.jpg)
លោក Klopp គ្រូបង្វឹកក្លិប Liverpool និងលោក Guardiola គ្រូបង្វឹកក្លិប Man City។ រូបថត AFP
ក្រុងឡុងដ៍ៈ ក្លិប Man City បានសម្លឹងឃើញពាន Premier League ជាចម្បងនៅពេលពួកគេបានចាប់ផ្ដើមការពារខ្សែក្រវាត់របស់ខ្លួនពីចុងសប្ដាហ៍នេះ ប៉ុន្តែនៅពេលក្លិប Liverpool ខកចិត្តចំពោះការមិនឈ្នះពាននេះ ពួកគេនឹងពង្រឹងសមត្ថភាពថែមទៀត ដើម្បីឈ្នះពានដ៏សំខាន់របស់អង់គ្លេសមួយនេះ។
បង្គោលខៀវក្លិប Man City ជាម្ចាស់ជើងឯក Premier League ឆ្នាំនេះកំពុងមានសមត្ថភាព និងឥទ្ធិពលខ្លាំងដែលគេមិនធ្លាប់ឃើញតាំងពីក្លិប Man Utd បានឈ្នះពាននេះ ៣ លើកជាប់ៗគ្នាចាប់ពីឆ្នាំ ២០០៧ ដល់ឆ្នាំ ២០០៩។
ប៉ុន្តែបង្គោលក្រហមក្លិប Liverpool ជាម្ចាស់ជើងឯកអឺរ៉ុបដែលកំពុងតាមលើកពានកំពូលក្នុងស្រុកមួយនេះឲ្យបានម្ដងតាំងពីឆ្នាំ ១៩៩០ នោះ បានមានឱកាសជិតនឹងបានបញ្ចប់ការគ្រងតំណែងរបស់លោក Pep Gaurdiola ជាគ្រូបង្វឹកក្លិប Man City រហូតដល់ថ្ងៃចុងក្រោយនៃរដូវកាលដែលទើបតែបញ្ចប់នេះទៅហើយ។
ការប្រកួតនៅព្រឹត្តិការណ៍ Community Shield ពីថ្ងៃទី ៤ ខែសីហានោះ បានបង្ហាញពីភាពជាសត្រូវនឹងគ្នាកាន់តែខ្លាំងឡើងក្នុងចំណោមក្លិបថ្មីៗលេងនៅលីករបស់អង់គ្លេសនេះដោយក្លិប Man City បានឈ្នះក្រុម Liverpool ដោយការស៊ុតបាល់ប៉េណាល់ទីក្រោយពីប្រកួតស្មើគ្នា ១-១ ក្នុងការប្រកួត ៩០ នាទីរួចមក។
ការបន្ថែមកីឡាករ Rodri មកពីក្លិប Atletico ក្នុងតម្លៃខ្លួនថ្លៃបំផុតរហូតដល់ ៦៣ លានផោនស្មើនឹង ៧៧ លានដុល្លារនោះបានធ្វើឲ្យលោក Guardiola កាន់តែអាម៉ាស់មុខថែមទៀតចំពោះការហ៊ានចំណាយប្រាក់ច្រើនបែបនេះ។
ជាមួយការឈ្នះពានសំខាន់ៗចំនួន ៥ នៅរយៈពេល ២ រដូវកាលកន្លងមកនេះរួមទាំងការគ្រងជាម្ចាស់ក្របខ័ណ្ឌ Premier League ដែរនោះ ក្លិប Man City បានក្លាយជាក្លិបទី ២ ដែលបានឈ្នះពានកំពូលរបស់អង់គ្លេសចំនួន ៣ លើកក្នុងរយៈពេល ៣៥ ឆ្នាំមកនេះបន្ទាប់ពីក្លិប Man Utd ដែលបានឈ្នះពាននេះចំនួន ២ ដង។
លោក Guardiola គឺជានិស្សិតផ្នែកប្រវត្តិសាស្ត្របាល់ទាត់ និងទទួលបានភាពអស្ចារ្យនៅក្លិប Man City ដូច្នេះហើយឱកាសដើម្បីបង្កើនសក្តានុពលរបស់ក្រុមនេះឲ្យសមជាក្លិបអស្ចារ្យគ្រប់ពេលនៅអង់គ្លេសនោះគឺមិនអាចគ្មានបុរសជាតិអេស្ប៉ាញនេះបានឡើយ។
ទោះជាក្រុម Man City មិនដែលបានឈ្នះពានក្របខ័ណ្ឌ Champions League ក៏ដោយប៉ុន្តែលោក Guardiola បាននិយាយថាការឈ្នះពានក្នុងស្រុកនៅតែជាឆន្ទៈចម្បងរបស់លោកដដែល។
លោក Guardiola បាននិយាយថា៖ «ដើម្បីរក្សាសុខភាព និងយកចិត្តទុកដាក់ចំពោះក្រុមនោះ រឿងសំខាន់បំផុតនោះគឺក្របខ័ណ្ឌ Premier League ប៉ុន្តែនៅពេលយើងបានពាននេះកាន់តែច្រើន យើងនឹងខិតកាន់តែឈានជិតដល់ការលើកពាន Champions League»។
វានឹងកាន់តែភ្ញាក់ផ្អើលថែមទៀតប្រសិនបើក្លិប Liverpool មិនអាចយកឈ្នះក្លិប Man City ជាថ្មីម្ដងទៀតក្រោយពីពួកគេបានចាញ់ម្ដងមកហើយកាលពីរដូវកាលទើបបញ្ចប់ទៅនេះបើទោះជាពួកគេបានឈ្នះពានអឺរ៉ុបលើកទី ៦ ក៏ដោយ។
ទោះជាក្លិប Liverpool មានកីឡាករមានទេពកោសល្យច្រើនក៏ពិតមែន ប៉ុន្តែខ្សែបម្រើនៅក្លិបនេះ Georginio Wijnaldum បានទទួលស្គាល់ថាការចាប់ផ្ដើមឲ្យបានលឿនបំផុតគឺសំខាន់ណាស់ក្នុងការទប់ស្កាត់ក្លិប Man City កុំឲ្យឡើងដល់កំពូលតារាងបាន។
ខ្សែបម្រើរូបនេះបាននិយាយថា៖ «អ្នកគ្រាន់តែប្រមូលពិន្ទុឲ្យបានច្រើនតាមតែអាចធ្វើបានជាពិសេសនៅពេលចាប់ផ្ដើមការប្រកួតនេះតែម្ដង និងព្យាយាមបង្កើតក្រុមមួយដែលមានសមត្ថភាពកាន់តែល្អប្រសើរជាងមុននៅចុងរដូវកាលនេះ»។
កីឡាករ Wijnaldum បានបន្ថែមថា៖ «យើងអាចព្យាយាមលេងឲ្យកាន់តែល្អជាងរដូវកាលមុន ជាពិសេសនៅពេលចាប់ផ្ដើមការប្រកួតតែម្ដងពីព្រោះឥឡូវនេះយើងបានជួបជុំគ្នាល្អណាស់»។
សម្រាប់ការប្រកួតបើករដូវកាលថ្មី Premier League កាលពីថ្ងៃសៅរ៍ Liverpool ឈ្នះក្រុមថ្មី Norwich ៤-១ ហើយ Man City ឈ្នះ West Ham ៥-០៕ SN
