ក្រុងមីឡានៈ ក្លិប Juventus នឹងចាប់ផ្ដើមយុទ្ធនាការ Serie A របស់ពួកគេនៅចុងសប្ដាហ៍នេះ ក្រោមការដឹកនាំរបស់គ្រូបង្វឹកថ្មីគឺលោក Maurizio Sarri ខណៈម្ចាស់ជើងឯកអ៊ីតាលីមួយនេះ មានបំណងឈ្នះពាន Serie A ជាថ្មីម្ដងទៀត។
ក្លិបធំបំផុតនៅទីក្រុងទួរីនប្រទេស អ៊ីតាលី នេះ មានបំណងនឹងលើកពានឲ្យបានជាប់ៗគ្នាលើកទី៩ ដែលនឹងចាប់ផ្ដើមនៅក្នុងទីក្រុង Parma នៅថ្ងៃសៅរ៍សប្ដាហ៍នេះ ប៉ុន្តែអាចនឹងគ្មានវត្តមានរបស់លោក Sarri បន្ទាប់ពីគ្រូបង្វឹកវ័យ ៦០ ឆ្នាំរូបនេះ បានព្យាបាលជំងឺរលាកសួតពីថ្ងៃចន្ទ។
លោក Sarri បានត្រឡប់ទៅប្រទេស អ៊ីតាលី វិញ ក្រោយពីបានដឹកនាំក្រុម Chelsea បានរយៈពេល ១ រដូវកាល ហើយមុននោះទៀត គាត់ក៏បានដឹកនាំក្រុម Napoli បានរយៈពេល ៣ រដូវកាលផងដែរ។
ការតែងតាំងស្ដេចជក់បារី Sarri ជាគ្រូបង្វឹកដើម្បីជំនួសតំណែងលោក Massimiliano Allegri ដែលបានជួយឲ្យក្លិបនេះលើកពាន Serie A ចំនួន ៥ លើកចុងក្រោយនេះ គឺជាការចង់កែប្រែទម្លាប់ចាស់មួយសម្រាប់ក្លិប Juventus។
ក្រោយពីក្លិប Juventus ទទួលបានឱកាសងាយស្រួលក្នុងការឈ្នះពានក្នុងស្រុកកាលពីរដូវកាលមុននោះ ក្លិបនេះកំពុងស្វែងរកការផ្លាស់ប្ដូរទិសដៅថ្មីរបស់ខ្លួន។
ទោះជាពួកគេទទួលបានជ័យជម្នះក៏ពិតមែន ប៉ុន្តែក្លិប Juventus តែងតែរងការរិះគន់ចំពោះប្រព័ន្ធការពារដ៏គួរឲ្យព្រួយបារម្ភរបស់ក្រុមនេះ។
គ្រប់គ្រូបង្វឹករបស់ក្លិបនេះតែងតែចង់ទទួលបានការចាប់អារម្មណ៍ថែមទៀតពីទម្រង់លេងរបស់ពួកគេ ដើម្បីបង្កើនការគាំទ្រនៅខាងក្រៅប្រទេស អ៊ីតាលី។
ដោយបានឈ្នះពានសំខាន់តែមួយគត់របស់លោក Sarri ជាមួយក្លិប Chelsea នៅរដូវកាលមុន គឺពាន Europa League នោះ គ្រូបង្វឹករូបនេះបានសន្យាថា នឹងបង្ហាញក្រុម Juventus នូវទម្រង់លេងផ្សេងៗថែមទៀត។
អ្នកចាំទី Gianluigi Buffon គិតថា ការផ្លាស់ប្ដូរទិសដៅអាចនឹងកើតឡើងដោយនិយាយថា៖ «អ្នកដែលដើរផ្លូវជាមួយគ្នានឹងទទួលបានផលដូចគ្នា ដូច្នេះហើយក្រុម Juventus កំពុងស្វែងរកការឈ្នះពាន Champions League និងចង់បានអ្វីដែលថ្មីថែមទៀត»។
អ្នកចាំទីអាយុ ៤១ ឆ្នាំរូបនេះ បានបន្ថែមថា៖ «លោក Sarri មិនមែនជាអ្នកធ្វើបដិវត្តន៍ទេ ហើយក៏មិនមែនជាអ្នកលេងនោះដែរ ប៉ុន្តែគាត់គ្រាន់តែជាអ្នកបង្ហាញផ្លូវ និងរឿងរ៉ាវទាំងមូលតែប៉ុណ្ណោះ»។
ក្រោមការដឹកនាំរបស់គ្រូបង្វឹកថ្មី គឺលោក Sarri នេះ ក្រុម Juventus មានបំណងឈ្នះពាន Champions League ជាលើកដំបូងរបស់ខ្លួនក្រោយពីខកខានលើកពាននេះតាំងពីឆ្នាំ ១៩៩៦។
កីឡាករ Cristiano Ronaldo ដែលលោក Sarri និយាយថា «នឹងធ្វើឲ្យមានការខុសប្លែកពីមុននោះ» នឹងដើរតួសំខាន់ជាថ្មីម្ដងទៀត ដើម្បីប្រយុទ្ធជាមួយខ្សែការពារហូឡង់ Matthijs De Ligt អមដោយកីឡាករ Giorgio Chiellini និង Leonardo Bonucci ផងដែរ។
ចំណែកនាយកកីឡាករនៅក្លិប Juventus លោក Fabio Paratici បាននិយាយថា គ្រប់ផ្នែកទាំងអស់គឺមានស្រាប់ហើយសម្រាប់លោក Sarri ដើម្បីផ្ដល់ទម្រង់លេងថ្មីមួយទៀតសម្រាប់ក្រុមនេះ។
លោក Paratici បាននិយាយថា៖ «យើងពិតជាសប្បាយចិត្តណាស់ចំពោះអ្វីដែលសម្រេចបានមកដល់ពេលនេះ ហើយយើងបានទិញកីឡាករ De Ligt ដែលក្រុមល្បីៗទាំងអស់ចង់បានរូបគេ»។
នាយកកីឡារូបនេះបានបន្ថែមថា៖ «យើងអាចទិញរូបគាត់ជាមួយកីឡាករសំខាន់ ២ រូបទៀត ក្នុងការដោះដូរដោយគ្មានតម្លៃខ្លួនគឺកីឡាករ Rabiot និង Ramsey ដែលក្លិបជាច្រើនចង់បានពួកគេ»។
លោក Paratici បានបន្តថា៖ «ក្រុម Juventus មានកីឡាករឆ្នើមបំផុតនៅក្នុងផ្នែកទាំងអស់ គឺជាក្រុមមួយដែលមានតម្លៃបំផុត»៕ AFP/SN