.jpg)
លោក Unai Emery (ស្ដាំ) កំពុងហ្វឹកហាត់កូនក្រុមរបស់គាត់នៅមុនពេលប្រកួតវគ្គផ្ដាច់ព្រ័ត្រ។ រូប AFP
ក្រុងឡុងដ៍ៈ រដូវកាលដំបូងរបស់លោក Unai Emery គ្រូបង្វឹកនៅក្លិបកាំភ្លើងធំ Arsenal នឹងត្រូវបានវិនិច្ឆ័យតាមរយៈលទ្ធផលឈ្នះ ឬបរាជ័យនៃការប្រកួតវគ្គផ្ដាច់ព្រ័ត្រក្របខ័ណ្ឌ Europa League ជាមួយក្រុមតោខៀវ Chelsea នាយប់រំលងអធ្រាត្រថ្ងៃពុធនេះ ស្របពេលគ្រូបង្វឹកសញ្ជាតិអេស្ប៉ាញរូបនេះមានទម្លាប់ស្ដារមុខមាត់គាត់នៅក្នុងការប្រកួតក្របខ័ណ្ឌកម្រិតទី ២ របស់អឺរ៉ុបមួយនេះតែម្តង។
លោក Emery បានដឹកនាំក្រុមរបស់ខ្លួនឲ្យបានលើកពាន Europa League រយៈពេល ៣ ឆ្នាំគឺចន្លោះពីឆ្នាំ ២០១៤ ដល់ឆ្នាំ ២០១៦ នៅពេលដឹកនាំក្រុម Sevilla ហើយគាត់នឹងក្លាយជាគ្រូបង្វឹកគួរឲ្យចាប់អារម្មណ៍បំផុតក្នុងប្រវត្តិប្រកួត ប្រសិនបើគាត់នាំជោគជ័យម្ដងទៀតសម្រាប់ក្រុម Arsenal ក្នុងការប្រកួតនៅទីក្រុងបាគូប្រទេសអាស៊ែរបៃហ្សង់នៅរាត្រីថ្ងៃនេះ។
ប្រសិនបើជោគជ័យមែននោះ វានឹងធ្វើឲ្យក្រុមកាំភ្លើងធំមិនត្រឹមតែបានពានអឺរ៉ុបជាលើកដំបូងរយៈពេល ២៥ ឆ្នាំមកនេះប៉ុណ្ណោះទេ តែវាថែមទាំងមានឱកាសបានលេងនៅក្របខ័ណ្ឌ Champions League រដូវកាលក្រោយផងដែរក្រោយពីក្រុមនេះគ្មានឱកាសរយៈពេល ២ រដូវកាលមកហើយដែលនឹងធ្វើឲ្យគេចាប់អារម្មណ៍ចំពោះលោក Emery ខ្លាំងឡើងទៀតផង។
ការរៀបចំប្រកួតនៅទីក្រុងនៃប្រទេសអាស៊ែរបៃហ្សង់នេះបានធ្វើឲ្យក្រុមកាំភ្លើងធំត្រៀមលក្ខណៈប្រយ័ត្នបំផុតដោយសារទី ១ ក្រុមនេះត្រូវធ្វើដំណើររាប់ពាន់គីឡូម៉ែត្រទៅកាន់ប្រទេសស្ថិតនៅអាស៊ីបស្ចិមមួយនេះ និងទី ២ ដោយសារខ្សែបម្រើឆ្នើមសញ្ជាតិអាមេនី Henrikh Mkhitaryan អវត្តមានក្នុងការប្រកួតដោយសារជម្លោះនយោបាយរវាងប្រទេសអាមេនី និងអាស៊ែរបៃហ្សង់។
ដំបូងឡើយលោក Emery គ្រោងនឹងមិនចូលរួមក្នុងការប្រកួតនេះទេដោយសារបញ្ហាទាំងនេះ ប៉ុន្តែក្រោយមកគាត់បានប្ដេជ្ញាចិត្តធ្វើដំណើរទៅចូលរួមការប្រកួតនេះក្នុងក្ដីសង្ឃឹមថានឹងគ្មានបញ្ហាអ្វីមួយកើតឡើងចំពោះក្រុមរបស់គាត់នៅថ្ងៃពុធនេះទេ។
លោក Emery បាននិយាយថា៖ «យើងមានឱកាសឈ្នះពានមួយ និងលេងនៅរដូវកាលក្រោយក្នុងក្របខ័ណ្ឌ Champions League ហើយអ្វីទាំងអស់នេះគឺសំខាន់ជាងកន្លែងដែលយើងនឹងត្រូវធ្វើដំណើរទៅប្រកួតនៅវគ្គផ្ដាច់ព្រ័ត្រនេះទៅទៀត»។
គ្រូបង្វឹករូបនេះបានបន្ថែមថា៖ «មែនហើយ វាមិនអាចទៅរួចទេជាមួយវត្តមានរបស់ Mkhi ហើយវាក៏មិនអាចទៅរួចដែរជាមួយអ្នកគាំទ្រដែលយើងចង់ ប៉ុន្តែវគ្គផ្ដាច់ព្រ័ត្រគឺសំខាន់ខ្លាំងណាស់»។
ចំណែកក្លិប Chelsea វិញគឺគ្មានសម្ពាធច្រើននោះទេព្រោះមានឱកាសលេងនៅក្របខ័ណ្ឌ Champions League នៅរដូវកាលរួចទៅហើយក្រោយពីស្ថិតនៅកំពូលតារាងទាំង ៤ នៅក្នុងក្របខ័ណ្ឌ Premier League នៅរដូវកាលនេះខណៈដែលក្រុមរបស់លោក Emery បានត្រឹមតែស្ថិតនៅចំណាត់ថ្នាក់លេខ ៥ ។
លោក Emery បានទទួលថ្មបាក់ពីលោក Arsene Wenger អតីតគ្រូបង្វឹកសញ្ជាតិបារាំងរបស់ក្លិប Arsenal ដែលបានដឹកនាំក្រុមនេះរយៈពេល ២២ ឆ្នាំចាប់ពីឆ្នាំ ១៩៩៦ ដល់ឆ្នាំ ២០១៨៕ SN
