ក្រុងប៊ែរឡាំងៈ ប្រធានក្លិប Bayern Munich លោក Uli Hoeness បាននិយាយបន្ធូរបន្ថយស្ថានភាពនៃឱកាសចុះកុងត្រាទិញខ្សែបម្រើ Leroy Sane ពីក្លិប Man City ដោយអះអាងថាតម្លៃខ្លួនសម្រាប់ការនាំមកកីឡាករវ័យ ២៣ ឆ្នាំនេះទៅលេងនៅក្លិប Bayern Munich គឺថ្លៃខ្លាំងពេក។
កីឡាករ Sane នៅមិនទាន់បន្តកុងត្រារបស់គាត់ជាមួយក្លិប Man City នៅឡើយទេចំពេលមានពាក្យចចាមអារ៉ាមថា គាត់នឹងចុះកុងត្រាទៅលេងនៅក្លិប Bayern ដែលទើបតែគ្រងជាម្ចាស់ជើងឯកក្របខ័ណ្ឌអាល្លឺម៉ង់ Bundesliga ថ្មីៗនេះ។
ប៉ុន្តែលោក Hoeness បានប្រាប់ទស្សនាវដ្ដី Kicker ពីថ្ងៃចន្ទថា គាត់គិតថា ក្រុម Bayern Munich ទំនងជាមិនធានាឲ្យមានការចុះកុងត្រាជាមួយកីឡាករ Sane នេះទេ។
គាត់បាននិយាយថា៖ «ខ្ញុំនៅមានមន្ទិលសង្ស័យបនិ្តចបន្តួចដែលវាទំនងជាថា វានឹងមិនអាចទៅរួចទេ ខណៈយើងកំពុងជជែកពីចំនួនទឹកប្រាក់ដែលត្រូវចំណាយនោះមានចំនួនច្រើនពេក»។
កាលពីសប្ដាហ៍មុនកាសែត The Guardian បានរាយការណ៍ថា ក្រុម Man City បានបដិសេធការចរចារបស់ក្លិប Bayern ដែលសុំផ្ដល់តម្លៃខ្លួនសម្រាប់កីឡាករនេះចំនួនជាង ៨០ លានអឺរ៉ូស្មើនឹង ៨៩,៥ លានដុល្លារអាមេរិក។
ក្លិប Bayern បានចំណាយប្រាក់ចំនួន ៨០ លានអឺរ៉ូដើម្បីទិញយកខ្សែការពារសញ្ជាតិបារាំង Lucas Hernandez នៅដើមឆ្នាំនេះ ហើយនេះជាចំនួនទឹកប្រាក់ច្រើនបំផុតដែលលោក Hoeness បានអះអាងថានឹងមិនធ្វើឲ្យខូចអនាគតដ៏ខ្លីខាងមុខនេះទេ។
កុងត្រាបច្ចុប្បន្នរបស់កីឡាករ Sane នឹងមានរយៈពេលរហូតដល់ឆ្នាំ ២០២១ ហើយគ្រូបង្វឹកក្លិប Man City លោក Pep Guardiola បាននិយាយថា ក្លិបនេះចង់បន្តកុងត្រាដល់កីឡាករសញ្ជាតិអាល្លឺម៉ង់រូបនេះជាបន្តទៀត។
ក្នុងរយៈពេលប៉ុន្មានសប្ដាហ៍ថ្មីៗនេះ កីឡាករឆ្នើមៗមួយចំនួននៅក្នុងវិស័យបាល់ទាត់នៅប្រទេសអាល្លឺម៉ង់បានជំរុញឲ្យក្រុម Bayern ចុះកុងត្រាទិញយក Sane ឲ្យមកចូលលេងជាមួយពួកគេ។
វីរបុរសបាល់ទាត់ក្នុងក្រុម Bayern លោក Lothar Mattaeus បានអះអាងថា គាត់ហ៊ានធានាថាការដោះដូរសម្រាប់កីឡាករនេះនឹងកើតឡើងជាមិនខាន ហើយគ្រូបង្វឹកជម្រើសជាតិអាល្លឺម៉ង់លោក Joachim Loew បាននិយាយថា ការដោះដូរនេះនឹងល្អសម្រាប់គាត់ និងល្អសម្រាប់យើងផងដែរ»៕ SN