.jpg)
អ្នកចាត់ការទូទៅក្រុមជម្រើសជាតិកម្ពុជា Keisuke Honda (ឆ្វេង) បានសម្រេចជ្រើសរើសខ្សែបម្រើ គួច សុកុម្ភៈ ឲ្យធ្វើជាប្រធានក្រុម ពេលកម្ពុជា ប្រកួតជាមួយក្រុមម៉ាឡេស៊ី នៅល្ងាចថ្ងៃចន្ទ។ ស្រេង ម៉េងស្រ៊ុន
ភ្នំពេញៈ អ្នកចាត់ការទូទៅរបស់ក្រុមជម្រើសជាតិកម្ពុជា ដែលគេស្គាល់ថា ជាខ្សែប្រយុទ្ធលំដាប់អន្តរជាតិរបស់ជប៉ុន Keisuke Honda នោះ បានសម្រេចជ្រើសរើសយកខ្សែបម្រើប្រយុទ្ធជើងចាស់ គួច សុកុម្ភៈ ឲ្យធ្វើជាប្រធានក្រុម ពេលក្រុមជម្រើសជាតិកម្ពុជា ប្រកួតមិត្តភាពអន្តរជាតិ ជាមួយក្រុមជម្រើសជាតិម៉ាឡេស៊ី នៅពហុកីឡដ្ឋានជាតិ នាល្ងាចម៉ោង ៦:៣០ ថ្ងៃចន្ទស្អែកនេះ។
នៅក្នុងសន្និសីទកាសែត កាសែត ស្តីការប្រកួតមិត្តភាពអន្តរជាតិនេះ នៅសណ្ឋាគារភ្នំពេញ កាលពីព្រឹកថ្ងៃអាទិត្យនេះ Keisuke Honda បានធ្វើការសរសើរទៅដល់ គួច សុកុម្ភៈ ថា ជាកីឡាករដែលមានបទពិសោធល្អម្នាក់ ដែលស័ក្តិសម ធ្វើជាប្រធានក្រុមជម្រើសជាតិកម្ពុជា។
ខ្សែប្រយុទ្ធ ដែលទើបចុះកុងត្រាលេងឲ្យក្លិប Melbourne Victory របស់អូស្ត្រាលីរូបនេះ បាននិយាយថា៖ «ពួកយើងមានកីឡាករល្អៗមួយចំនួន ក៏ដូចជាកីឡាករមានបទពិសោធផងដែរ ប៉ុន្តែ គួច សុកុម្ភៈ ជាកីឡាករល្អម្នាក់ មានបទពិសោធល្អ ដែលស័ក្តិសមធ្វើជាប្រធានក្រុមជម្រើសជាតិកម្ពុជា»។
សម្រាប់ការទទួលបានឱកាសធ្វើជាប្រធានក្រុម ចំពោះការវិលត្រឡប់មកជាប់ឈ្មោះក្នុងក្រុមជម្រើសជាតិកម្ពុជា ជាថ្មី ក្រោយអាក់ខានដោយសារបញ្ហារបួសជាង ១ ឆ្នាំនេះ គួច សុកុម្ភៈ របស់ក្លិបណាហ្គាវើល បានធ្វើការប្តេជ្ញាថា នឹងខំប្រឹងលេងឲ្យអស់ពីសមត្ថភាព ទៅតាមការរៀបចំរបស់គ្រូបង្វឹកថ្មី។
គួច សុកុម្ភៈ បាននិយាយថា៖ «ខ្ញុំមានតែខំប្រឹងធ្វើអ្វី ទៅតាមគ្រូបង្វឹកបានរៀបចំឲ្យយើងលេង ហើយខ្ញុំនឹងប្រឹងប្រែងឲ្យអស់ពីសមត្ថភាព។ តាមរយៈការហ្វឹកហាត់រយៈពេលប៉ុន្មានថ្ងៃនេះ ពួកយើងធ្វើបានល្អច្រើន គឺអាចបានរហូតដល់៧០ទៅ៨០ភាគរយដែរ ប៉ុន្តែយើងនឹងព្យាយាមធ្វើបន្ថែមទៀតឲ្យអស់ពីសមត្ថភាព ទៅតាមអ្វីដែលយើងអាចធ្វើទៅបាន»៕
