ក្រុងម៉ាឌ្រីដៈ ក្លិប Barcelona បានប្រកាសពីការចុះកុងត្រាទិញកីឡាករបារាំង Antoine Griezmann កាលពីថ្ងៃសុក្រក្នុងតម្លៃខ្លួន ១២០ លានអឺរ៉ូស្មើ ១៣៥ លានដុល្លារអាមេរិក ប៉ុន្តែក្លិប Atletico Madrid បានខកចិត្តយ៉ាងខ្លាំងចំពោះចំនួនទឹកប្រាក់ដែលម្ចាស់ជើងឯកក្របខ័ណ្ឌអេស្ប៉ាញ La Liga បានចំណាយទៅឲ្យជើងឯក World Cup រូបនេះ។
ក្លិប Barcelona បាននិយាយក្នុងរបាយការណ៍ខ្លួនថា ពួកគេបានចំណាយប្រាក់ ១២០ លានអឺរ៉ូដើម្បីរៀបចំលក្ខខណ្ឌរំលាយកុងត្រារបស់កីឡាកររូបនេះដោយបន្ថែមថា គាត់នឹងចុះកុងត្រាសម្រាប់រយៈពេល ៥ ឆ្នាំដែលរួមបញ្ចូលទាំង «លក្ខខណ្ឌរំលាយកុងត្រាដែលមានទឹកប្រាក់ ៨០០ លានអឺរ៉ូ» ផងដែរ។
តាមពិតទៅកីឡាករ Griezmann គួរតែបានចុះកុងត្រាជាមួយក្លិប Barcelona តាំងពី ១២ ខែមុនម្ល៉េះ ប៉ុន្តែរូបគេបានផ្អាកទៅវិញដោយសារពេលនោះគាត់ចង់នៅជាមួយក្លិប Atletico ជាបន្តទៀត ប៉ុន្តែឥឡូវរូបគេបានប្ដូរចិត្តវិញហើយតាមការបង្រៀនរបស់ឪពុកគាត់។
កីឡាកររូបនេះបាននិយាយតាមគេហទំព័រក្លិប Barcelona ពីថ្ងៃសុក្រថា៖ «នៅពេលខ្ញុំនៅក្មេង ឪពុកខ្ញុំបានបង្រៀនខ្ញុំថា យើងត្រូវទទួលយកការបណ្ដុះបណ្ដាលឲ្យបានច្រើនកន្លែង»។
កីឡាករ Griezmann បានបន្ថែមថា៖ «ឥឡូវនេះ វាដល់ពេលដែលខ្ញុំត្រូវទទួលយកបទពិសោធនៃគោលដៅថ្មីហើយ»។
Griezmann បានបន្តថា៖ «ទីបញ្ចប់យើងបានសម្រេចចិត្តច្បាស់ហើយថា ខ្ញុំនឹងប្ដេជ្ញាចិត្តការពារក្លិប Barcelona ព្រោះវាជាពេលវេលារបស់យើង ហើយនេះជាផ្លូវរបស់យើង»។
ទោះយ៉ាងណាក្រោយពីក្លិប Barcelona ប្រកាសពីរបាយការណ៍របស់ខ្លួនរយៈពេលប៉ុន្មាននាទីប៉ុណ្ណោះ ក្លិប Atletico បាននិយាយថាចំនួនទឹកប្រាក់ចំណាយនេះគឺមិនទាន់គ្រប់គ្រាន់តាមកុងត្រានៅឡើយទេព្រោះកុងត្រាកំណត់ថា តម្លៃខ្លួនកីឡាករគឺ ២០០ លានអឺរ៉ូប៉ុន្តែប្រគល់ឲ្យតែ ១២០ លានអឺរ៉ូ។
ក្លិប Atletico បាននិយាយថា Griezmann បានធ្វើដំណើរទៅក្លិប Barcelona ដោយបញ្ចប់កុងត្រាដោយខ្លួនឯងមុនពេលក្លិប Barcelona បានរៀបចំកុងត្រានេះ ហើយថាពួកគេបានចាប់ផ្ដើមនីតិវិធីសមរម្យដើម្បីការពារ «សិទ្ធិ និងផលប្រយោជន៍ស្របច្បាប់»។
នេះជាការប្រកាសចុងក្រោយបំផុតនៅក្នុងជម្លោះរវាងក្លិបទាំង ២ និងកីឡាករ Griezmann ក្រោយពីកីឡាករវ័យ ២៨ ឆ្នាំរូបនេះមិនបានបង្ហាញខ្លួនសម្រាប់ការហ្វឹកហាត់មុនរដូវកាលនៅក្លិប Atletico កាលពីថ្ងៃអាទិត្យក្រោយពីមានការប្រកាសពីខែឧសភាថាគាត់នឹងចាកចេញទៅកាន់ក្លិបណាមួយដែលគេសង្ស័យជាយូរមកថា វាអាចជាក្លិប Barcelona ។
ហើយកាលពីសប្ដាហ៍មុនក្លិប Atletico បានចោទក្រុម Barcelona និងកីឡាករ Griezmann ថា «ខ្វះការគោរព» ក្រោយពីប្រធានក្លិប Barcelona លោក Josep Maria Bartomeu បានបង្ហាញថាក្លិបទាំង ២ នេះបានជជែកពីអតីតខ្សែប្រយុទ្ធក្លិប Real Sociedad។
នៅពេលនោះក្លិប Atletico បានអះអាងថាកីឡាករ Griezmann បានប្រាប់ក្លិបនេះថា រូបគេបានចុះកុងត្រាជាមួយក្លិប Barcelona កាលពីខែមីនា។
Griezmann បានចូលរួមនឹងក្លិប Atletico នៅឆ្នាំ ២០១៤ ហើយគាត់រកបានគ្រាប់បាល់ចំនួន ១៣៣ គ្រាប់ក្នុងការប្រកួតសរុប ២៥៧ និងជួយឲ្យក្លិបនេះលើកពាន Europa League នៅឆ្នាំ ២០១៨៕ SN