ភ្នំពេញៈ ខ្សែប្រយុទ្ធលំដាប់អន្តរជាតិរបស់ជប៉ុន Keisuke Honda បានដាក់ចិត្ត ដាក់កាយកាន់តែជ្រៅសម្រាប់ការមកដឹកនាំក្រុមជម្រើសជាតិកម្ពុជា ក្នុងនាមជាអ្នកចាត់ការទូទៅ ដោយកីឡាករដែលបានកុងត្រាលេងឲ្យក្លិប Melbourne Victory របស់អូស្ត្រាលីរូបនេះ ចង់ចែករំលែកបទពិសោធដែលខ្លួនមានទៅឲ្យក្រុមជម្រើសជាតិកម្ពុជាទាំងអស់។
Keisuke Honda បាននិយាយថា៖ «ខ្ញុំពិតជាមានអារម្មណ៍រំភើប ដែលបានមកបង្ហាត់ដល់ក្រុមជម្រើសជាតិកម្ពុជានៅពេលនេះ ហើយខ្ញុំនឹងធ្វើការចែករំលែកបទពិសោធ ដែលខ្ញុំមានទាំងប៉ុន្មានទៅឲ្យក្រុមកម្ពុជា ប៉ុន្តែដោយសារយើងទើបតែចាប់ផ្តើមហ្វឹកហាត់ អ៊ីចឹងខ្ញុំត្រូវធ្វើការសិក្សា និងស្វែងយល់ពីកីឡាករកម្ពុជាឲ្យបានច្បាស់លាស់សិន»។
ការលើកឡើងរបស់ខ្សែប្រយុទ្ធអន្តរជាតិ នៃក្រុមជម្រើសជាតិជប៉ុន Honda ត្រូវបានធ្វើឡើង នៅពេលរូបគេបានបង្ហាញខ្លួន ជាលើកដំបូង ក្នុងការបង្ហាត់ដល់ក្រុមជម្រើសជាតិកម្ពុជា នៅពហុកីឡដ្ឋានជាតិ កាលពីល្ងាចថ្ងៃអង្គារ ដើម្បីត្រៀមប្រកួតមិត្តភាពអន្តរជាតិ ជាមួយក្រុមជម្រើសជាតិម៉ាឡេស៊ី នៅពហុកីឡដ្ឋានជាតិ នាល្ងាចថ្ងៃទី ១០ ខែកញ្ញា ខាងមុខនេះ។
ទាក់ទងទៅនឹងការប្រកួតមិត្តភាពអន្តរជាតិ ជាលើកដំបូង ដើម្បីត្រៀមការប្រកួតផ្លូវការក្នុងពានរង្វាន់ AFF Suzuki Cup 2018 នៅខែវិច្ឆិកា ខាងមុខនេះ Keisuke Honda បានមើលឃើញថា ក្រុមម៉ាឡេស៊ី មានទម្រង់លេងល្អ ពិសេសការវាយបករបស់ក្រុមនេះបានល្អ ប៉ុន្តែ Honda សន្យាថា នឹងធ្វើឲ្យអ្នកគាំទ្រសប្បាយចិត្ត ក្រោមការដឹកនាំរបស់ខ្លួន។
ខ្សែប្រយុទ្ធវ័យ ៣២ ឆ្នាំ Keisuke Honda បាននិយាយថា៖ «ជាទូទៅ គ្រូបង្វឹកណាក៏ដូចគ្រូបង្វឹកណា តែងតែចង់បានលទ្ធផលឈ្នះ ប៉ុន្តែម៉ាឡេស៊ី ជាក្រុមល្អមួយ ដូច្នេះខ្ញុំមិនទាន់ចង់និយាយអ្វីច្រើនទេ ព្រោះយើងទើបតែចាប់ផ្តើម។ ទោះយ៉ាងណា យើងនឹងព្យាយាម ហើយខ្ញុំសង្ឃឹមថា នឹងធ្វើឲ្យអ្នកគាំទ្រកម្ពុជាសប្បាយចិត្ត»។
សម្រាប់ការមកដឹកនាំក្រុមជម្រើសជាតិកម្ពុជា ដោយការស្ម័គ្រចិត្តរយៈពេល ២ ឆ្នាំ ក្នុងនាមជាអ្នកគ្រប់គ្រងទូទៅនេះ Keisuke Honda ដែលបានហៅខ្លួនឯងថា «ជាគ្រូបង្វឹកមិនផ្ទាល់» គឺចង់បង្កើតទម្រង់លេងថ្មីមួយសម្រាប់ក្រុមកម្ពុជា។
Honda ធ្លាប់បានបញ្ជាក់ថា៖ «យើងធ្វើយ៉ាងណា ឲ្យមានទម្រង់លេងបែបស្តង់ដារមួយ សម្រាប់ក្រុមកម្ពុជា ព្រោះការលេងបាល់ បើយើងមិនធ្វើវាឲ្យទៅជាគោលដៅតែមួយទេ គឺបាល់ទាត់ មិនអាចអភិវឌ្ឍបានត្រឹមត្រូវនោះទេ»។
យ៉ាងណាមិញ សម្រាប់ការប្រមូលផ្តុំហ្វឹកហាត់ ជាលើកដំបូង ដើម្បីប្រកួតមិត្តភាពអន្តរជាតិ ជាមួយក្រុមម៉ាឡេស៊ី លើកនេះ Honda និងក្រុមការងារ បានជ្រើសរើសកីឡាករកម្ពុជា ២៣ នាក់ ក្នុងនោះមានអ្នកចាំទី ស៊ូ យ៉ាងទី, អ៊ុំ វិចិត្រ, កែវ សុខសិលា ខ្សែការពារ ហុង ផេង, លី វ៉ាហេទ, សេត រ៉ូស៊ីប, ស ពិសិដ្ឋ, ឆេង ម៉េង, អ៊ុក សុវណ្ណ, នេន សុធារ័ត្ន, សឿយ វិសាល ខ្សែបម្រើ ជ័យ ចត្ត្រា, ឈិន ឈឿន, សុះ ស៊ុហាណា, គួច សុកុម្ភៈ, អ៊ិន សូដាវីដ, ប្រាក់ ធីវ៉ា, ប៊ីន ចន្ថាធារី, ទិត្យ ឌីណា ខ្សែប្រយុទ្ធ ប្រាក់ មុន្នីឧត្តម, កែវ សុខផេង, រ៉ឹង ប៊ុនហៀង និង ស៊ិន កក្កដា៕