ក្រុងឡុងដ៍៖ អ្នកវិភាគបាល់ទាត់ម្នាក់បាននិយាយថា ច្បាប់លេងដោយយុត្តិធម៌ផ្នែកហិរញ្ញវត្ថុ (FFP) របស់បាល់ទាត់អឺរ៉ុបប្រឈមនឹងគ្រោះថ្នាក់ប្រសិនបើក្រុម Man City បានច្រានចោលបម្រាមរយៈពេល ២ រដូវកាល ចំពោះការចូលរួមប្រកួតប្រជែងនៅទ្វីបនេះ។
សហភាពសមាគមបាល់ទាត់អឺរ៉ុប (UEFA) បានប្រកាសពីការដាក់ទណ្ឌកម្មនេះកាលពីថ្ងៃសុក្រ និងបានពិន័យជាប្រាក់ចំនួន ៣០ លានអឺរ៉ូ ប្រហែល ៣២ លានដុល្លារអាមេរិក ចំពោះក្លិបជាម្ចាស់ជើងឯកអង់គ្លេសមួយនេះ ចំពោះអ្វីដែលពួកគេបាននិយាយថា គឺជាការរំលោភបំពានយ៉ាងធ្ងន់ធ្ងររបស់ក្រុម Man City ទៅលើច្បាប់ហិរញ្ញវត្ថុ FFP របស់ខ្លួន។
ទោះបីយ៉ាងណា ក្រុម Man City បានចំណាយពេលតិចតួចនៅក្នុងការឆ្លើយតបចំពោះការនិយាយថា ពួកគេនឹងដាក់ពាក្យប្ដឹងជំទាស់ទៅតុលាការអាជ្ញាកណ្តាលសម្រាប់កីឡា (CAS) ក្នុងក្ដីសង្ឃឹមនៃការទទួលបាន «ការវិនិច្ឆ័យមិនលម្អៀង»។
ចាប់តាំងពីលោក Sheikh Mansour បានចូលកាន់កាប់ក្លិបនេះនៅក្នុងឆ្នាំ ២០០៨ ដែលបានដាក់កម្លាំងហិរញ្ញវត្ថុរបស់លោក Abu Dhabi នៅពីក្រោយក្លិប Man City នេះមក ពួកគេបានឈ្នះពានរង្វាន់ធំៗចំនួន ១០ រួមទាំងពានរង្វាន់ Premier League ចំនួន ៤ លើកផងដែរ។
ប៉ុន្តែពានរង្វាន់ដ៏អស្ចារ្យបំផុតសម្រាប់ពួកគេនោះ គឺជាពានរង្វាន់មួយដែលគម្រោង Abu Dhabi ចង់បានបំផុត នោះគឺពានរង្វាន់ UEFA Champions Leuge។
រដ្ឋាភិបាលចិនបានផ្ដល់ឲ្យក្រុម Man City នូវការគាំទ្របន្ថែមក៏ដូចគ្នានឹងក្រុមហ៊ុន Silver Lake ដែលជាក្រុមហ៊ុនឯកជនអាមេរិកផងដែរ។
ក្រុមហ៊ុនទាំងនេះគ្រោងនឹងធានាថា ក្រុម Man City គ្មានការចំណាយណាមួយទៅលើក្រុមផ្លូវច្បាប់មួយដែលនឹងប្រឈមនឹងសុពលភាពនៃសេចក្តីសម្រេចរបស់សហភាព UEFA នោះទេ។
សាស្រា្តចារ្យលោក Simon Chadwick នាយកនៅមជ្ឈមណ្ឌលសម្រាប់ឧស្សាហកម្មកីឡា Eurasian បាននិយាយថា ប្រសិនបើក្រុម Man City ជោគជ័យមែននោះ ប្រព័ន្ធច្បាប់ FFP អាចនឹងដួលរលំ។
លោក Chadwick បានប្រាប់ទីភ្នាក់ងារព័ត៌មាន Press Association នៅអង់គ្លេសថា៖ «បើនិយាយឲ្យចំទៅ គឺសហភាព UEFA ត្រូវព្យាយាមឈ្នះរឿងក្ដីនេះ ពីព្រោះប្រសិនបើ UEFA មិនឈ្នះ ឬត្រូវបានធ្វើឱ្យបរាជ័យតាមវិធីណាមួយនោះ តួនាទីនៅលើកម្មវិធី Financial Fair Play ចាប់ផ្តើមធ្វើឲ្យប៉ះពាល់ដល់ប្រព័ន្ធ FFP នេះ»។
សាស្ត្រារ្យរូបនេះបានបន្ថែមថា៖ «ទោះយ៉ាងណា ពួកគេមិនពឹងលើ Wigan នោះទេគឺពួកគេនឹងពឹងលើរដ្ឋាភិបាលអាស៊ី ក្រុមហ៊ុនបណ្ដាក់ទុនអាមេរិក និងអ្នកគាំទ្របាល់ទាត់មួយចំនួនទៀត»។
ទន្ទឹមនេះដែរ គ្រូបង្វឹកក្លិប Liverpool លោក Jurgen Klopp បាននិយាយជុំវិញការដាក់ទណ្ឌកម្មទៅលើក្រុមជាគូប្រជែងរបស់ខ្លួននេះថា៖ «នេះជារឿងគួរឲ្យតក់ស្លុតមួយ»។
គ្រូបង្វឹករូបនេះបានបន្ថែមថា៖ «អ្វីដែលពួកគេបានធ្វើនៅលើទីលានបាល់ទាត់ គឺពិសេសខ្លាំងណាស់ ប៉ុន្តែនៅផ្នែកផ្សេងទៀតគឺខ្ញុំមិនដឹងនោះទេ»។
សហភាពបាល់ទាត់ UEFA បាននិយាយថា ក្រុម Man City បានរំលោភបំពានច្បាប់ FFP ដែលបានដាក់ការរឹតបន្តឹងទៅលើការខាតបង់ប្រាក់របស់ក្លិបបាល់ទាត់៕ AFP/SN