ក្រុងឡុងដ៍៖ កីឡាករ Bernardo Silva រកបាន ៣ គ្រាប់តែម្នាក់ឯង ខណៈក្រុម Man City បានទទួលជ័យជម្នះដ៏អស្ចារ្យបំផុតមិនធ្លាប់មានសម្រាប់ក្របខ័ណ្ឌ Premier League ជាមួយជ័យជម្នះ ៨-០ ទៅលើក្រុម Watford កាលពីថ្ងៃសៅរ៍។
កីឡាករ Bernado បានទទួលស្គាល់ថា ជ័យជម្នះដ៏អស្ចារ្យរបស់ក្រុម Man City ដឹកនាំដោយលោក Pep Guardiola ទៅលើក្រុម Watford នេះ បានកើតឡើងដោយសារពួកគេខឹងចិត្តយ៉ាងខ្លាំងចំពោះការចាញ់ក្រុម Norwich ៣-២ កាលពីសប្ដាហ៍មុន។
ជ័យជម្នះនេះ គឺជាស្នាដៃរបស់កីឡាករ Bernado រកបាន ៣ គ្រាប់ កីឡាករ Aguero រកបាន ១ គ្រាប់ កីឡាករ David បាន ១ គ្រាប់ កីឡាករ Nicolas បាន ១ គ្រាប់ដែរ ហើយ ១ គ្រាប់ទៀត ដោយកីឡាករ Mahrez និង ១ គ្រាប់ចុងក្រោយ ដោយកីឡាករ De Bruyne ក្នុងការប្រកួតនៅកីឡដ្ឋាន Etihad របស់ក្រុម Man City។
អ្វីដែលមិនគួរឱ្យជឿនោះគឺថា វាអាចកាន់តែអាក្រក់ទៅទៀតសម្រាប់ Watford ដែលគ្មានបាន ១ គ្រាប់ ទាល់តែសោះ ខណៈក្រុម Man City និងកីឡាករ Sergio Aguero បានខ្ជះខ្ជាយឱកាសជាច្រើនក្នុងការដណ្ដើមកំណត់ត្រារបស់ក្រុម Manchester Utd ដែលធ្លាប់បានឈ្នះ ៩-០ នៅក្នុងក្របខ័ណ្ឌ Premier League។
កីឡាករ Bernado បាននិយាយថា៖ «យើងមិនគួរឲ្យជឿសោះថា នៅក្នុងរយៈពេល ៣០ នាទីដំបូង យើងអាចរកបានគ្រាប់បាល់ច្រើនបែបនេះទាល់តែសោះ។ ក្រោយពីចាញ់ក្រុម Norwich យើងបានផ្ដល់ឲ្យអ្នកគាំទ្រនូវលទ្ធផល និងទម្រង់លេងជាទីគាប់ចិត្ត»។
កីឡាករ Bernado បានបន្ថែមថា៖ «យើងមានបំណងបន្តរកគ្រាប់បាល់ថែមទៀតនៅតង់ទី ២ ព្រោះយើងមិនចង់ឲ្យពួកគេធ្វើឲ្យយើងឈឺចាប់ ឬរកបានគ្រាប់បាល់តាមទាន់យើងទេ»។
កីឡាកររូបនេះបានបន្ថែមទៀតថា៖ «បាល់ទាត់គឺជាការប្រកួតលំបាកមួយ។ ថ្ងៃនេះយើងបានឈ្នះ ៨-០ ប៉ុន្តែយើងបានចាញ់ជាច្រើនលើកមកហើយ គឺ ៥ ឬ ៤ គ្រាប់»។
កីឡាករដដែលនេះបានបន្តថា៖ «វាជាការប្រកួតអស្ចារ្យមួយ ដើម្បីទទួលបាន ៣ ពិន្ទុ ក្រោយពីចាញ់ក្រុម Norwich ហើយខ្ញុំសប្បាយចិត្តបំផុតចំពោះការរកបាន ៣ គ្រាប់ ជាលើកដំបូងសម្រាប់ការប្រកួតក្នុងទឹកដីនៅក្នុងអាជីពរបស់ខ្ញុំនៅទីនេះ»។
ក្រុម Man City ឥឡូវកំពុងចាញ់ក្រុម Liverpool ២ ពិន្ទុ ក្នុង ៦ ប្រកួត ខណៈក្រុមរបស់លោក Jurgen Klopp គ្រូបង្វឹកក្រុម Liverpool នៅសល់ ១ ប្រកួតទៀត ដែលអាចនឹងនាំមុខ ៥ ពិន្ទុ ប្រសិនបើក្រុមនេះឈ្នះ ១ ប្រកួតទៀតមែននោះ។
កីឡាករ Bernado បាននិយាយថា៖ «ក្រុមទាំងអស់មានពេលវេលាល្អ និងអាក្រក់ ហើយលក្ខណៈដែលអ្នកប្រតិកម្មចំពោះពេលអាក្រក់ គឺជារឿងសំខាន់បំផុត។ ជាថ្មីម្ដងទៀត ក្រុមនេះបានបង្ហាញថា យើងចង់តស៊ូសម្រាប់ការលើកពាន Premier League និងពានផ្សេងៗទៀត»។
អ្នកចាំទី Ben Foster របស់ក្រុម Watford បាននិយាយថា ទម្រង់លេងរបស់ក្រុម Man City គឺល្អបំផុតដែលរូបគាត់មិនធ្លាប់ឃើញ និងជួបពីមុនមក ហើយនេះជាលទ្ធផលអាក្រក់បំផុតដែលក្រុម Watford មិនធ្លាប់ជួបក្នុងកម្រិតបាល់ទាត់អង់គ្លេសផងដែរ។
អ្នកចាំទី Foster បាននិយាយថា៖ «វាប្រហែលអាចជាការព្រួយបារម្ភ និងអាម៉ាស់មុខបន្តិច ដែលធ្វើឲ្យខ្លួនឯងអាម៉ាស់មុខនៅថ្ងៃនេះ»។
អ្នកចាំទីរូបនេះបានបន្ថែមទៀតថា៖ «ក្នុងនាមជាអ្នកចាំទីដែលធ្លាប់ប្រកួតជាមួយក្រុម Man City និង Liverpool ប្រសិនបើអ្នកធ្វើឲ្យបាល់ចូលទី ៥ គ្រាប់ ក្នុង ២០ នាទីដំបូង អ្នកនឹងព្រួយបារម្ភបំផុតព្រោះអ្នកគិតថា នេះជាគ្រាប់បាល់ច្រើនបំផុត ហើយក្រុមទាំង ២ នេះ គឺជាក្រុមល្អបំផុតដែលខ្ញុំមិនធ្លាប់ជួបពីមុនមកនោះទេ»៕ AFP/SN