.jpg)
កីឡាករ Aubameyang របស់ក្រុមកាំភ្លើងធំ តែតបាល់កំឡុងពេលប្រកួតជាមួយក្រុម Newcastle។ រូបថត AFP
ក្រុងឡុងដ៍ៈ គ្រូបង្វឹកក្រុម Arsenal លោក Mikel Arteta បាននិយាយថា គាត់នៅតែចង់បានភាពល្អបំផុតសម្រាប់អតីតបុគ្គលិកនៅក្លិប Man City រូបនេះបើទោះជាការដាក់ទណ្ឌកម្មរបស់អឺរ៉ុបទៅលើក្លិបម្ចាស់ជើងឯកអង់គ្លេសនេះអាចផ្ដល់ឱកាសឲ្យក្រុមកាំភ្លើងធំលេងនៅក្របខ័ណ្ឌ Champions League នៅរដូវកាលក្រោយក៏ដោយ។
ជ័យជម្នះ ៤-០ លើក្រុម Newcastle កាលពីថ្ងៃអាទិត្យនោះបានធ្វើឲ្យក្រុម Arsenal ឡើងទៅឈរនៅលេខ ១០ នៅក្របខ័ណ្ឌ Premier League និងតាមពីក្រោយតែ ៦ ពិន្ទុ នៃក្រុម Tottenham ដែលឈរនៅលេខ ៥ ក្រោយពីឈ្នះក្រុម Aston Villa ៣-២ ដោយសារកីឡាករ Son Heung-min។
ការដាក់បំរាមប្រកួត ២ រដូវកាលរបស់សហភាពសមាគមបាល់ទាត់អឺរ៉ុប (UEFA) ទៅលើក្រុម Man City នេះមានន័យថា ចំណាត់ថ្នាក់លេខ ៥ ល្មមនឹងធានាបាននូវកន្លែងមួយនៅ Champions League ប្រសិនបើម្ចាស់ជើងឯកនេះមិនជោគជ័យក្នុងការប្ដឹងជំទាស់នឹងទណ្ឌកម្មនៅតុលាការអាជ្ញាកណ្ដាលសម្រាប់កីឡានោះទេ។
លោក Arteta ដែលចាកចេញពីក្រុម Man City កាលពីខែធ្នូនោះឥឡូវនេះអាចជាអ្នកទទួលបានប្រយោជន៍ពីការដាក់ទណ្ឌកម្មទៅលើអតីតក្លិបរបស់គាត់មួយនេះ។
គ្រូបង្វឹកសញ្ជាតិអេស្ប៉ាញរូបនេះបាននិយាយថា៖ «វាពិតជាលំបាក។ ខ្ញុំចង់បានភាពល្អបំផុតសម្រាប់ក្រុម Man City និងភាពល្អបំផុតសម្រាប់លោក Pep Guardiola ព្រមទាំងកីឡាករផងដែរ។ រឿងតែមួយគត់ដែលខ្ញុំចង់បានសម្រាប់ពួកគេនោះគឺភាពវិជ្ជមាន និងរឿងល្អៗផ្សេងទៀត»។
គ្រូបង្វឹករូបនេះបានបន្ថែមថា៖«ខ្ញុំគ្រាន់តែចង់ធ្វើសម្រាប់ក្រុម Arsenal តាមលទ្ធភាពដែលខ្ញុំអាចបំពេញបានប៉ុណ្ណោះ»។
នេះគឺគ្រាន់តែជាជ័យជម្នះលើកទី ២ នៃការប្រកួតលីកចំនួន ៨ ចាប់តាំងពីលោក Arteta បានចូលកាន់តំណែង ហើយមានការលើកទឹកចិត្តជាច្រើនសម្រាប់កីឡាករវ័យ ៣៧ ឆ្នាំ ក្នុងការប្រកួតតង់ទី ២ របស់ក្រុម Arsenal បន្ទាប់ពីលេងបានរយៈពេល ៤៥ នាទីដំបូង។
លោក Arteta បានបន្ថែមក្រោយពីមានការប្រកួតស្មើគ្នា៦លើកក្នុង៨ប្រកួតថា៖ «យើងបានជជែកគ្នាមុនពេលការប្រកួតដែលយើងចង់ប្រែក្លាយពីការស្មើគ្នាទៅជាការឈ្នះវិញ»៕ AFP/SN
