ក្រុងឡុងដ៍៖ គ្រូបង្វឹកក្រុម Man City លោក Pep Guardiola បាននិយាយថា ក្លិប Man City នៅមិនទាន់ត្រៀមលក្ខណៈលើកពានរង្វាន់ក្របខ័ណ្ឌ Champions League នៅឡើយទេ។
ក្លិប Man City បានឆ្លើយតបនឹងការចាញ់ក្របខ័ណ្ឌ Premier League គួរឲ្យរន្ធត់ចិត្តចំពោះក្រុម Wolves នៅមុនពេលការឈប់សម្រាកសម្រាប់ការប្រកួតអន្តរជាតិ ប៉ុន្តែពួកគេបានទទួលជ័យជម្នះ ២-០ ទៅលើក្រុម Crystal Palace កាលពីថ្ងៃសៅរ៍។
ក្លិប Man City ជាម្ចាស់ជើងឯក Premier League ២ ជំនាន់ ឥឡូវនេះមាន ៦ ពិន្ទុ តាមពីក្រោយក្រុម Liverpool ដែលមិនធ្លាប់ចាញ់នៅមុនពេលការប្រកួតក្របខ័ណ្ឌ Champions League ជាមួយក្រុម Atalanta នៅយប់ថ្ងៃអង្គារនេះតែម្ដង។
ដោយធ្លាប់បានឈ្នះពានរង្វាន់លីកអង់គ្លេសហើយនោះ ក្រុម Man City ចង់បានការលើកពានរង្វាន់អឺរ៉ុបឲ្យបានម្ដង ប៉ុន្តែលោក Guardiola ជឿថាក្រុមរបស់គាត់មិនស្ថិតនៅជិតនឹងការគ្រងតំណែងកំពូលក្នុងក្របខ័ណ្ឌ Champions League នៅឡើយទេ។
លោក Guardiola ដែលក្លិប Man City របស់គាត់បានចាញ់ក្នុងវគ្គ ៨ ក្រុមចុងក្រោយ នៅរយៈពេល ២ រដូវកាលមុននោះនិយាយថា៖ «មនុស្សនិយាយពីក្របខ័ណ្ឌ Champions League ជាគោលដៅ ប៉ុន្តែយើងនៅតែមិនទាន់ត្រៀមខ្លួននៅឡើយទេ»។
គ្រូបង្វឹករូបនេះបានបន្ថែមថា៖ «យើងបង្កើតបានឱកាសជាច្រើន យើងមិនធ្វើឲ្យរបូតគ្រាប់បាល់ ប៉ុន្តែយើងអាចបង្កើនសមត្ថភាពថែមទៀត។ យើងត្រូវរកគ្រាប់បាល់បានច្រើនក្នុងរយៈពេល ២ រដូវកាលចុងក្រោយនេះ ហើយខ្ញុំមិនមានការសង្ស័យអំពីរឿងនោះទេ ប៉ុន្តែយើងត្រូវតែបន្តធ្វើវាថែមទៀត»។
កីឡាករ Gabriel Jesus រកបានគ្រាប់បាល់ជ័យជម្នះនៅឯកីឡដ្ឋាន Selhurst ជាទីដែលខ្សែប្រយុទ្ធសញ្ជាតិប្រេស៊ីលរូបនេះរកបានគ្រាប់បាល់ទី ៥០ របស់គាត់ចាប់តាំងពីបានចេញពីក្លិប Palmeiras នៅឆ្នាំ ២០១៧។
លោក Guardiola បាននិយាយថា៖ «គាត់ (Jesus) នឹងមានអាជីពយូរអង្វែង ហើយជាមួយការប្ដេជ្ញាចិត្តនោះ គាត់នឹងទទួលបានជោគជ័យ។ គាត់ស្រែកឃ្លាន គាត់នឹងក្លាយជាខ្សែប្រយុទ្ធដ៏សំខាន់នៅជុំវិញពិភពលោក ហើយយើងមានសំណាងណាស់ដែលមានគាត់"។
គ្រូបង្វឹករូបនេះបានបន្ថែមថា៖ «កីឡាករ Gabriel តែងតែល្អតាំងពីដើមមកម្ល៉េះ។ ជាអកុសលគាត់មានរបួសធ្ងន់ ២ លើក។ កាលពីរដូវកាលមុន វាពិតជាលំបាកណាស់សម្រាប់គាត់បន្ទាប់ពីការប្រកួតបាល់ទាត់ពិភពលោករួចហើយ វាមិនងាយស្រួលនោះទេ ប៉ុន្តែគាត់នៅតែរឹងមាំ»។ AFP/SN