ក្រុងសូជី: ខ្សែប្រយុទ្ធ Edinson Cavani បានស៊ុតបាល់បញ្ចូលទី២គ្រាប់ ខណៈដែលក្រុមបាល់ទាត់ជម្រើសជាតិអ៊ុយរូហ្គាយ បានកម្ទេចក្តីសុបិនក្នុង World Cup របស់ Cristiano Ronaldo តាមរយៈការដណ្តើមបានជ័យជម្នះក្នុងលទ្ធផល ២-១ លើក្រុមជម្រើសជាតិព័រទុយហ្គាល់ ក្នុងទីក្រុង Sochi កាលពីថ្ងៃសៅរ៍។
Cavani ដែលលេងឲ្យក្លិប Paris Saint-Germain បានរកគ្រាប់បាល់ឈ្នះកោងបំប៉ោងសំណាញ់ទីយ៉ាងល្អនៅនាទី ទី៦២ ដើម្បីកាត់សេចក្តីក្នុងការប្រកួតវគ្គ១៦ក្រុមចុងក្រោយ និងជួយឲ្យក្រុមជម្រើសជាតិអ៊ុយរូហ្គាយ ឈានទៅជួបក្រុមជម្រើសជាតិបារាំង ក្នុងវគ្គ៨ក្រុមចុងក្រោយនៅថ្ងៃសុក្រនេះ។ Cavani បានជួយឲ្យអ៊ុយរូហ្គាយ មាននាំគ្រាប់បាល់នាំមុខមុននៅដើមតង់ទី១ នៅមុនពេល Pepe តែតបាល់រកគ្រាប់បាល់តាមស្មើសម្រាប់ព័រទុយហ្គាល់ នៅនាទី ទី៥៥ ក្នុងការប្រកួតដ៏រំភើបមួយ។
គ្រាប់បាល់របស់ Pepe គឺជាគ្រាប់បាល់ទី១ដែលក្រុមរបស់អាមេរិកខាងត្បូងមួយនេះ បានរបូត ក្នុងយុទ្ធនាការនេះ ប៉ុន្តែ ពួកគេបានការពារយ៉ាងរឹងមាំ បន្ទាប់ពីគ្រាប់បាល់នោះ និងកំពុងតែបង្ហាញថា ពួកគេគឺជាគូប្រជែងដ៏ខ្លាំងក្នុងការឈានទៅវគ្គកាន់តែជ្រៅ នៅរុស្ស៊ី។
ការបារម្ភតែមួយសម្រាប់ក្រុមរបស់លោក Oscar Tabarez គឺបញ្ហារបួសរបស់ Cavani ដែលនាំឲ្យមានសំណួរមួយទៅលើភាពរឹងមាំរបស់គេសម្រាប់វគ្គ៨ក្រុមចុងក្រោយ ជាមួយនឹងបារាំង ក្នុងទីក្រុង Nizhny Novgorod។
ក្រោយពីការបង្ហាញពីទម្រង់លេងយ៉ាងល្អ មុននឹងសម្តែងនូវសុទិដ្ឋិនិយមរបស់គេជុំវិញឱកាសនៃការវិលទៅរកភាពរឹងមាំវិញ ដើម្បីទៅជួបក្រុមបារាំង Cavani បានឲ្យដឹងថា៖ «យើងពិតជាមានមោទនភាពណាស់ និងរីករាយ។ វាជាថ្ងៃដ៏ពិសេសមួយ»៕ IS