.jpg)
ខ្សែប្រយុទ្ធក្លិប Arsenal ស៊ុតបាល់ចូលទីយ៉ាងល្អក្នុងការប្រកួតលីកអង់គ្លេសជាមួយក្លិប West Ham ពីរាត្រីថ្ងៃចន្ទ។ រូបថត AFP
ទីក្រុងឡុងដ៍៖ គ្រូបង្វឹកបណ្ដោះអាសន្នក្លិប Arsenal លោក Freddie Ljungberg មានការធូរចិត្តច្រើន ក្រោយពីការរកបាន ៣ គ្រាប់ ក្នុងរយៈពេលតែ ៩ នាទី នៅតង់ទី ២ បានឈ្នះក្រុម West Ham ៣-១ កាលពីថ្ងៃចន្ទ ដើម្បីបញ្ចប់ការមិនធ្លាប់ឈ្នះដ៏អាក្រក់បំផុតបែបនេះ របស់ក្រុមកាំភ្លើងធំក្នុងរយៈពេល ៤២ ឆ្នាំ។
ក្នុងការប្រកួតនេះក្រុមភ្ញៀវកាំភ្លើងធំសឹងតែអស់សង្ឃឹមទៅហើយនៅពេលកីឡាករ Angelo Ogbonna តែតបាល់បញ្ចូលទីយ៉ាងល្អជួយឲ្យក្រុមម្ចាស់ផ្ទះនាំមុខ ១-០ នៅតង់ទី ១។
ប៉ុន្តែរំពេចនោះក្រុម Arsenal ហាក់មានក្ដីសង្ឃឹមឡើងវិញនៅពេលកីឡាករ Gabriel Martinelli បានបំប៉ោងសំណាញ់ជាលើកដំបូងនៃក្របខ័ណ្ឌ Premier League បន្ទាប់មកកីឡាករ Nicolas Pepe បានបន្ថែម ១ គ្រាប់ទៀត មុនពេលកីឡាករ Pierre-Emerick Aubameyang ដាក់ ១ គ្រាប់ចុងក្រោយ ដើម្បីបាន ៣ ពិន្ទុ ពេញនៅក្នុងការប្រកួតនេះ។
លោក Ljungberg បាននិយាយថា៖ «លទ្ធផលនេះមានន័យខ្លាំងណាស់សម្រាប់កីឡាករ ព្រោះពួកគេកំពុងរស់នៅក្រោមសម្ពាធយ៉ាងខ្លាំង ហើយអ្នកឃើញវានៅក្នុងទម្រង់លេងរបស់ពួកគេ»។
គ្រូបង្វឹកបណ្ដោះអាសន្នរូបនេះបានបន្ថែមថា៖ «អ្នកអាចឃើញកីឡាករយើងលំបាកបន្តិចហើយ ប៉ុន្តែនៅក្នុងបន្ទប់សម្រាកពួកគេបានធូរចិត្ត និងសប្បាយចិត្តយ៉ាងខ្លាំង»។
ជ័យជម្នះលើកដំបូងក្នុង ១០ ប្រកួតក្នុងប្រកួតទាំងអស់បានធ្វើឲ្យក្រុម Arsenal ឡើងដល់លេខ ១០ និងបានកាត់បន្ថយគម្លាតពិន្ទុជាមួយក្រុម Chelsea រហូតដល់ទៅ ៧ ពិន្ទុ ក្នុងការប្រកួតសម្រាប់ការមានឱកាសឡើងទៅលេងក្របខ័ណ្ឌ Champions League នៅរដូវកាលក្រោយ។
លោក Ljungberg បានប្រតិកម្មនឹងការទទួលបានតែ ១ ពិន្ទុ ពីការប្រកួតបើកឆាក ២ លើក ក្រោមការដឹកនាំបណ្ដោះអាសន្នរបស់គាត់ជាមួយក្រុម Norwich និងក្លិប Brighton ដោយធ្វើការផ្លាស់ប្ដូរ ៥ លើក ជាមួយកីឡាករ Martinelli និង Pepe។
លោក Ljungberg បាននិយាយថា៖ «កីឡាករ Nicolas គឺជាកីឡាករបាល់ទាត់ដ៏អស្ចារ្យម្នាក់ ប៉ុន្តែវាមិនងាយស្រួលចេញពីលីកបារាំងចូលទៅក្នុងលីកអង់គ្លេសនោះទេ និងបានកែប្រែទម្រង់លេងក្រៅទឹកដី»។
គ្រូបង្វឹកបណ្ដោះអាសន្នរូបនេះបានបន្ថែមថា៖ «វាជាការរកបានគ្រាប់បាល់អស្ចារ្យមួយ ហើយគាត់នឹងមានទម្រង់លេងកាន់តែល្អជាងនេះ»។
វាមិនទាន់មានការរីកចម្រើនច្រើនក្នុងការប្រកួត ២ លើកដំបូងរបស់លោក Ljungberg តាំងពីបានចូលដឹកនាំជំនួសលោក Unai Emery នោះទេ ហើយជ័យជម្នះរបស់ក្រុម Arsenal ទៅលើក្រុម West Ham នេះ គឺជាលើកដំបូងក្នុងការប្រកួត ១១ លើកចុងក្រោយរបស់ពួកគេ។
លោក Manuel Pellegrini គ្រូបង្វឹកក្លិប West Ham ដែលកំពុងរងសម្ពាធកាន់តែខ្លាំងដោយសារក្រុមរបស់គាត់លើស ១ ពិន្ទុ ផុតពីតំបន់បាតតារាងនោះ បាននិយាយថា៖ «ខ្ញុំគិតថា យើងគ្រប់គ្រងបាល់រយៈពេល ៦០ នាទី ហើយ ១០ នាទីក្រោយមក យើងបានចាញ់ការប្រកួត»។
គ្រូបង្វឹករូបនេះបានបន្ថែមទៀតថា៖ «អ្នកយល់ពីការប្រកួតនេះហើយ ព្រោះការប្រកួត ៥ លើកចុងក្រោយ យើងមិនបានឈ្នះនោះទេ។ អ្នកមិនអាចធ្វើឲ្យរបូត ៣ គ្រាប់ នៅគ្រប់ការប្រកួតនោះឡើយ»៕ AFP/SN
