ក្រុងដតម៉ាន់: ខ្សែប្រយុទ្ធ Paco Alcacer បានរកគ្រាប់បាល់ឈ្នះ ខណៈដែលក្រុម Borussia Dortmund ដែលកំពុងនាំមុខលើតារាងក្របខ័ណ្ឌ Bundesliga បានវាយបកតាមពីក្រោយ ២ លើកដើម្បីផ្តួលក្រុមម្ចាស់ការពារតំណែងជើងឯក Bayern Munich ៣-២ កាលពីថ្ងៃសៅរ៍ និងនាំមុខ ៧ ពិន្ទុដាច់លើគូប្រជែងកំពុងស្ថិតក្នុងចំណាត់ថ្នាក់លេខ ៣ របស់ពួកគេ។ លទ្ធផលនេះបានបន្ថែមសម្ពាធលើគ្រូបង្វឹករបស់ក្រុម Bayern លោក Niko Kovac ខណៈដែលឱកាសរបស់ក្រុមលោកក្នុងការឈ្នះពានក្របខ័ណ្ឌលីកជាលើក ៧ ជាប់ៗគ្នាក្នុងរយៈពេល ១ លើករបស់លោកក្នុងនាមជាគ្រូបង្វឹកបានជួបការខកចិត្តមួយផ្សេងទៀត។
លោក Kovac បានឲ្យដឹងថា៖ «យើងបានធ្វើឲ្យខ្លួនយើងចុះចាញ់ ២ លើកក្នុងការវាយសម្រុករហ័ស ដែលមិនគួរកើតឡើងឡើយ»។
ក្រោយពីខ្សែប្រយុទ្ធ Robert Lewandowski បានបាត់បង់គ្រាប់បាល់ ២ គ្រាប់ក្នុងតង់ទី ២ ដោយសារតែជាបាល់ Offside គ្រូបង្វឹករូបនេះបានបន្ថែមទៀតថា៖ «យើងគួរតែមានភាពរឹងមាំជាងនេះ ហើយជាអកុសល យើងបានចាញ់ការប្រកួតមួយដែលគួរតែបញ្ចប់ក្នុងលទ្ធផលស្មើ»។
បច្ចុប្បន្ន ក្រុម Bayern បានរងបរាជ័យ ៣ លើកក្នុងចំណោមការប្រកួត Bundesliga ៦ លើកចុងក្រោយរបស់ពួកគេ ក្រោយពីបានរងបរាជ័យក្រោមស្នាដៃក្រុម Hertha Berlin និង Borussia Moenchengladbach ដោយរកបានត្រឹមតែ ៨ ពិន្ទុគត់ពីការប្រកួតដែលផ្តល់ពិន្ទុសរុប ២១។ ក្រុម Dortmund របស់លោក Lucien Favre នៅតែមិនទាន់ស្គាល់ចាញ់សោះ និងនាំមុខ ៤ ពិន្ទុដាច់លើក្រុមឈរលេ ខ២ Gladbach នៅលើកំពូលតារាង។
ក្រោយពី Lewandowski បានជួយឲ្យក្រុម Bayern នាំមុខ ២ លើកនាកីឡដ្ឋាន Signal Iduna Park ពេលជួបជាមួយនឹងអតីតក្រុមរបស់ខ្លួន ខ្សែបម្រើ Marco Reus ប្រធានក្រុមនៃក្រុម Dortmund រកបានគ្រាប់បាល់តាមស្មើវិញទាំង ២ លើក នៅមុនពេលកីឡាករបម្រុង Alcacer រកបានគ្រាប់បាល់ឈ្នះនៅនាទី ទី ៧៣៕