.jpg)
អ្នកការទូទៅក្រុមជម្រើជាតិកម្ពុជា Keisuke Honda បានប្រកាសរកអ្នកចង់ហាត់បាល់ទាត់ជាមួយខ្លួន ដើម្បីត្រៀមលេង World Cup។
ភ្នំពេញ៖ ខ្សែប្រយុទ្ធលំដាប់អន្តរជាតិដ៏ឆ្នើមរបស់ជប៉ុន Keisuke Honda ដែលកំពុងដឹកនាំ និងបង្វឹកដល់ក្រុមជម្រើសជាតិកម្ពុជា ក្នុងនាមជាអ្នកចាត់ការទូទៅនោះ បានប្រកាសរកអ្នកចង់ហាត់បាល់ទាត់ជាមួយខ្លួន ដោយមិនយកប្រាក់ ហើយថែមទាំងផ្តល់ប្រាក់ ៥ ដុល្លារម្នាក់ ដល់អ្នកទាំងនោះទៀតផង។
តែទោះបីជាយ៉ាងណា Keisuke Honda ត្រូវការអ្នក ដែលមានឆន្ទៈចង់លេងតំណាងឲ្យប្រទេស ដើម្បីចូលរួមការប្រកួត World Cup តែប៉ុណ្ណោះ។ នេះបើតាមអ្វីដែល Honda បានប្រកាស ជាសាធារណៈ នៅលើផេចហ្វេសប៊ុកផ្លូវការ (Keisuke Honda) របស់ខ្លួន កាលពីរសៀលម៉ោងជិត ៣ ថ្ងៃអង្គារនេះ។
Keisuke Honda បានសរសេរថា៖ «ខ្ញុំនឹងផ្តល់ប្រាក់ចំនួន ៥ ដុល្លាម្នាក់ តើមានអ្នកណាចង់ឲ្យខ្ញុំ បង្រៀនបាល់ទាត់ដែរឬទេ? ប្រសិនបើមាន សូមផ្ញើសារមកខ្ញុំផង។ ប៉ុន្តែមានលក្ខខ័ណ្ឌមួយ គឺសុំចំពោះអ្នក ដែលមានឆន្ទៈក្នុងការចង់លេងជាតំណាងប្រទេស ដើម្បីចូលរួមការប្រកួតវើលខាប់តែប៉ុណ្ណោះ។ ខ្ញុំនឹងធ្វើការជ្រើសរើសតាមការសម្រេចរបស់ខ្ញុំ។ ខ្ញុំនឹងធ្វើការបង្រៀនដោយផ្តល់ជាថវិការជូន»។
យ៉ាងណាក៏ដោយ ជាមួយដំណឹងដ៏គួរឲ្យភ្ញាក់ផ្អើល និងចាប់អារម្មណ៍នេះ ខ្សែប្រយុទ្ធឆ្នើម Keisuke Honda មិនបានបញ្ជាក់ច្បាស់ពីឈ្មោះប្រទេស ដែលរូបគេចង់ជួយឲ្យបានទៅលេងនៅ World Cup នោះទេ។
ប៉ុន្តែគេអាចសន្និដ្ឋានបានថា Honda និយាយផ្តោតមកលើប្រទេស កម្ពុជា ព្រោះនៅក្នុងសារ ដែលបានបង្ហោះនោះ បានសរសេរជាភាសាខ្មែរ តែមួយគត់ ហើយខណៈពេលនេះ តារាបាល់ទាត់ដ៏ឆ្នើមរបស់ជប៉ុនរូបនេះ ក៏កំពុងតែបង្វឹកក្រុមជម្រើសជាតិកម្ពុជា ដើម្បីត្រៀមការប្រកួតជម្រុះជុំដំបូង FIFA World Cup Qatar 2022 & Asian Cup 2023 ជាមួយក្រុមជម្រើសជាតិប៉ាគីស្ថាន ដែលនឹងត្រូវធ្វើនៅពហុកីឡដ្ឋានជាតិ ថ្ងៃព្រហស្បតិ៍ ខាងមុខនេះ ផងដែរ៕
