.jpg)
ខ្សែប្រយុទ្ធ Sergio Aguero (កណ្តាល) ដើរលើទីលាន ក្នុងពេលអ្នកគាំទ្ររបស់ក្រុម Wigan រត់ចូលទីលាន។ AFP
ក្រុងវីហ្គាន: សហព័ន្ធកីឡាបាល់ទាត់អង់គ្លេសហៅកាត់ថា FA អាចនឹងធ្វើការស៊ើបអង្កេតមួយ ទៅលើក្លិប Wigan និង Manchester City ក្រោយពីខ្សែប្រយុទ្ធ Sergio Aguero ត្រូវបានបង្ខំឲ្យធ្វើការការពារខ្លួនឯង ក្នុងពេលបញ្ចប់ការប្រកួតពាន FA Cup ជុំទី ៥ នាកីឡដ្ឋាន DW។
គ្រាប់បាល់ឈ្នះនៅជិតបញ្ចប់ការប្រកួតរបស់ខ្សែប្រយុទ្ធ Will Grigg បានជួយឲ្យក្រុម Wigan ដែលលេងក្នុងក្របខ័ណ្ឌ League One ផ្តួលក្រុមកំពុងនាំមុខលើតារាងក្របខ័ណ្ឌ Premier League របស់លោក Pep Guardiola ក្នុងការប្រកួតដ៏ស្វិតស្វាញមួយដែលមានការប៉ះទង្គិចគ្នាក្នុងសំឡេងកញ្ចែចុងចុងក្រោយត្រូវបានបន្លឺឡើង។
អ្នកគាំទ្ររបស់ក្រុម Wigan បានរត់ចូលក្នុងទីលានដើម្បីអបអរក្នុងពេលបញ្ចប់ការប្រកួត ហើយ Aguero ដែលកំពុងតែចាប់ដៃរលាក់ជាមួយនឹងខ្សែការពារ Chey Dunkley របស់ក្រុមម្ចាស់ផ្ទះក្នុងពេលនោះ បានធ្លាក់ចូលក្នុងជម្លោះមួយជាមួយនឹងអ្នកគាំទ្រដ៏ច្រើន។
Aguero ត្រូវបានបង្ខំឲ្យធ្វើការការពារខ្លួនឯង ខណៈដែលទិនភាពនៃជម្លោះនោះបានធ្លាក់ក្នុងក្នុងអំពើហិង្សា ហើយបុគ្គលិករបស់ Man City ត្រូវតែធ្វើការការពាររូបគេពេលដើរចេញពីទីលាន ទៅកាន់កន្លែងមានសុវត្ថិភាពក្នុងបន្ទប់ផ្លាស់ប្តូរសម្លៀកបំពាក់។
លោក Paul Cook អ្នកចាត់ការទូទៅរបស់ក្រុម Wigan បានឲ្យដឹងថា៖ «វាមិនត្រឹមត្រូវឡើយ។ ខ្ញុំមិនធ្លាប់បានឃើញឧប្បត្តិហេតុនេះពីមុនមកឡើយ ហេតុនេះ ខ្ញុំមិនអាចនិយាយបានឡើយ។ ប៉ុន្តែ សុវត្ថិភាពរបស់កីឡាករត្រូវតែជារឿងអាទិភាពសម្រាប់គ្រប់គ្នា»៕ IS
ខ្សែប្រយុទ្ធ Will Grigg (ឆ្វេង) របស់ Wigan រកបានគ្រាប់បាល់ឈ្នះឲ្យក្រុមខ្លួនដើម្បីទម្លាក់ក្រុម Man City ចេញពី FA Cup។ AFP
