ក្រុងឡុងដ៍៖ លោក Mikel Artetaបានទទួលស្គាល់ថា កីឡាករ Pierre-Emerick Aubameyang បានជួយបំបាត់ចម្ងល់ពីការបរិយាយរបស់គាត់ ក្រោយពីប្រធានក្រុម Arsenal រូបនេះបានធ្វើជាគំរូនៅក្នុងការរកបាន ២ គ្រាប់ ក្នុងជ័យជម្នះរបស់ពួកគេទៅលើក្រុម Everton ពីរាត្រីថ្ងៃអាទិត្យ។
សម្រាប់រដូវកាលដ៏សម្បូរបញ្ហានេះ ក្រុម Arsenal ត្រូវបានចោទជាសំណួរយ៉ាងច្រើនពីយុទ្ធសាស្ត្រប្រកួតប្រជែង ដើម្បីមានឱកាសលេងនៅ Champions League។
ប៉ុន្តែក្រោយពីបានងើបឡើងវិញពីភាពខ្សោយនៅក្នុងពេលដឹកនាំរបស់លោក Unai Emery នោះមក លោក Arteta បាននិងកំពុងកសាងភាពខ្លាំងរបស់ក្លិបនេះឡើងវិញបន្តិចម្ដងៗ។
កីឡាករ Mominic Calvert-Levin បានបើកឆាក ១ គ្រាប់ សម្រាប់ក្រុមភ្ញៀវ Everton នៅនាទីទី ១ នៅកីឡដ្ឋាន Emirates បន្ទាប់មកក្រុមម្ចាស់ផ្ទះ Arsenal បានតាមស្មើវិញដោយកីឡាករ Eddie Nketiah នៅនាទីទី ២៧ ហើយបានបន្តនាំមុខដោយកីឡាករ Aubameyang នៅនាទីទី ៣៣។
ប៉ុន្តែកីឡាករ Richarlison បានជួយឲ្យក្រុម Everton តាមស្មើវិញនៅចុងតង់ទី ១ នៅមុនពេលខ្សែប្រយុទ្ធ Aubameyang បានបន្ថែម ១ គ្រាប់ទៀត សម្រាប់ក្រុមម្ចាស់ផ្ទះនៅដើមតង់ទី ២។
គ្រូបង្វឹកក្រុមកាំភ្លើងធំលោក Arteta បាននិយាយថា គាត់គ្មានទំនុកចិត្តចំពោះស្មារតីប្រកួតរបស់កីឡាករ Aubameyang មុនពេលគាត់ចូលដឹកនាំក្លិបនេះទេ ប៉ុន្តែក្រោយពីតាមដានទម្រង់លេងរបស់រូបគាត់ហើយ គ្រូបង្វឹកអេស្ប៉ាញរូបនេះបានបង្កើនទំនុកចិត្តលើកីឡាករនេះតែម្ដង។
លោក Arteta បាននិយាយថា៖ «មុនពេលខ្ញុំចូលដឹកនាំក្លិបនេះ ខ្ញុំបានមានចម្ងល់ជាច្រើនពីគាត់ ប៉ុន្តែគាត់បានបង្ហាញពីការប្ដេជ្ញាចិត្តរបស់គាត់។ ខ្ញុំចង់ឲ្យគាត់បង្ហាញទម្រង់លេងបែបនេះទៀត ប្រសិនបើគាត់ចង់ និងធ្វើវាដោយជាក់ស្ដែង»។
គ្រូបង្វឹករូបនេះបានបន្ថែមថា៖ «ខ្ញុំពិតជាសប្បាយចិត្តជាមួយគាត់។ គាត់កំពុងរកបានគ្រាប់បាល់សំខាន់ៗ ហើយក្នុងនាមជាប្រធានក្រុម គាត់នឹងផ្ដល់ជាគំរូអស្ចារ្យចំពោះអ្នកផ្សេងទៀតជាមួយទម្រង់លេងដែលគាត់កំពុងលេងបែបការពារនេះ»។
ជ័យជម្នះនេះបានធ្វើឲ្យក្រុម Arsenal ឡើងទៅឈរពីលើក្រុម Everton ស្ថិតនៅចំណាត់ថ្នាក់ទី ៩ និងតាមពីក្រោយ ៤ ពិន្ទុ នៃក្រុម Man Utd ដែលឈរនៅលេខ ៥ នៃក្របខ័ណ្ឌ Premier League ក្រោយពីក្រុមបិសាចក្រហមនេះបានឈ្នះក្រុម Watford ៣-០ នៅរាត្រីថ្ងៃអាទិត្យនោះផងដែរ។
កីឡាករ Bruno Fernandes ដែលទើបចុះកុងត្រាលេងនៅក្លិប Man Utd នេះបានបើកឆាក ១ គ្រាប់ បន្ទាប់មកគ្រាប់ទី ២ រកបានដោយកីឡាករ Anthony Martial មុនពេលកីឡាករ Mason Greenwood បានបន្ថែម ១ គ្រាប់ទៀត។
លោក Ole Gunnar Solskjaer បានសរសើរកីឡាករដែលទើបចុះកុងត្រាថ្មីរបស់គាត់ថា៖ «គាត់ធ្វើបានសម្រេចយ៉ាងអស្ចារ្យ។ គាត់បានជួយលើកកម្លាំងចិត្តដល់គ្រប់គ្នា។ គាត់ចង់បានបាល់គ្រប់ពេល ហើយគាត់ក៏ចង់ចូលរួមប្រកួតផងដែរ»។
គ្រូបង្វឹករូបនេះបានបន្ថែមទៀតថា៖ «ខ្ញុំពេញចិត្តចំពោះគាត់ព្រោះគាត់បានធ្វើអ្វីៗបំពេញចិត្តទស្សនិកជន។ គាត់បានបង្ហាញឲ្យគេឃើញពីទម្រង់លេងរបស់ក្រុម Man Utd ជាក់ស្ដែងហើយគាត់ គឺជាអ្នកជំរុញទឹកចិត្តដ៏អស្ចារ្យដល់ក្រុមនេះផងដែរ»។
ខ្សែបម្រើសញ្ជាតិព័រទុយហ្គាល់ Fernandes បានប្រាប់ទូរទស្សន៍ BBC និយាយថា៖ «គ្រប់គ្នាបានដឹងហើយថា យើងចង់ឡើងទៅកន្លែងដែលបានលេងនៅក្របខ័ណ្ឌ Champions League ហើយខ្ញុំនៅទីនេះ ដើម្បីជួយក្រុមនេះឲ្យបានឡើងដល់កន្លែងនោះតាមរយៈការបន្តឈ្នះថែមទៀត»៕ AFP/SN