.jpg)
គួច សុកុម្ភៈ (ពីស្តាំ) លោក Felex និង Honda បានថតជាមួយគ្រូបង្វឹក និងកីឡាករក្រុមម៉ាឡេស៊ី។ ស្រេង ម៉េងស្រ៊ុន
ភ្នំពេញៈ អ្នកចាត់ការទូទៅរបស់ក្រុមជម្រើសជាតិកម្ពុជា Keisuke Honda បានចាត់ទុកការប្រកួតមិត្តភាពអន្តរជាតិជាមួយក្រុមជម្រើសជាតិម៉ាឡេស៊ី នៅពហុកីឡដ្ឋានជាតិនាល្ងាចម៉ោង ៦:៣០ ថ្ងៃចន្ទនេះថា តានតឹង ប៉ុន្តែបានអះអាងថា ក្រុមកម្ពុជានឹងលេងដោយ «មិនភ័យខ្លាច និងប្រកបដោយភាពជឿជាក់»។
នៅក្នុងសន្និសីទកាសែត ដែលមានប្រព័ន្ធផ្សព្វផ្សាយជាតិ និងអន្តរជាតិ ចូលរួមជាច្រើន កាលពីថ្ងៃអាទិត្យ Keisuke Honda បាននិយាយថា៖ «យើងមានអារម្មណ៍រំភើបរីករាយ ដែលបានប្រកួតជាមួយក្រុមម៉ាឡេស៊ី ហើយខ្ញុំគោរពទៅដល់ទម្រង់លេងរបស់ម៉ាឡេស៊ី ព្រោះការប្រកួតកីឡាអាស៊ី កន្លងមកនេះ ម៉ាឡេស៊ី ធ្វើបានយ៉ាងល្អ អ៊ីចឹងការប្រកួតនេះ ពិតជាមានភាពតានតឹង ប៉ុន្តែខ្ញុំសង្ឃឹមថា ក្រុមរបស់យើងនឹងធ្វើបានល្អ»។
ខ្សែប្រយុទ្ធរបស់ជប៉ុន Honda បន្ថែមថា៖ «យើងហ្វឹកហាត់បានល្អ និងបានរកឃើញនូវកីឡាករមានសមត្ថភាព និងទេពកោសល្យមួយចំនួន។ ពិតណាស់ ការប្រកួតបាល់ទាត់ វាមិនងាយស្រួលទេ ក្នុងការយកឈ្នះ ប៉ុន្តែយើងមិនភ័យខ្លាចនោះទេ សម្រាប់ការប្រកួតជាមួយក្រុមម៉ាឡេស៊ី លើកនេះ គឺយើងនឹងលេងដោយភាពសប្បាយរីករាយ និងជឿជាក់»។
ចំណែកលោក Felex ជំនួយការ Honda និងជាគ្រូបង្វឹកក្រុមជម្រើសជាតិកម្ពុជា ក៏បានបង្ហាញពីការតាំងចិត្តក្នុងការជំរុញឲ្យកូនក្រុមរបស់ខ្លួន លេងឲ្យអស់ពីសមត្ថភាព ពេលជួបក្រុមម៉ាឡេស៊ី លើកនេះផងដែរ ខណៈខ្សែបម្រើ គួច សុកុម្ភៈ ដែលត្រូវបានជ្រើសរើសឲ្យធ្វើជាប្រធានក្រុម បានអះអាងថា នឹងខំប្រឹងធ្វើឲ្យបានល្អទៅតាមការរៀបចំរបស់គ្រូបង្វឹក។
គួច សុកុម្ភៈ បញ្ជាក់ថា៖ «ខ្ញុំនឹងខំប្រឹងធ្វើអ្វី ទៅតាមគ្រូបង្វឹក បានរៀបចំ ហើយនឹងប្រឹងប្រែងឲ្យអស់ពីសមត្ថភាព។ តាមការហ្វឹកហាត់រយៈពេលប៉ុន្មានថ្ងៃនេះ ពួកយើងធ្វើបានល្អច្រើន គឺអាចបានរហូតដល់ ៧០ ទៅ ៨០ ភាគរយដែរ ប៉ុន្តែយើងនឹងព្យាយាមធ្វើបន្ថែមទៀតឲ្យអស់ពីសមត្ថភាព ទៅតាមអ្វីដែលយើងអាចធ្វើបាន»។
ជាមួយនឹងវត្តមានរបស់ Keisuke Honda ក្នុងនាមជាអ្នកចាត់ការទូទៅក្រុមកម្ពុជានេះក៏បានធ្វើឲ្យគ្រូបង្វឹក និងប្រធានក្រុមម៉ាឡេស៊ី មានការចាប់អារម្មណ៍មកលើទម្រង់លេងរបស់ក្រុមកម្ពុជា ផងដែរ ដោយពួកគេ គិតថា កម្ពុជា នឹងមានទម្រង់លេងថ្មី ប្លែក ហើយម៉ាឡេស៊ី ក៏រំពឹងបានស្រូបយកបច្ចេកទេសថ្មីៗទាំងនេះ តាមរយៈការប្រកួតនេះ ផងដែរ។
លោក Tan Cheng Hoe គ្រូបង្វឹកក្រុមម៉ាឡេស៊ី និយាយថា៖ «កម្ពុជា និងម៉ាឡេស៊ី ធ្លាប់បានជួបគ្នាជាច្រើនដងមកហើយ ហើយយើងក៏បានដឹងដែរថា រាល់ការប្រកួតទាំងនោះ ពិតជាមិនងាយស្រួលយកឈ្នះក្រុមកម្ពុជាទេ។ ចំណែកលើកនេះយើងដឹងថា កម្ពុជា មានកីឡាករ ដែលមានឆន្ទៈខ្ពស់ក្នុងការលេង ក្រោមការដឹកនាំរបស់គ្រូបង្វឹកថ្មី អ៊ីចឹងពួកគេនឹងខំប្រឹងលេងឲ្យអស់ ១០០ ភាគរយ ដើម្បីបញ្ចេញសមត្ថភាព បង្ហាញដល់គ្រូបង្គោលថ្មីរបស់ពួកគេ»។
លោកបានបញ្ជាក់ថា៖ «ខ្ញុំគិតថា ការលេង និងការរៀបចំរបស់ក្រុមកម្ពុជា ប្រាកដជាថ្មី និងខុសប្លែកពីមុន ព្រោះថា ពេលនេះ មានគ្រូបង្វឹកថ្មីមកដឹកនាំ ហើយខ្ញុំក៏សង្ឃឹមដែរថា កីឡាកររបស់យើង នឹងប្រមូលអារម្មណ៍បានល្អឡើងវិញ សម្រាប់ការប្រកួតលើកនេះ បន្ទាប់ពីបានចាញ់ក្រុមចិនតៃប៉ិ ២-០ កាលពីពេលថ្មីៗនេះ»។
ចំណែកប្រធានក្រុម Muhammad Nazmi Faiz បាននិយាយថា៖ «យើងដឹងថា កម្ពុជាមានកីឡាករល្អមួយចំនួន ប៉ុន្តែយើងនឹងព្យាយាមឲ្យអស់ពីសមត្ថភាព ដើម្បីយកឈ្នះការប្រកួតនេះ។ ម្យ៉ាងទៀត ខ្ញុំមានការភ្ញាក់ផ្អើលខ្លាំង ដែលឃើញកីឡាករលំដាប់កំពូល Honda បានមកដឹកនាំក្រុមកម្ពុជា ដូច្នេះកម្ពុជា អាចមានបទពិសោធដែលថ្មី ហើយយើងក៏អាចនឹងរៀនសូត្រនូវអ្វីដែលថ្មី តាមរយៈការប្រកួតនេះផងដែរ»៕
