ក្រុងប្រាក៖ ក្លិប Barcelona នឹងស្វែងរកជ័យជម្នះជាប់ៗគ្នាលើកទី ៦ របស់ខ្លួននៅពេលពួកគេប្រកួតជាមួយក្រុម Slavia Prague ក្នុងក្របខ័ណ្ឌ Champions League ដែលជាជំនួបលើកដំបូងមិនធ្លាប់មាននៅយប់ថ្ងៃពុធនេះ។
ក្រុមរបស់លោក Ernesto Valverde គ្រូបង្វឹកក្លិប Barcelona ទើបបានឈ្នះក្រុម Eibar ក្នុងលទ្ធផល ៣-០ កាលពីថ្ងៃសៅរ៍ ជាមួយគ្រាប់បាល់ដែលរកបានដោយកីឡាករ Lionel Messi, Luis Suarez និង Antoine Griezmann។
ជ័យជម្នះក្នុងការប្រកួតប្រជែងលើកទី ៥ របស់ពួកគេរួមទាំងជ័យជម្នះ ២-១ ទៅលើក្រុម Inter Milan ក្នុងការប្រកួតចុងក្រោយសម្រាប់ក្របខ័ណ្ឌ Champions League ដែរនោះ បានធ្វើឲ្យពួកគេឈរនៅលើកំពូលតារាងក្របខ័ណ្ឌអេស្ប៉ាញ La Liga ដោយនាំមុខ ១ ពិន្ទុ ទៅលើក្រុម Real Madrid របស់លោក Zidane។
កាលពីសប្តាហ៍មុន ក្លិបធំទាំង ២ នៅប្រទេស អេស្ប៉ាញ នេះបានព្រមព្រៀងគ្នាធ្វើការពន្យារពេលការប្រកួតពានរង្វាន់ Clasico ដោយសារមានបញ្ហាចលាចលមួយពាក់ព័ន្ធនឹងការប្រកួតលីកកំពូលនេះនៅតំបន់ Catalonia ប្រទេស អេស្ប៉ាញ ដោយលើកពេលពីថ្ងៃសៅរ៍សប្ដាហ៍មុនទៅធ្វើការប្រកួតនៅខែធ្នូវិញ។
ចំណែកក្លិប Slavia ជាម្ចាស់ជើងឯកប្រចាំសាធារណរដ្ឋឆែក ទើបតែបានត្រឡប់មកពីការរកគ្រាប់បាល់ដោយបានឈ្នះក្រុម Pribram ៣-១ កាលពីថ្ងៃសៅរ៍ផងដែរ ដើម្បីបន្តនាំមុខក្រុមផ្សេងៗទៀត ៦ ពិន្ទុ នៅក្របខ័ណ្ឌកំពូលរបស់សាធារណរដ្ឋឆែក។
ដោយទើបតែប្រកួតបាន ២ លើកនោះ ក្រុម Barcelona ឥឡូវនេះឈរនៅលេខ ២ នៃពូល F ក្នុងក្របខ័ណ្ឌ Champions League ដោយមាន ៤ ពិន្ទុ ក្រោយពីបានឈ្នះក្រុម AC Milan និងលទ្ធផលសូន្យស្មើគ្នាជាមួយក្រុម Dortmund ដែលឈរនៅលើកំពូលតារាងក្នុងពូលនេះ ដោយខុសគ្នាតែ ១ គ្រាប់ប៉ុណ្ណោះ។
ចំណែកឯក្រុម Slavia វិញ គឺពួកគេឈរនៅបាតតារាងមានតែ ១ ពិន្ទុគត់ ក្រោយពីប្រកួតស្មើគ្នា ១-១ ជាមួយក្រុម Inter ក្នុងទីក្រុងមីឡានប្រទេស អ៊ីតាលី និងចាញ់ក្រុម Dortmund ២-០ ក្នុងទឹកដីខ្លួនឯង។
ក្រុម Barcelona បានធូរស្បើយពីទម្រង់លេងរបស់ពួកគេបន្ទាប់ពីបានប្រកួតឈ្នះក្រុម Eibar រួចហើយ ប៉ុន្តែពេលនេះពួកគេកំពុងបារម្ភពីការប្រកួតជាមួយក្រុម Slavia។
កីឡាករ Griezman បាននិយាយក្រោយពីការប្រកួតនេះថា៖ «យើងនឹងមានថ្ងៃល្អ ឬអាក្រក់បំផុត ប៉ុន្តែយើងនឹងស្គាល់ចិត្តគ្នាបន្តិចម្ដងៗ ហើយយើងនឹងស្គាល់គ្នាកាន់ខ្លាំងថែមទៀតនៅពេលប្រកួតគ្នា»។
ចំណែកលោក Valverde គ្រូបង្វឹកក្លិប Barcelona បាននិយាយថា៖ «កីឡាករឆ្នើមតែងតែយល់ចិត្តគ្នា និងតែងតែជួបគ្នា ហើយទីបំផុតគឺមានតែពេលវេលា និងការប្រកួតទេដែលអាចធ្វើឲ្យពួកគេស្គាល់គ្នាកាន់តែស៊ីជម្រៅថែមទៀត»។
នៅក្នុងជំនួបនៅរាត្រីថ្ងៃពុធនេះ ក្រុម Slavia កំពុងបង្កើនទំនុកចិត្តដោយគ្រូបង្វឹកលោក Jindrich Trpisovsky បានដាក់សម្ពាធឲ្យកូនក្រុមខិតខំបង្កើនការហ្វឹកហាត់ឲ្យបានកាន់តែខ្លាំង។
កាលពីរដូវកាលមុន ក្លិបនេះបានទម្លាក់ក្រុម Sevilla ចេញពីការប្រកួតពានអឺរ៉ុប មុនពេលពួកគេត្រូវបានទម្លាក់វិញដោយក្រុម Chelsea នៅវគ្គ ៨ ក្រុមចុងក្រោយ។
ខ្សែបម្រើការពារ Tomas Soucek ជាប្រធានក្រុម Slavia បាននិយាយថា៖ «យើងនឹងទៅទីលានប្រកួតដោយដឹងថា យើងអាចជោគជ័យ»។
ចំណែកអ្នកចាំទី Ondrej Kolar នៅក្លិប Slavia បានបន្ថែមថា៖ «យើងចង់បានយ៉ាងហោច ១ ពិន្ទុ នៅពេលយើងត្រូវប្រកួតជាមួយក្រុមធំមួយនេះ ហើយខ្ញុំជឿថា យើងនឹងផ្ដល់ឲ្យពួកគេនូវពេលវេលាដ៏លំបាកមួយនៅក្នុងទឹកដីរបស់យើងនេះ»៕ AFP/NS