ក្រុងឡុងដ៍ៈ កីឡាការិនីវាយកូនបាល់ Simona Halep ជឿថា ការចាញ់របស់កីឡាការិនី Serena Williams គឺដោយសារមិនបានធ្វើការគំរាមកំហែងស្មារតីដែលធ្លាប់ធ្វើកន្លងទៅលើគូប្រជែងរបស់ខ្លួន ដើម្បីកាច់បំបាក់ស្មារតីមុនពេលពួកគេបោះជំហានចូលទីលានប្រកួតវាយកូនបាល់ (Tennis)។
កីឡាការិនី Halep បានយកឈ្នះកីឡាការិនី Williams ៦-២ និង ៦-២ ក្នុងរយៈពេលជិត ១ ម៉ោងនៅវគ្គផ្ដាច់ព្រ័ត្រនៅក្របខ័ណ្ឌ Wimbledon កាលពីថ្ងៃសៅរ៍ ដើម្បីក្លាយជាស្ត្រីរ៉ូម៉ានីដំបូងគេដែលបានឈ្នះពាន Wimbledon នៅកីឡដ្ឋាន All England Club។
ក្នុងការប្រកួតរយៈពេល ៥៦ នាទីនៅវគ្គផ្ដាច់ព្រ័ត្រនេះកីឡាការិនី Williams ដែលជាម្ចាស់ជើងឯកពាន Slam ២៣ ជំនាន់នេះគឺមានកំហុសច្រើនបំផុត។
កីឡាការិនី Halep អាយុ ២៧ ឆ្នាំបានទទួលស្គាល់ថា៖ «ខ្ញុំតែងតែរងការបំភ័យស្មារតីបន្តិចបន្តួច នៅពេលខ្ញុំឡើងប្រកួតជាមួយ Williams »។
កីឡាការិនីរូបនេះបានបន្តថា៖ «នាងគឺជាគំរូ និងជាកម្លាំងចិត្តសម្រាប់អ្នកគ្រប់គ្នា ប៉ុន្តែថ្ងៃនេះខ្ញុំបានសម្រេចចិត្តនៅពេលមុនប្រកួតនេះថា ខ្ញុំនឹងផ្ដោតលើខ្លួនឯង និងវគ្គផ្ដាច់ព្រ័ត្រនៃព្រឹត្តិការណ៍ Grand Slam គឺមិនត្រូវផ្ដោតលើនាងពេកនោះទេ»។
កីឡាការិនី Halep បានបន្ថែមថា៖ «ដូច្នេះហើយខ្ញុំអាចប្រឹងប្រែងលេងបានល្អបំផុត ដោយគ្មានអារម្មណ៍តានតឹង និងអាចមានផលវិជ្ជមានព្រមទាំងទំនុកចិត្តនៅពេលប្រកួតជាមួយនាងថែមទៀត»។
វាជាបច្ចេកទេសមួយដែលមានប្រសិទ្ធភាពល្អបំផុតសម្រាប់កីឡាការិនីជាប់លេខ ៧ ក្នុងពិភពលោកម្នាក់នេះដែលបានចាញ់ ៩ ដងក្នុងការជួប ១០ លើកជាមួយកីឡាការិនីសញ្ជាតិអាមេរិក Williams រូបនេះគឺធ្លាប់ឈ្នះ Williams តែម្ដងគត់នៅក្នុងការប្រកួតវគ្គផ្ដាច់ព្រ័ត្រនៅ WTA នៅប្រទេសសិង្ហបុរីឆ្នាំ ២០១៤។
ចំពោះកីឡាការិនី Halep វិញនេះគឺការលើកពាន Grand Slam ជាលើកទី ២ ហើយក្រោយពីបានឈ្នះនៅក្របខ័ណ្ឌ French Open ឆ្នាំ ២០១៨ ដែលបានចាញ់ ៣ លើកក្នុងការប្រកួតពាននៅព្រឹត្តិការណ៍ Slam។
កាលពីថ្ងៃសៅរ៍កីឡាការិនីរូបនេះបានធ្វើឲ្យខូចតែ ៣ លើកប៉ុណ្ណោះ ចំណែក Williams វិញគឺខូចរហូតដល់ ២៦ លើកឯណោះ។
កីឡាការិនី Halep បាននិយាយថា៖ «ខ្ញុំប្រាកដណាស់ថា នោះគឺជាការប្រកួតល្អបំផុតមិនធ្លាប់មានក្នុងជីវិតរបស់ខ្ញុំ»។
កីឡាការិនី Halep គឺជាអ្នកជាប់លេខ ២ នៅក្របខ័ណ្ឌ Australia Open ដោយសារចាញ់នៅវគ្គផ្ដាច់ព្រ័ត្រឆ្នាំ ២០១៨ ក្រោមស្នាដៃរបស់កីឡាការិនី Caroline Wozniacki ។
រហូតមកដល់ពេលនេះកីឡាការិនីរូបនេះមិនដែលបានឡើងឲ្យហួសវគ្គ ៤ នាក់ចុងក្រោយនៅក្របខ័ណ្ឌ Wimbledon នោះទេ ខណៈការឡើងដល់វគ្គ ៤ នាក់កាលពីឆ្នាំ ២០១៥ នៅតែជាទម្រង់លេងល្អបំផុតរបស់នាងនៅក្របខ័ណ្ឌ US Open។
នៅពេលកីឡាការិនី Halep បានឈ្នះពានក្របខ័ណ្ឌ French Open ឆ្នាំ ២០១៨ នាងបានធ្លាក់នៅជុំទី ៣ នៅក្របខ័ណ្ឌ Wimbledon និងនៅជុំដំបូងនៃក្របខ័ណ្ឌ US Open។
កីឡាការិនីរូបនេះបាននិយាយថា៖ «វគ្គផ្ដាច់ព្រ័ត្រដែលខ្ញុំបានចាញ់ក្នុងពេលកន្លងមកនេះបានជួយឲ្យខ្ញុំជាការពិតមានការរីកចម្រើនជាងមុនច្រើនដូចជាក្នុងការប្រកួតរបស់ខ្ញុំនៅពេលនេះអ៊ីចឹងដែលទទួលបានជោគជ័យ»។
កីឡាការិនីសញ្ជាតិរូម៉ានីរូបនេះបានបន្ថែមថា៖ «វាមិនងាយស្រួលទេនៅក្នុងការប្រកួតនៅវគ្គផ្ដាច់ព្រ័ត្រនៅ Grand Slam គឺអ្នកអាចរងការបំភ័យស្មារតី និងមានការភ័យខ្លាចផងដែរ»។
កីឡាការិនីរូបនេះបានបន្ថែមទៀតថា៖ «ដើម្បីចៀសវាងការបំភ័យស្មារតីនេះ ខ្ញុំបានធ្វើចិត្តដោយចាត់ទុកការប្រកួតជាធម្មតាដោយមិនគិតពីការឈ្នះពេកទេ ប៉ុន្តែគ្រាន់តែព្យាយាមលេងឲ្យបានល្អបំផុតតាមតែអាចធ្វើបាន ដូច្នេះខ្ញុំធ្វើវាបានសម្រេច»៕ SN