ក្រុងវ៉ាស៊ីងតោនៈ កីឡាការិនីវាយកូនបាល់អូស្ត្រាលី Ashleigh Barty ដែលមានយុទ្ធនាការឆ្នាំ ២០១៩ ដ៏អស្ចារ្យជាមួយការគ្រងតំណែងជើងឯកពានរង្វាន់ French Open និងចំណាត់ថ្នាក់លេខ ១ ពិភពលោកនេះបានទទួលពានរង្វាន់កីឡាករឆ្នើមប្រចាំឆ្នាំ ២០១៩ ពីសមាគមវាយកូនបាល់ពិភពលោក (WTA) កាលពីថ្ងៃពុធ។
Barty គឺជាកីឡាការិនីអូស្ត្រាលីលើកទី១ដែលទទួលបានចំណាត់ថ្នាក់លេខ ១ ផ្នែកវាយកូនបាល់នារីតាំងពីអតីតកីឡាការិនី Evenne Goolagong Cawley ធ្លាប់បានបែបនេះនៅឆ្នាំ ១៩៧៦ ហើយរូបនាងបានទទួលពានរង្វាន់នេះជាមួយសំឡេងគាំទ្រតាមប្រព័ន្ធផ្សព្វផ្សាយសង្គមចំនួន ៨២ ភាគរយ។
យុទ្ធនាការនេះត្រូវបានបញ្ចប់យ៉ាងស័ក្តិសមបំផុតដោយបានឃើញកីឡាការិនី Barty ឈ្នះពានរង្វាន់ Grand Slam ជាលើកដំបូងរបស់រូបនាងនៅកីឡដ្ឋាន Roland Garros ប្រទេស បារាំង។
ពានរង្វាន់ចំនួន៤របស់កីឡាការិនី Barty សម្រាប់ឆ្នាំ ២០១៩ នេះ បានរួមបញ្ចូលទាំងពានរង្វាន់ WTA Finals ដ៏អស្ចារ្យដែលបានធ្វើឲ្យរូបនាងជាប់ចំណាត់ថ្នាក់ជាកីឡាការិនីឆ្នើមនៅចុងឆ្នាំនេះផងដែរ។
កីឡាការិនី Barty ដែលបានធ្វើដំណើរចូលរួមប្រកួតជាមួយជ័យជម្នះ៥៧លើកនោះបានជាប់ចំណាត់ថ្នាក់លេខ ១ កាលពីខែកញ្ញា និងបានបញ្ចប់រដូវកាលនេះជាមួយពិន្ទុជិត ២០០០ ដោយនាំមុខកីឡាការិនី Karolina Pliskova ដែលជាប់ចំណាត់ថ្នាក់ទី ២។
កីឡាការិនីអូស្ត្រាលីវ័យ ២៣ ឆ្នាំរូបនេះ បានចាប់ផ្ដើមរដូវកាលនេះជាមួយចំណាត់ថ្នាក់លេខ ១៥ នៅក្នុងពិភពលោក។
ស្របពេលនោះដែរគ្រូបង្វឹករបស់កីឡាការិនី Barty គឺលោក Craig Tyzzer ក៏ទទួលបានពានរង្វាន់គ្រូបង្វឹកវាយកូនបាល់ឆ្នើមប្រចាំឆ្នាំ ២០១៩ របស់សមាគមវាយកូនបាល់ពិភពលោកនេះផងដែរ។
នៅក្នុងការបោះឆ្នោតសម្រាប់ពានរង្វាន់នេះ កីឡាការិនី Barty បានទទួលសំឡេងគាំទ្រច្រើនជាងកីឡាការិនីផ្សេងទៀតដូចជាម្ចាស់ជើងឯក Grand Slam គឺកីឡាការិនីកាណាដា Bianca Andreescu កីឡាការិនី រ៉ូម៉ានី Simona Halep និងកីឡាការិនីជប៉ុន Naomi Osaka៕ AFP/SN