.jpg)
ការប្រកួតរវាងក្រុម Khmer United (ក្រហម) និងក្រុមយុវជនច្បាប់ កាលពីថ្ងៃអាទិត្យ។ សហការី
ភ្នំពេញៈ ក្រុម Avatar FC ត្រូវបានដើរតួនាទីយ៉ាងសំខាន់ ក្នុងការយឹតយោងក្រុមជើងឯករង ២ ជំនាន់ Khmer United ឲ្យបន្តឈរនៅលើកំពូលតារាង នៃលីកខ្មែររៀលអ៊ីស្ទេត លើកទី ៧ ឆ្នាំ ២០១៨ (Khmer Real Estate League 2018) ប្រចាំសប្តាហ៍ទី ១២ ប៉ុន្តែក្រុមជើងឯក Bayon Wanderers បានលត់ក្រុមឈរនៅបាតតារាងយ៉ាងចាស់ដៃ ដើម្បីបន្ថែមភាគរយប្រជែងយកពាន។
សម្រាប់ការប្រកួតលើកទី ១២ នេះ តំបន់កំពូលតារាងរបស់ក្រុម Khmer United ស្ទើរតែធ្លាក់ទៅលើកណ្តាប់ដៃក្រុមចម្រុះដោយបរទេស Riel PP ទៅហើយ ខណៈ Khmer United បែរជាទៅស្មើជាមួយក្រុមយុវជនច្បាប់ ៣-៣ នោះ។ ប៉ុន្តែជ័យជម្នះរបស់ក្រុម Avatar FC លើក្រុម Riel PP ក្នុងថ្ងៃជាមួយគ្នានោះ វានៅតែជួយឲ្យក្រុម Khmer United បន្តឈរនៅលើកំពូលតារាងដដែល ដោយមាន ៣២ ពិន្ទុ។
ក្រុម Avatar FC បានយកឈ្នះក្រុម Riel PP ៤-១ ហើយលទ្ធផលនេះបានជួយឲ្យក្រុម ពួកគេឡើងទៅឈរនៅលេខរៀងទី ២ មាន ៣១ ពិន្ទុ ហើយបានទម្លាក់ Riel PP ឲ្យមកឈរលេខ ៣ វិញ ដោយមាន ៣០ ពិន្ទុដដែល។
ដោយឡែកក្រុមម្ចាស់ជើងឯក Bayon បានលត់ក្រុមឈរនៅបាតតារាង Snor Youth ៨-១ ដើម្បីឡើងមកឈរនៅលេខ ៤ ជាថ្មី ហើយការមាន ២៧ ពិន្ទុ ជាមួយការប្រកួតត្រឹម ១១ ដង ជាមួយការឈ្នះ ៩ និងចាញ់ ២ ប្រកួត វាកំពុងតែធ្វើឲ្យក្រុម Bayon មានភាគរយកាន់តែខ្ពស់ ក្នុងការប្រជែងយកពាននៅឆ្នាំនេះផងដែរ។
អ្វីដែលគួរឲ្យកត់សម្គាល់នោះ ក្រុម Bayon មិនព្រមទទួលយកលទ្ធផលឈ្នះ ៣-០ ដោយស្វ័យប្រវត្តិលើក្រុមយុវជនវត្តកោះ ដែលមិនបានមកប្រកួត កាលពីសប្តាហ៍មុន នោះទេ។ Bayon បានសុំឲ្យគណៈកម្មការរៀបចំការប្រកួតជាថ្មី ហើយសំណើនេះ បង្ហាញថា Bayon ចង់ឈ្នះយុវជនវត្តកោះ លើសពី ៣-០ ដើម្បីមានគ្រាប់បាល់ចំណេញកាន់តែច្រើន និងមានឱកាសកាន់តែខ្ពស់ក្នុងការប្រជែងយកពាន ព្រោះព្រឹត្តិការណ៍នេះ ពេលក្រុម ២ មានពិន្ទុស្មើគ្នា គេគិតគ្រាប់បាល់ចំណេញ ជាអាទិភាព។
ចំណែកក្រុមធ្លាប់ឈរនៅកំពូលតារាង Blue Dragon បានយកឈ្នះក្រុម Giant FC ៣-០ មាន ២៧ ពិន្ទុ និងឈរនៅលេខ ៥ ហើយក្រុមយុវជនកំពង់ចាម បានឈ្នះក្រុម Mambo PP ៥-៣ ដើម្បីបន្តឈរនៅលេខ ៦ មាន ២៦ ពិន្ទុ។ ប៉ុន្តែក្រុមអាណាចក្រទួលគោក បានចាញ់ក្រុមបាសាក់ ៣-០ ធ្វើឲ្យក្រុមទាំង ២ នេះមាន ២៣ ពិន្ទុស្មើគ្នា។
ជាមួយគ្នានោះក្រុម RFL បានឈ្នះក្រុមយុវជនតាំងគោក ៦-៣ មាន ២១ ពិន្ទុ ឯទន្សោងអេហ្វស៊ី ទទួលបាន ៣ ពិន្ទុបន្ថែមដែរ ដោយមាន ១៩ ពិន្ទុ ក្រោយពេលពួកគេលត់ក្រុមយុវជនវត្តកោះ ៦-០។ រីឯ V.Train FC បានលត់ក្រុមកូនខ្មែរ ១១-៤ មាន ៨ ពិន្ទុ ប៉ុន្តែAnvaya FC បានត្រឹមស្មើ ៥-៥ ជាមួយក្រុម HHK FC៕
