង់ជីវភាពគ្រួសារដែលមានសមាជិក ៦នាក់ក្នុងបន្ទុក។
បច្ចុប្បន្នរថយន្ត និងស្រូវដែលជាវត្ថុតាងត្រូវបានរក្សាទុកនៅអធិការដ្ឋានស្រុកត្បូងឃ្មុំនៅឡើយ។ អ្នកស្រីបានឲ្យយើងដឹងទៀតថា បើទោះបីជាញឹកញាប់អ្នកស្រីត្រូវបានគេបញ្ចុះបញ្ចូលឲ្យបញ្ចប់រឿង ដោយប្រគល់រថយន្តឲ្យវិញ ប៉ុន្តែអ្នកស្រីសុខមិនទទួលយកការជិះជាន់ដ៏អយុត្តិធម៌នេះទេ អ្នកស្រីបានអះអាងថាបញ្ហានេះគឺមានជាប់ពាក់ព័ន្ធនឹងអ្នកធំដែលសំងំប៉ឺតឈាមរាស្ត្រ ដោយសុំមិនបញ្ចេញឈ្មោះ អ្នកស្រីបន្ថែមថាសូម្បីតែលោកនាយករដ្ឋមន្ត្រី ក៏មិនមានលទ្ធភាពជួយអ្នកស្រីទេ៕