ក្រុងមីឡាន: ខ្សែប្រយុទ្ធអន្តរជាតិអាហ្សង់ទីន Mauro Icardi របស់ក្លិប Inter Milan បានឈ្នះពានកីឡាករឆ្នើមប្រចាំឆ្នាំរបស់ក្របខ័ណ្ឌ Serie A នៅក្នុងកម្មធី Gran Gala del Calcio ក្នុងទីក្រុង Milan កាលពីរាត្រីថ្ងៃចន្ទ។ តារាឆ្នើមវ័យ ២៥ ឆ្នាំរូបនេះ ក្លាយជាកីឡាករដំបូងគេដែលមិនមកពីក្រុម Juventus ក្នុងការឈ្នះពានកីឡាករឆ្នើមប្រចាំឆ្នាំរបស់អ៊ីតាលី ក្រោយពីមានការបោះឆ្នោតពីកីឡាករដូចគ្នា ចាប់តាំងពី Zlatan Ibrahimovic បានឈ្នះពានជាមួយនឹងក្លិប AC Milan កាលពីឆ្នាំ ២០១១។
Icardi បានក្លាយជាអ្នករកបានគ្រាប់បាល់ ច្រើនជាងគេរួមជាមួយនឹងកីឡាករ Ciro Immobile របស់ក្លិប Lazio ក្នុងក្របខ័ណ្ឌ Serie A កាលពីរដូវកាលមុន ក្រោយពីរកបាន ២៩ គ្រាប់។ កីឡាករអាហ្សង់ទីនរូបនេះក៏បានឈ្នះពានរង្វាន់គ្រាប់បាល់ដ៏ល្អបំផុតផងដែរ សម្រាប់ការស៊ុតបាល់បញ្ចូលទីដោយកែងជើងរបស់គេ អំឡុងពេលប្រកួតជាមួយនឹងក្រុម Sampdoria កាលពីខែមីនា ឆ្នាំមុន។
Icardi មិនបានយល់ស្របចំពោះជម្រើសនោះឡើយ ដោយបានបញ្ជាក់ថា «គ្រាប់បាល់របស់គេក្នុងពេលលេងឲ្យក្រុម AC Milan គឺជាគ្រាប់បាល់ល្អជាង»។
Juventus ត្រូវបានបោះឆ្នោតឲ្យជាប់ជាក្រុមកំពូល ខណៈដែលលោក Massimiliano Allegri បានឈ្នះពានរង្វាន់គ្រូបង្វឹកឆ្នើមប្រចាំឆ្នាំ ក្រោយពីក្រុមមានមូលដ្ឋាននៅទីក្រុង Turin មួយនេះ បានឈ្នះពានរង្វាន់លីកពាន Italian Cup ក្នុងរដូវកាលតែ ១ ចំនួន ៤ ឆ្នាំជាប់ៗគ្នា។
លោក Allegri ដែលបានឈ្នះពានគ្រូបង្វឹកឆ្នើមចំនួន ៤ លើកនោះបានឲ្យដឹងថា៖ «វាជាក្រុមកីឡាករដ៏អស្ចារ្យមួយ ជាមួយនឹងក្លិបដ៏អស្ចារ្យមួយពីក្រោយយើង។ ខ្ញុំពិតជាមានសំណាងក្នុងការបានធ្វើការជាមួយនឹងកីឡាករដ៏អស្ចារ្យជាច្រើន ហើយនៅរាត្រីនេះ ខ្ញុំឃើញអ្នកស្នងតំណាងរបស់ Andrea Pirlo ផងដែរ»។
ក្រុមរបស់លោក Allegri កំពុងតែស្ថិតលើផ្លូវឆ្ពោះទៅកាន់ការឈ្នះពាន Serie A ជាលើកទី ៨ ជាប់ៗគ្នា ខណៈលោក Allegri បានកោតសរសើរចំពោះឥទ្ធិពលរបស់តារាឆ្នើម Cristiano Ronaldo ដែលបានចូលរួមជាមួយនឹងក្លិប Juventus កាលពីរដូវក្តៅមុន៕