ក្រុងម៉ា្រឌីដ៖ ក្លិបម្ចាស់ជើងឯកអេស្ប៉ាញ Barcelona បានបណ្ដេញគ្រូបង្វឹកចាស់ គឺលោក Ernesto Valverde ហើយបានតែងតាំងលោក QuiqueSetien ជំនួសវិញ។ នេះបើយោងតាមការប្រកាសរបស់ក្លិបនេះកាលពីថ្ងៃចន្ទ។
ការសម្រេចចិត្តបណ្ដេញលោក Valverde នេះត្រូវបានប្រកាសជាផ្លូវការ ក្រោយពីមានការប្រជុំក្រុមប្រឹក្សានាយកដែលចំណាយជាង ៤ ម៉ោង នៅកីឡដ្ឋាន Camp Nou កាលពីរសៀលថ្ងៃចន្ទ។
ក្រុម Barcelona កំពុងឈរនៅលើកំពូលតារាងក្របខ័ណ្ឌអេស្ប៉ាញ La Liga ប៉ុន្តែបានឈ្នះតែម្ដងគត់ក្នុងការប្រកួត ៥ លើកចុងក្រោយ ហើយលោក Valverde គឺជាគ្រូបង្វឹកលើកដំបូងដែលក្លិបនេះបានបណ្ដេញនៅពាក់កណ្ដាលរដូវកាលបែបនេះ តាំងពីលោក Louis van Gaal ធ្លាប់ជួបបែបនេះនៅឆ្នាំ ២០០៣។
របាយការណ៍របស់ក្លិបនេះបាននិយាយថា៖ «ក្លិប FC Barcelona និងលោក Ernesto Valverde បានឈានដល់កិច្ចព្រមព្រៀងមួយដោយភាគីទាំង ២ បានស្រុះស្រួលគ្នាបញ្ចប់កុងត្រានេះតែម្ដង»។
របាយការណ៍នេះបានបន្តថា៖ «ក្លិប Barcelona ព្រមព្រៀងឲ្យលោក Quique Setien ធ្វើជាគ្រូបង្វឹកក្រុមដំបូងរហូតដល់ថ្ងៃទី ៣០ ខែ មិថុនា ឆ្នាំ ២០២២»។
របាយការណ៍នេះបានបន្ថែមថា៖ «លោក Setien គឺជាគ្រូបង្វឹកដែលមានបទពិសោធបំផុត ១ រូប នៅក្នុងកីឡាបាល់ទាត់នៅអេស្ប៉ាញ។ តាមរយៈអាជីពជាគ្រូបង្វឹកនេះ គាត់គឺជាអ្នកពូកែរៀបចំផែនការផ្នែកប្រយុទ្ធតែម្ដងដែលបានធ្វើឲ្យ អ្នកគាំទ្រចាប់អារម្មណ៍បំផុត»។
លោក Setien បានបង្ហាញខ្លួនក្នុងសន្និសីទកាសែតនៅកីឡដ្ឋាន Camp Nou កាលពីថ្ងៃអង្គារ ហើយការដឹកនាំការប្រកួតលើកដំបូងរបស់គាត់នឹងត្រូវធ្វើក្នុងទឹកដីខ្លួនឯងជាមួយក្រុម Granada នៅថ្ងៃអាទិត្យចុងសប្ដាហ៍នេះ។
ក្លិប Barcelona នឹងប្រកួតជាមួយក្រុម Napoli នៅវគ្គ ១៦ ក្រុមចុងក្រោយក្របខ័ណ្ឌ Champions League នៅខែក្រោយ និងជាមួយក្រុម Real Madrid ក្នុងលីក La Liga នៅដើមខែមីនា។
លោក Setien បានបង្ហាញពីការកោតសរសើររបស់គាត់ចំពោះទម្លាប់ដ៏ល្អរបស់ក្លិប Barcelona ដោយបុរសវ័យ ៦១ ឆ្នាំរូបនេះក៏ល្បីល្បាញចំពោះការបង្ហាញទម្រង់លេងគួរឲ្យចាប់អារម្មណ៍ផងដែរ។
អតីតកីឡាករនៅក្លិប Atletico Madrid និងក្លិប Racing Santander រូបនេះត្រូវបានតែងតាំងជាគ្រូបង្វឹកក្លិប Barcelona ដ៏មានសក្ដានុពលក្នុងអំឡុងពេលជោគជ័យបំផុតមួយក្នុងពេលដឹកនាំនៅក្រុម Real Betis។
លោក Setien បានដឹកនាំក្រុម Betis បានចំណាត់ថ្នាក់ទី ៦ ក្នុងឆ្នាំ ២០១៨ និងបានលេងនៅក្នុងក្របខ័ណ្ឌ Europa League ប៉ុន្តែទោះជាបានទទួលជ័យជម្នះ ៤-៣ នៅកីឡដ្ឋាន Camp Nou នៅដើមរដូវកាលមុនក៏ដោយ ក៏លទ្ធផលនៅតែត្រូវបានបញ្ចប់ដដែល។
ក្ដីមន្ទិលជុំវិញការបណ្ដេញលោក Valverde នេះបានកើតឡើងរយៈពេលជាច្រើនខែមកហើយ ក្រោយពីក្លិប Barcelona ធ្លាក់ក្នុងដំណើរការដណ្ដើមពានរង្វាន់ Champions League ចំនួន ២ លើក។
ការចាញ់យ៉ាងអាម៉ាស់របស់ក្លិបនេះក្រោមថ្វីជើងក្រុម Roma នៅឆ្នាំ ២០១៨ បានកើតឡើងស្របពេលគ្នានឹងបរាជ័យក្រោមថ្វីជើងក្រុម Liverpool កាលពីឆ្នាំមុនផងដែរ។
ចំណែកនៅរដូវកាលនេះវិញ ក្រុម Barcelona បានប្រកួតចាញ់ក្រុម Atletico Madrid ៣-២ ក្នុងការប្រកួតពានរង្វាន់ Super Cup របស់ប្រទេស អេស្ប៉ាញ កាលពីថ្ងៃព្រហស្បតិ៍ដែលពេលនោះពួកគេបានធ្វើឲ្យរបូត ២ គ្រាប់ចុងក្រោយ ដែលបានធ្វើឲ្យក្រុមប្រឹក្សានាយកបញ្ចេញប្រតិកម្មតបយ៉ាងខ្លាំងចំពោះគ្រាប់បាល់នោះ។
ក្នុងការដឹកនាំរបស់លោក Valverde រយៈពេល ២ រដូវកាលមកនេះ ក្រុមរបស់គាត់បានឈ្នះពានរង្វាន់ La Liga ២ លើក ព្រមទាំងពានរង្វាន់ Copa de Rey នៅឆ្នាំ ២០១៨ និងជ័យជម្នះលីកមួយទៀតដែលកំពុងតែសម្លឹងឃើញនៅរដូវកាលនេះផងដែរ បើទោះជាក្រុម Real Madrid កំពុងបង្ហាញទម្រង់លេងគួរឲ្យចាប់អារម្មណ៍ក្នុងរយៈពេលប៉ុន្មានសប្ដាហ៍ថ្មីៗនេះក៏ដោយ។
ប៉ុន្តែទម្រង់លេងរបស់ក្រុម Barcelona បាននិងកំពុងធ្លាក់ចុះបន្តិចដែលបង្កជាក្ដីកង្វល់ពីបច្ចេកទេសរបស់លោក Valverde ជាហេតុធ្វើឲ្យក្លិបនេះងាកទៅចាប់អារម្មណ៍ចំពោះលោក Setien តែម្ដង។
នៅពេលលោក Valverde ទៅដល់ក្លិប Barcelona នៅឆ្នាំ ២០១៧ ក្លិបនេះបានរងរបួសឈឺចាប់យ៉ាងខ្លាំងក្រោយពីមានការចាកចេញរបស់កីឡាករ Neymar ទៅចូលរួមនឹងក្រុម PSG ព្រមទាំងរងបរាជ័យជាបន្តបន្ទាប់ក្រោមថ្វីជើងរបស់ក្លិប Real ក្នុងការប្រកួតពានរង្វាន់អេស្ប៉ាញ Super Cup សម្រាប់រដូវកាលបន្ទាប់មកទៀត។
ប៉ុន្តែលោក Valverde បានជួយសង្គ្រោះនាវានេះព្រមទាំងបានសាងភាពខ្លាំងសម្រាប់ក្រុមនេះឲ្យមានភាពល្បីល្បាញមកទល់សព្វថ្ងៃ៕ AFP/SN