ក្រុងបាគូៈ កីឡាករ Eden Hazard បានជួយបង្កើតរាត្រីមួយអបអរសាទរក្រុមតោខៀវ Chelsea ដែលលើកពាន Europa League នៅទីក្រុងបាគូ ខណៈកីឡាករសញ្ជាតិបែលហ្ស៊ិករូបនេះបញ្ជាក់ថានេះប្រហែលជាការប្រកួតចុងក្រោយរបស់គាត់សម្រាប់ក្លិបនេះ។
ជុំវិញការប្រកួតជោគជ័យរបស់ក្រុមតោខៀវនេះ កីឡាករ Olivier Giroud ជាអ្នករកបាន ១ គ្រាប់មុនគេនៅនាទីទី ៤៩ ហើយកីឡាករ Pedro Rodriguez រកបាន ១ គ្រាប់ទៀតនៅនាទីទី ៦០ មុនពេលកីឡាករ Hazard រកបាន ២ គ្រាប់គឺគ្រាប់ទី ១ នៅនាទីទី ៦៥ ដោយការស៊ុតបាល់ពិន័យ ១១ ម៉ែត្រ និង ១ គ្រាប់ទៀតនៅនាទីទី ៧២ ក្រោយពីក្រុម Arsenal រកបាន ១ គ្រាប់ដោយកីឡាករ A. Iwobi នៅនាទីទី ៦៩ ធ្វើឲ្យក្រុមតោខៀវឈ្នះក្រុមកាំភ្លើងធំ ៤-១ ក្នុងវគ្គផ្ដាច់ព្រ័ត្រ Europa League ។
ក្រុមតោខៀវរបស់លោក Maurizio Sarri បានលើកពាន Europa League ជាលើកទី ២ នៅក្នុងរយៈពេល ៧ ឆ្នាំដែលកីឡាករ Hazard បានលេងនៅក្លិបនេះ។
ក្លិបនេះនឹងមានឱកាសលេងនៅក្របខ័ណ្ឌ Champions League នៅរដូវក្រោយជាពេលដែលគេរំពឹងថាខ្សែបម្រើប្រយុទ្ធ Hazard នឹងពាក់អាវរបស់ក្រុម Real Madrid នៅពេលនោះ។
ខ្សែបម្រើប្រយុទ្ធរូបនេះបានប្រាប់បណ្ដាញ BT Sport ក្រោយពីការប្រកួតនេះថា៖ «ខ្ញុំបានសម្រេចចិត្តរួចហើយ ហើយឥឡូវខ្ញុំនឹងរង់ចាំមើលក្លិបទាំង ២ នេះ។ ខ្ញុំគិតថាវាដល់ពេលត្រូវលាគ្នាហើយ ប៉ុន្តែក្នុងការប្រកួតគឺយើងមិនដែលស្គាល់គ្នាទេ»។
កីឡាករវ័យ ២៨ ឆ្នាំដែលនឹងត្រូវផុតកុងត្រាជាមួយក្លិបតោខៀវនៅឆ្នាំក្រោយនេះមានទំនាក់ទំនងជាមួយក្រុម Madrid យូរមកហើយដែលគេរំពឹងថា គាត់អាចនឹងមានតម្លៃខ្លួនចំនួន ១០០ លានអឺរ៉ូស្មើនឹង ១១១ លានដុល្លារអាមេរិកនៅក្នុងតំបន់ចាយប្រាក់អឺរ៉ូនេះ។
កីឡាករឆ្នើមរូបនេះបានបន្តថា៖ «ក្ដីសុបិនរបស់ខ្ញុំគឺលេងនៅក្របខ័ណ្ឌ Premier League ហើយឥឡូវខ្ញុំសម្រេចក្ដីសុបិននោះហើយដោយលេងនៅក្លិបធំបំផុតមួយ ដូច្នេះវាប្រហែលជាដល់ពេលសម្រាប់បទពិសោធថ្មីមួយទៀតហើយ»។
ក្លិប Chelsea បានដឹងហើយថាពេលវេលានេះបានមកដល់ហើយ ប៉ុន្តែវាជាក្ដីកង្វល់ធំមួយសម្រាប់ក្លិបដែលកំពុងប្រឈមនឹងបម្រាមរបស់សហព័ន្ធ FIFA ដែលបានដាក់ទៅលើកីឡាករជាប់កុងត្រាមួយចំនួននៅក្នុងការបើកទីផ្សារដោះដូរ កីឡាករ ២ លើកទៀត ដោយរង់ចាំការប្ដឹងជំទាស់ទៅតុលាការមជ្ឈត្តិកម្មកីឡាជាមុនសិន។
កីឡាករ Giroud បាននិយាយថា៖ «ខ្ញុំមានទំនាក់ទំនងពិសេសជាមួយគាត់ទាំងនៅលើទីលានប្រកួត និងក្រៅទីលានព្រោះគាត់ជាមិត្តរួមក្រុមម្នាក់។ ខ្ញុំពិតជាសប្បាយចិត្តណាស់ចំពោះគាត់ និងអនាគតរបស់គាត់»។
កីឡាកររូបនេះបានបន្ថែមថា៖ «គាត់សមនឹងទទួលបានបែបនេះក្រោយពីបានចូលរួមនឹងក្លិប Chelsea រយៈពេល ៧ ឆ្នាំប្រកបដោយភាពស្មោះត្រង់រួចមក ហើយគាត់សមនឹងទទួលបានបទពិសោធថ្មីថែមទៀត»។
Hazard ឥឡូវនេះនឹងសង្ឃឹមបន្តស្វែងរកជ័យជម្នះនៃក្របខ័ណ្ឌ Champions League ដែលក្រុម Chelsea បានលើកពាននេះនៅឆ្នាំ ២០១២ មុនពេលចុះកុងត្រាទិញយកគាត់ពីក្លិប Lille ហើយនៅពេលស្ថិតនៅទីក្រុងឡុងដ៍ Hazard បានឈ្នះពាន Premier League ចំនួន ២ ដង ពាន FA Cup ១ ដង និងពាន League Cup ១ ដងព្រមទាំងពាន Europa League ចំនួន ២ ដងផងដែរ។
លោក Sarri គ្រូបង្វឹកក្លិប Chelsea បាននិយាយថា៖ «ខ្ញុំដឹងរួចហើយថា ជាការពិត Hazard ចង់ចាកចេញពីក្លិបនេះ ប៉ុន្តែដូចខ្ញុំបាននិយាយនៅគ្រប់សន្និសីទព័ត៌មានហើយថា ខ្ញុំចង់គោរពការសម្រេចចិត្តរបស់គាត់»៕ SN