.jpg)
ខ្សែប្រយុទ្ធ Olivier Giroud អបអរ ក្រោយពីរកគ្រាប់បាល់ឈ្នះសម្រាប់ក្រុមជម្រើសជាតិបារាំង ពេលប្រកួតជាមួយហូឡង់។ AFP
ក្រុងប៉ារីស: ទីបំផុត ក្រុមបាល់ទាត់ជម្រើសជាតិបារាំង បានអបអរការឈ្នះពាន World Cup ជាមួយនឹងអ្នកគាំទ្រនៅលើទឹកដីរបស់ពួកគេ កាលពីថ្ងៃអាទិត្យ ក្រោយពីខ្សែប្រយុទ្ធ Kylian Mbappe និង Olivier Giroud សុទ្ធសឹងរកបានគ្រាប់បាល់ដូចគ្នា ក្នុងពេលក្រុមខ្លួនយកឈ្នះលើក្រុមជម្រើសជាតិហូឡង់ ២-១ ក្នុងទីក្រុងប៉ារីស។
Giroud រកបានគ្រាប់បាល់ឈ្នះ ក្រោយពីការបញ្ជូនបាល់របស់កីឡាករ Benjamin Mendy នៅនាទី ទី ៧៥ ដើម្បីរកគ្រាប់បាល់ទី១របស់គេក្នុងចំណោមការប្រកួត ១១ លើក សម្រាប់ក្រុមជម្រើសជាតិបារាំង ក្រោយពីខ្សែប្រយុទ្ធរបស់ Chelsea រូបនេះ បានបំពេញយុទ្ធនាការទាំងមូលរបស់ប្រទេសខ្លួននៅរុស្ស៊ី ដោយមិនរកបានគ្រាប់បាល់បញ្ចូលទីសោះ។
ក្នុងការបង្ហាញខ្លួនជាលើកទី ១ របស់ពួកគេនៅលើទឹកដីខ្លួនឯង ចាប់តាំងពីយុទ្ធនាការ World Cup តារាឆ្នើម Mbappe បានជួយឲ្យក្រុមជម្រើសជាតិបារាំង មានគ្រាប់បាល់នាំមុខមុន ក្នុងការបង្ហាញពីទម្រង់លេងយ៉ាងល្អពីសំណាក់កីឡាករវ័យ ១៩ ឆ្នាំរូបនេះ នៅមុនពេល Ryan Babel បានរកគ្រាប់បាល់តាមស្មើវិញនៅតង់ទី ២។
ខ្សែបម្រើហូឡង់ Georginio Wijnaldum (ឆ្វេង) ដណ្តើមបាល់ជាមួយនឹងខ្សែប្រយុទ្ធបារាំង Kylian Mbappe (កណ្តាល) ក្នុងការប្រកួតកាលពីថ្ងៃអាទិត្យ។ AFP
កីឡដ្ឋាន Stade de France បានផ្ទុះការអបអរយ៉ាងខ្លាំងក្លា ចំពោះគ្រាប់បាល់ឈ្នះរបស់ Giroud ក្នុងការប្រកួតមួយនៃយុទ្ធនាការរបស់ UEFA Nations League៕ IS
