ក្រុងឡុងដ៍ៈ ក្រុមតោខៀវ Chelsea បានចោទក្រុម Burnley ថាបានអូសបន្លាយពេលវេលានៃការប្រកួតក្រោយពីគ្រូបង្វឹកសញ្ជាតិប្រេស៊ីលរបស់ក្រុមមួយនេះគឺលោក Maurizio Sarri ត្រូវបានគេបណ្ដេញចេញពីកៅអីរបស់គាត់នៅមុនពេលមានការប៉ះទង្គិចគ្នាតិចតួចជុំវិញការឆ្លងដែនកំណត់ ដែលធ្វើឲ្យប៉ះពាល់ដល់លទ្ធផលចុងក្រោយស្នើគ្នា ២-២ កាលពីថ្ងៃចន្ទ។
ជុំវិញការប្រកួតរវាងក្រុមទាំង ២ នេះក្រុមភ្ញៀវ Burnley បាននាំមុខ ១ គ្រាប់ទៅលើក្រុមម្ចាស់ផ្ទះ Chelsea នៅនាទីទី ៨ ប៉ុន្តែក្រុមម្ចាស់ផ្ទះបានតាមស្មើក្រុមភ្ញៀវវិញនៅនាទីទី ១២ ដោយកីឡាករ N''Golo Kante ហើយកីឡាករ Gonzalo Higuain រកបាន ១ គ្រាប់ទៀតធ្វើឲ្យក្រុមតោខៀវនាំមុខវិញម្ដង ប៉ុន្តែនៅនាទីទី ២៤ កីឡាករ A. Barnes រកបាន ១ គ្រាប់វិញធ្វើឲ្យលទ្ធផលប្រកួតរវាងក្រុមទាំង ២ នេះស្មើគ្នា ២-២។
ប្រសិនបើគ្មានការឈ្នះក្នុងការប្រកួតលីក ២ លើកចុងក្រោយនោះទេ ក្រុមតោខៀវ Chelsea នឹងមានឱកាសតិចតួចបំផុតក្នុងការបន្តឈរនៅចំណាត់ថ្នាក់ទី ៤ នៃក្របខ័ណ្ឌ Premier league ដោយសារក្រុមនេះមានតែ ១ ពិន្ទុនាំមុខក្រុម Arsenal ដែលឈរនៅចំណាត់ថ្នាក់លេខ ៥ ជាមួយការនៅសល់ ១ ប្រកួតទៀតនៅក្នុងដៃ ហើយថែមទាំងឈរនៅថ្នាក់ក្រោមក្រុម Tottenham ដែលស្ថិតនៅចំណាត់ថ្នាក់លេខ ៣។
ប្រសិនបើក្រុម Chelsea ឈ្នះការប្រកួតលើកនេះក្រុមនេះនឹងបានឡើងទៅឈរនៅលេខ ៣ ប៉ុន្តែវាហួសពេលទៅហើយ ខណៈក្រុមនេះមាន ១ ប្រកួតលើសក្រុមដែលកំពុងប្រជែងយកកំពូលតារាងទាំង ៤ មានដូចជាក្រុម Tottenham ក្រុម Arsenal ក្រុម Man United ដែលចាញ់ក្រុម Chelsea ៣ ពិន្ទុ និងស្ថិតនៅចំណាត់ថ្នាក់លេខ ៦។
នៅមុនការប្រកួត Chelsea ត្រូវបានគេមើលឃើញថា មានឱកាសខ្ពស់ក្នុងការឈរនៅ Top4 យ៉ាងរឹងមាំបន្ទាប់ពីក្រុម Tottenham ,Arsenal និង Man United សុទ្ធចាញ់ដូចគ្នានោះ ប៉ុន្តែ Chelsea បែរជាមិនអាចរកបានគ្រាប់បាល់បន្ថែមទៀតជាមួយពេលវេលានៅសល់ក្នុងការយកឈ្នះក្រុម Burnley។
ប៉ុន្តែនៅក្នុងជំនួបនេះលោក Sarri ត្រូវបានគេបណ្ដេញចេញពីកន្លែងអង្គុយរបស់គាត់ឲ្យទៅអង្គុយខាងក្រៅជាមួយអ្នកទស្សនា ឬអ្នកគាំទ្រវិញដោយសារគាត់បានតវ៉ានៅរយៈពេលប៉ុន្មានវិនាទីចុងក្រោយមុនពេលសមាជិកក្រុមតោខៀវមួយចំនួនមានការប៉ះទង្គិចគ្នាជាមួយក្រុម Burnley ដោយបានបំពានតំបន់ដែនកំណត់។
លោក Gianfranco Zola ជំនួយការរបស់លោក Sarri បាននិយាយថាប្រធានរបស់គាត់រំជួលចិត្តមែនទែននៅក្រោយការប្រកួតនេះដែលគាត់មិនអាចបំពេញភារកិច្ចនៅចំពោះមុខប្រព័ន្ធផ្សព្វផ្សាយ។
លោក Zola បាននិយាយថា៖ «គាត់ពិតជាសោកស្ដាយណាស់ ព្រោះគាត់បានឮពាក្យមិនល្អចេញពីសមាជិកក្រុម Burnley ចំពោះរូបគាត់។ ហេតុផលតែ ១ គត់ដែលគាត់បានដើរទៅទីនោះគឺដើម្បីបញ្ជាឲ្យកូនក្រុមយើងស្ថិតនៅទីតាំងរបស់ខ្លួន ហើយក៏ជាការជួយដល់អាជ្ញាកណ្ដាលផងដែរ»។
លោក Zola បានបន្ថែមថា៖ «យើងមិនសប្បាយចិត្តទេចំពោះការលេងអូសបន្លាយពេលវេលាបែបនេះ។ ការចំណាយពេល ៥ នាទីសម្រាប់របួសគឺមិនគ្រប់គ្រាន់ទេក្នុងការពិនិត្យមើលរបួសនោះ ហើយយើងមិនអាចទ្រាំក្នុងការមិនបញ្ចេញសំឡេងនោះទេ»។
លោកបានបន្តទៀតថា៖ «យើងរំពឹងថា នេះជាការប្រកួតមួយដ៏ស្វិតស្វាញ ប៉ុន្តែយើងមិននឹកស្មានថាមានការខ្ជះខ្ជាយពេលវេលាដូច្នេះទេ។ យើងរំពឹងថា អាជ្ញាកណ្ដាលគឺលោក Kevin Friend នឹងបន្ថែមម៉ោងចុងក្រោយច្រើន ប៉ុន្តែវាមិនដូច្នោះទេជាហេតុធ្វើឲ្យយើងមិនសប្បាយចិត្តទាល់តែសោះ»៕ SN