ក្រុងប៊ែរឡាំង: ក្រុមឡើងទម្រង់លេងវិញ Bayern Munich នឹងធ្វើដំណើរទៅកាន់ទឹកដីក្រុម Ajax សម្រាប់ការប្រកួតក្របខ័ណ្ឌ Champions League វគ្គចែកពូល នៅរាត្រីនេះ ដោយមានភាពច្បាស់លាស់រវាងកីឡាករជម្រើសដំបូង និងបម្រុងក្នុងក្រុមប្រជុំដោយតារាឆ្នើមៗមួយនេះ ក្រោយពីការសម្រេចចិត្តរបស់លោក Niko Kovac ក្នុងការបញ្ចប់ការផ្លាស់ប្តូរកីឡាករចុះឡើង។
ស្របពេល Bayern បានឈ្នះរាល់ការប្រកួត ៣ លើកចុងក្រោយរបស់ពួកគេ ក្រោយពីបានយកឈ្នះលើក្រុម Nuremberg ៣-០ កាលពីថ្ងៃសៅរ៍នោះ Leon Goretzka ដែលបច្ចុប្បន្នបង្ហាញខ្លួនជាទៀងទាត់ក្នុងតំបន់បម្រើកណ្តាល រួមជាមួយនឹង Joshua Kimmich បានឲ្យដឹងថា៖ «យើងចង់រក្សាការធ្វើដំណើរទៅមុខជានិច្ច»។
កីឡាកររូបនេះបានបន្ថែមទៀតថា៖ «បច្ចុប្បន្ន យើងធ្វើដំណើរទៅកាន់ទីក្រុង Amsterdam និងចង់បញ្ចប់ចំណាត់ថ្នាក់លេខ ១ ក្នុងពូល ដែលពិតជាសំខាន់ណាស់សម្រាប់យើង»។
Bayern ត្រូវការត្រឹមតែ ១ ពិន្ទុគត់នៅកីឡដ្ឋាន Johan Cruyff Arena របស់ក្រុម Ajax ដើម្បីបញ្ចប់ដោយឈរលេខ ១ ក្នុងពូល E ស្របពេលដែលក្រុមយក្សរបស់អាល្លឺម៉ង់មួយនេះ កំពុងតែនាំមុខលើកំពូលតារាង ដោយនាំមុខ ២ ពិន្ទុដាច់លើគូប្រជែងហូឡង់របស់ពួកគេហើយក្រុមទាំង ២ បានឈ្នះកៅអីទៅវគ្គ ១៦ ក្រុមចុងក្រោយរួចជាស្រេច។
ការដណ្តើមបានជ័យជម្នះ ៥-១ លើក្រុម Benfica នៅកីឡដ្ឋាន Allianz Arena កាលពី ២ សប្តាហ៍មុន ខណៈដែលខ្សែប្រយុទ្ធ Robert Lewandowski និង Arjen Robben សុទ្ធសឹងបានស៊ុតបាល់បញ្ចូលទី ២ គ្រាប់ដូចគ្នា ដើម្បីបញ្ចប់លទ្ធផលដ៏ត្រដាបត្រដួសនៅក្នុងខែតុលា និងវិច្ឆិកា ដែលបានធ្វើឲ្យក្រុម Bayern ដាំក្បាលចុះក្រោមនៅលើតារាងនៃក្របខ័ណ្ឌ Bundesliga។
បច្ចុប្បន្ន ក្រុម Bayern បានឡើងទៅឈរក្នុងចំណាត់ថ្នាក់លេខ ៣ នៅលើតារាងក្របខ័ណ្ឌលីកវិញ ហើយលោកគ្រូបង្វឹក Kovac បានធ្វើការប្រថុយប្រថានមួយ តាមរយៈការផ្លាស់ប្តូរកីឡាករចុះឡើងដើម្បីលុបចោលទស្សនៈនៃការពឹងផ្អែកទៅលើតែកីឡាករឆ្នើមៗ ខណៈដែលតារាឆ្នើមៗជាច្រើនបានស្ថិតជាកីឡាករបម្រុង។
លោក Kovac បានពន្យល់ថា៖ «ភាពស៊ីចង្វាក់គ្នាគឺស្ថិតនៅត្រង់ចំណុចនោះ។ កីឡាករកំពុងសម្របខ្លួន ដែលនោះជាមូលហេតុដែលយើងមិនចង់ផ្លាស់ប្តូរអ្វីទាំងអស់»។
ការសម្រេចចិត្តរបស់លោកបង្កើតឲ្យមានអ្នកឈ្នះ និងអ្នកចាញ់។ សមាជិកឈ្នះពាន World Cup ដូចជាខ្សែការពារអន្តរជាតិអាល្លឺម៉ង់ Mats Hummels និងខ្សែបម្រើអន្តរជាតិ អេស្ប៉ាញ Javi Martinez បានស្ថិតជាកីឡាករបម្រុងនៅពេលប្រកួតជាមួយនឹងក្រុម Nuremberg រួមជាមួយនឹងកីឡាករ Renato Sanches សមាជិកឈ្នះពាន Euro ឆ្នាំ ២០១៦។
Martinez និង Sanches បានជួបការប្រជែងជាមួយនឹងកីឡាករ Kimmich និង Goretzka ដែលមានវ័យ ២៣ ឆ្នាំដូចគ្នា និងបានស៊ុតបាល់ប៉ះរបារទីដូចគ្នាក្នុងពេលប្រកួតជាមួយនឹងក្រុម Nuremberg៕
Plzen v Roma-12:55អធាត្រ
Real v CSK-12:55អធាត្រ
Ajax v Bayern Munich-3ទៀបភ្លឺ
Benfica v AEK Athens-3ទៀបភ្លឺ
Man City v Hoffenheim-3ទៀបភ្លឺ
Shakhtar v Lyon-3ទៀបភ្លឺ
Valencia v Man Utd-3ទៀបភ្លឺ
Young Boys v Juventus-3ទៀបភ្លឺ៕