ក្រុងឡុងដ៍: ក្រុម Chelsea បានធ្វើឲ្យម្ចាស់ជើងឯក Manchester City រងបរាជ័យជាលើកទី ១ ក្នុងការប្រកួតក្របខ័ណ្ឌ Premier League នៅរដូវកាលនេះ តាមរយៈការដណ្តើមបានជ័យជម្នះក្នុងលទ្ធផល ២-០ នៅកីឡដ្ឋាន Stamford Bridge ដើម្បីអនុញ្ញាតឲ្យក្រុម Liverpool ឡើងទៅឈរនៅលើកំពូលតារាង កាលពីថ្ងៃសុក្រ។
N''Golo Kante និង David Luiz បានរកគ្រាប់បាល់បំប៉ោងសំណាញ់ទីសម្រាប់ក្រុម របស់លោក Maurizio Sarri ខណៈដែល Man City បានជួបការខកចិត្តដោយសារតែការមិនអាចដណ្តើមយកប្រៀបផ្សេងៗទៅលើការគ្រប់គ្រងបាល់ជាច្រើនក្នុងតង់ទី ១។
លោក Sarri គ្រូបង្វឹកនៃក្រុម Chelsea បានឲ្យដឹងថា៖ «ខ្ញុំពិតជារីករាយណាស់ជាមួយនឹងជ័យជម្នះនេះ ពីព្រោះវា មិនងាយស្រួលឡើយក្នុងការយកឈ្នះពេលជួបក្រុម Manchester City ឬលោក Pep Guardiola»។
បច្ចុប្បន្ន Liverpool នាំមុខក្រុម Man City ១ ពិន្ទុ ក្រោយពីការស៊ុតបាល់បញ្ចូលទី ៣ គ្រាប់របស់តារាឆ្នើមអន្តរជាតិអេហ្ស៊ីប Mohamed Salah បានជួយឲ្យពួកគេដណ្តើមបានជ័យជម្នះយ៉ាងកក់ក្តៅក្នុងលទ្ធផល ៤-០ នៅលើទឹកដីក្រុម Bournemouth។
Man City បានស្ថិតក្នុងទម្រង់លេងដ៏រឹងមាំក្នុងរយៈពេលប៉ុន្មានសប្តាហ៍ចុងក្រោយនេះ តាមរយៈការឈ្នះរាល់ការប្រកួតទាំង ៧ លើកចុងក្រោយរបស់ខ្លួននៃក្របខ័ណ្ឌ Premier League និងបានចាប់ផ្តើមការប្រកួតកាលពីថ្ងៃសៅរ៍ ទាំងការជឿជាក់ដូចគ្នា។
ទោះបីជាយ៉ាងណា ក្រុមរបស់លោក Pep Guardiola បានអវត្តមានខ្សែប្រយុទ្ធ Sergio Aguero ខណៈដែល Raheem Sterling និង Leroy Sane បានខ្ជះខ្ជាយឱកាសជាច្រើន។
លោក Guardiola បានឲ្យដឹងថា៖ «Chelsea ជាក្រុមដ៏ខ្លាំងមួយ និងមានកីឡាករឆ្នើមៗជាច្រើន ប៉ុន្តែ ក្នុងតង់ទី ១ វាជារឿងដែលមិនគួរឲ្យជឿ យើងបានលេងយ៉ាងល្អ។ ជាទូទៅ យើងបានលេងយ៉ាងល្អ។ ខ្ញុំមិនមានការសោកស្តាយច្រើនឡើយ។ យើងបានមកទីនេះ និងបានបង្ហាញពីទម្រង់លេងដែលយើងចង់ឈ្នះ»។
គ្រូបង្វឹករូបនេះបានបន្ថែមទៀតថា៖ «យើងបានបង្កើតឱកាសជាច្រើន។ ពួកគេមានឱកាសតែ ១ លើកនៅនាទី ទី ៤៤ ហើយយើងបានរបូតគ្រាប់បាល់ ១ គ្រាប់ ដែលពេលខ្លះវានឹងកើតឡើង»។
Chelsea មិនបានបង្ហាញពីទម្រង់លេងដ៏មុតស្រួចឡើយក្នុងតង់ទី ១ នៅមុនពេលគ្រាប់បាល់នាំមុខនៅជិតបញ្ចប់តង់ទី ១ នៅពេលដែល Eden Hazard បានបញ្ជូនបាល់ទៅឲ្យ Kante ដើម្បីរកគ្រាប់បាល់បំប៉ោងសំណាញ់ទី។
ប៉ុន្តែ ក្រុមម្ចាស់ផ្ទះ Chelsea បានបង្ហាញពីទម្រង់លេងដ៏រឹងមាំក្នុងតង់ទី ២ និងបានបំពេញជ័យជម្នះរបស់ខ្លួននៅរយៈពេល ១២ នាទីចុងក្រោយ នៅពេលដែលការតែតបាល់របស់ Luiz ពីការទាត់បាល់ចេញពីជ្រុងរបស់ Hazard បានចូលទីយ៉ាងល្អ។
លោក Sarri បានបន្ថែមទៀតថា៖ «វាពិតជាលំបាកណាស់សម្រាប់យើង ក្នុងការស្វែងរកការលើកទឹកចិត្តខ្លួនឯង ប៉ុន្តែ នៅពេលដែលយើងមានការលើកទឹកចិត្តខ្លួនឯង យើងពិតជាក្រុមដ៏ខ្លាំងមួយ»៕
ជាមួយគ្នានេះ ក្រុម Arsenal ក៏ដណ្តើមបានជ័យជម្នះផងដែរ តាមរយៈការយកឈ្នះលើក្រុម Huddersfield ក្នុងលទ្ធផល ១-០៕