ក្រុងមីឡានៈ ខ្សែប្រយុទ្ធ Antoine Griezmann បានជួយសង្គ្រោះឲ្យបានស្មើគ្នាសម្រាប់ក្រុម Barcelona នៅលើទឹកដីក្រុម Napoli ក្នុងជើងទី ១ នៃវគ្គ ១៦ ក្រុមចុងក្រោយនៅក្របខ័ណ្ឌ Champions League កាលពីយប់មិញនេះ។
ខ្សែប្រយុទ្ធបារាំង Griezmann រកបានគ្រាប់បាល់នៅនាទីទី ៥៧ នៅក្នុងទីក្រុង Naples ក្រោយពីកីឡាករ Dries Mertens បានជួយឲ្យក្រុមម្ចាស់ផ្ទះនាំមុខ ១ គ្រាប់នៅនាទីទី ៣០ ជាមួយការរកបានគ្រាប់បាល់លើកទី ១២១ របស់រូបគេនៅក្រុម Napoli ដែលស្មើគ្នានឹងកីឡាករ MarekHamsik ដែលរកបានគ្រាប់បាល់ច្រើនជាងគេបំផុតក្នុងការប្រកួតទាំងអស់នៅក្លិបនេះ។
ក្រុម Barcelona បានបញ្ចប់ការប្រកួតនេះនៅពេលគ្នា១០នាក់ក្រោយពីកីឡាករ Arturo Vidal ត្រូវបានបណ្ដេញចេញនាទីទី ៨៩ ក្រោយពីបានកាតលឿង ២ លើក បន្ទាប់ពីមានការប៉ះទង្គិចគ្នាយ៉ាងខ្លាំងជាមួយខ្សែការពារ Mario Rui របស់ក្លិប Napoli។
គ្រូបង្វឹកក្រុម Barcelona លោក Quique Setien ដែលក្រុមរបស់គាត់នឹងស្វាគមន៍ក្រុម Napoli នៅថ្ងៃទី ១៨ ខែមីនា សម្រាប់ជើងទី ២ នោះបាននិយាយថា៖ «នៅចុងបញ្ចប់ វាជាលទ្ធផលស្មើគ្នាដ៏ល្អមួយដែលធ្វើឲ្យយើងមានសង្ឃឹមនៅពេលប្រកួតក្នុងទឹកដីរបស់យើង»។
នេះជាការប៉ះគ្នាលើកដំបូងរវាងក្រុមទាំង២នេះ ហើយក៏ជាការប្រកួតគ្នាលើកដំបូងនៅក្របខ័ណ្ឌ Champions League សម្រាប់លោក Setien និងលោក Gennaro Gattuso ជាគ្រូបង្វឹកក្លិប Napoli ដែលបានដឹកនាំក្រុមនេះក្រោយពីការប្រកួតជម្រុះក្នុងពូលផងដែរ។
លោក Gattuso បាននិយាយថា៖ «ពួកគេមិនបានធ្វើឲ្យយើងឈឺចាប់ខ្លាំងពេកទេ។ វាបានភ្លាត់ស្នៀតបន្តិចដែលបានធ្វើឲ្យយើងរងគ្រោះតែម្ដង»។
ប្រធានក្រុម Lorenzo Insigne នៅក្លិប Napoli បានបន្ថែមថា៖«យើងអាចនឹងឈ្នះទៅហើយប៉ុន្តែយើងបែរជាខកចិត្តទៅវិញ។ វាពិតជារីករាយណាស់ដែលបានប្រកួតជាមួយកីឡាករឆ្នើមៗមួយចំនួនដូចជា Lionel Messi ជាដើម»។
កីឡាករ Messi រកមិនបានគ្រាប់បាល់ទេនៅក្នុងការបង្ហាញខ្លួនជាលើកដំបូងរបស់រូបគេនៅកីឡដ្ឋាន Stadio San Paolo ជាទីដែលវីរបុរស Diego Maradona របស់ក្លិប Napoli បានបង្ហាញទម្រង់លេងអស្ចារ្យកាលពី ៣ ទសវត្សរ៍មុន។
កីឡាករ Messi វ័យ ៣២ ឆ្នាំ រកបានគ្រាប់បាល់ ៤ គ្រាប់ កាលពីចុងសប្តាហ៍ក្នុងជ័យជម្នះ ៥-០ របស់ក្លិប Barcelona លើក្រុម Eibar ធ្វើឲ្យពួកគេឡើងទៅឈរនៅកំពូលតារាង La Liga វិញ ប៉ុន្តែរូបគេមិនអាចបន្ថែមគ្រាប់បាល់ទី ១១៤ របស់ខ្លួននៅក្របខ័ណ្ឌ Champions League របស់គាត់បានឡើយ។
លោក Gattuso បាននិយាយថា៖«ប្រសិនបើថ្ងៃនេះក្រុម Barca បានធ្វើដូចដែលពួកគេបានលេងកាលពី ៣ ថ្ងៃមុនជាមួយក្រុម Eibar នោះ វាប្រហែលជាក្រុម Napoli គ្មានសង្ឃឹមនោះឡើយ»។
គ្រូបង្វឹករូបនេះបានបន្ថែមថា៖ «ខ្ញុំសង្ឃឹមថា គ្មានអ្នកណាគិតថា វាបានបញ្ចប់នោះទេព្រោះយើងដឹងថា វានឹងកាន់តែលំបាកប៉ុន្តែគ្មានអ្វីទាន់បានបញ្ចប់នៅឡើយទេ»៕ AFP/SN