ក្រុងម៉ាឌ្រីដ: ការចាប់ផ្តើមយ៉ាងល្អរបស់ក្រុម Atletico Madrid នៅរដូវកាលនេះ អាចត្រូវបានមើលរំលងដោយវិបត្តិផ្សេងៗជុំវិញក្រុម Real ប៉ុន្តែ វាគ្មានកន្លែងអ្វីត្រូវលាក់បាំងឡើយ នៅពេលប្រកួតជាមួយនឹងក្រុម Borussia Dortmund នៅរាត្រីនេះ។ កាលពី ២ សប្តាហ៍មុន ក្រុម Dortmund បានយកឈ្នះលើក្រុមរបស់លោក Diego Simeone ៤-០ ដែលជាការបរាជ័យដ៏ធំបំផុតរបស់ Atletico ចាប់តាំងពីគ្រូបង្វឹករូបនេះបានចូលកាន់តំណែងកាលពី ៣៩២ ថ្ងៃមុន ស្របពេលកាលពីថ្ងៃសៅរ៍ ពួកគេបានបញ្ចប់ក្នុងលទ្ធផលស្មើ ១-១ ជាមួយនឹងក្រុម Leganes ដែលកំពុងស្ថិតក្នុងចំណាត់ថ្នាក់លេខ ១៨ នៅលើតារាងក្របខ័ណ្ឌ La Liga និងចាញ់ ៨ លើករួចជាស្រេចនៅរដូវកាលនេះ។
វាត្រូវបានគេរំពឹងទុកថា នេះគឺជាឆ្នាំរបស់ក្រុម Atletico ខណៈដែលពួកគេបានត្រៀមខ្លួនក្នុងការប្រជែងពានតាមរយៈការទិញចូលកីឡាករឆ្នើមៗជាច្រើនកាលពីរដូវកាលក្តៅ ហើយពួកគេក៏សម្លឹងរកការប្រជែងពាន Champions League ផងដែរ ដោយវគ្គផ្តាច់ព្រ័ត្រនៃយុទ្ធនាការនេះ នឹងត្រូវរៀបចំឡើងនៅកីឡដ្ឋានរបស់ពួកគេ Wanda Metropolitano នៅខែមិថុនា។
ការរងបរាជ័យរបស់ពួកគេពេលជួបក្រុម Dortmund និងបាត់បង់ពិន្ទុពេលប៉ះក្រុម Leganes ពិតជាលទ្ធផលដ៏ខកចិត្ត ដោយសារតែពួកគេបានបង្ហាញពីភាពទន់ខ្សោយក្នុងតំបន់ការពារ ដែលធ្លាប់តែខ្លាំងក្រោមការដឹកនាំរបស់លោក Simeone។
Dortmund បានបំបែកក្បួនការពាររបស់ Atletico តាមរយៈការស៊ុតបាល់បញ្ចូលទី ៣ គ្រាប់ក្នុងចន្លោះពេល ១០ នាទី នាកីឡដ្ឋាន Signal Iduna Park ស្របពេល Leganes បានតាមស្មើវិញកាលពីថ្ងៃសៅរ៍ ដោយការស៊ុតបាល់ពិន័យពីចម្ងាយ។
Barca ត្រៀមបង្ហាញពីភាពខ្លាំង ពេលប៉ះ Inter រាត្រីនេះ
Lionel Messi អាចនឹងធ្វើការវិលទៅប្រកួតវិញឆាប់រហ័សជាងការរំពឹងទុក នៅពេលក្រុមខ្លួនជួបជាមួយនឹងក្រុម Inter Milan ក្នុងការប្រកួតក្របខ័ណ្ឌ Champions League នៅរាត្រីនេះ ប៉ុន្តែ ក្រុម Barcelona មិនបាននឹកដល់រូបគេខ្លាំងឡើយ។ ការដណ្តើមបានជ័យជម្នះ ៤ លើកពីការប្រកួតទាំង ៤ លើក ក្នុងនោះរាប់បញ្ចូលទាំងការយកឈ្នះលើក្រុម Inter Milan និង Real Madrid មានន័យថា Messi នឹងវិលទៅកាន់ក្រុមមួយ ដែលកំពុងតែបង្ហាញពីទម្រង់លេងដ៏ខ្លាំងបំផុតរបស់ពួកគេនៅរដូវកាលនេះ បើទោះបីគ្មានខ្សែប្រយុទ្ធដ៏ឆ្នើមរបស់ពួកគេក៏ដោយ។
ក្រុមយក្សមួយនេះ បានបញ្ចូលឈ្មោះ Messi ក្នុងក្រុមរបស់ខ្លួន សម្រាប់ការប្រកួតនៅកីឡដ្ឋាន San Siro ទោះបីរូបគេមិនទាន់ត្រូវបានបញ្ជាក់ពីក្រុមវេជ្ជបណ្ឌិតថា រឹងមាំទាំងស្រុងក៏ដោយ។ រូបគេអាចនឹងចូលលេងក្នុងនាមជាកីឡាករបម្រុង ឬក៏ត្រូវពន្យារពេលប្រកួតរហូតដល់ថ្ងៃអាទិត្យ នៅពេល Barca ធ្វើជាម្ចាស់ផ្ទះទទួល Betis ក្នុងក្របខ័ណ្ឌ La Liga។
ក្នុងពេលរូបគេអវត្តមាន Luis Suarez បានស៊ុតបាល់បញ្ចូលទី ២ គ្រាប់ កាលពីថ្ងៃសៅរ៍ ដើម្បីបំពេញការវាយបកផ្តួលក្រុម Vallecano និងដើម្បីរកបាន ៦ គ្រាប់ពីការប្រកួត ៤ លើកចុងក្រោយ៕
កម្មវិធីប្រកួតរាត្រីនេះ
Crvena zvezda v Liverpool -12:55 អាធ្រាត្រ
Monaco v Club Brugge -12:55 អាធ្រាត្រ
Atl. Madrid v Dortmund - 3 ទៀបភ្លឺ
Porto v Lokomotiv -3 ទៀបភ្លឺ
Inter v Barcelona -3 ទៀបភ្លឺ
Napoli v Paris SG -3 ទៀបភ្លឺ
Schalke v Galatasaray - 3 ទៀបភ្លឺ
Tottenham v PSV -3 ទៀបភ្លឺ