ក្រុងមីឡានៈ ក្លិបម្ចាស់ជើងឯកអ៊ីតាលី Juventus បានប្រកាសពីថ្ងៃពុធថា ពួកគេបានបង្កើតសាខាថ្មីមួយនៅទីក្រុងហុងកុង ខណៈក្លិបសំខាន់នៅក្របខ័ណ្ឌ Serie A មួយនេះសម្លឹងឃើញពង្រីកសាខានៅតំបន់អាស៊ីប៉ាស៊ីហ្វិក។
ក្រុម Juventus មើលឃើញតំបន់នេះថាជាតំបន់សំខាន់មួយនៃការរីកចម្រើនដែលមានសក្ដានុពល ហើយអន្ទះសា «ចង់ពង្រឹងវត្តមានរបស់ខ្លួន» នៅតំបន់អាស៊ី ខណៈពួកគេមានប្រាក់ចំណូលតិចជាងក្លិបធំៗលេងនៅក្របខ័ណ្ឌ Premier League ។
ការទិញម្ចាស់ជើងឯកស្បែកជើងមាស ៥ ជំនាន់ Cristiano Ronaldo ពីក្រុម Real Madrid កាលពីឆ្នាំមុនក្នុងតម្លៃ ១០០ លានអឺរ៉ូប្រហែល ១១០ លានដុល្លារនោះគឺជាផ្នែកមួយនៃយុទ្ធសាស្ត្រក្នុងការបង្កើនប្រជាប្រិយភាពរបស់ក្រុមនេះនៅតំបន់អាស៊ី។
ក្លិប Juventus បាននិយាយក្នុងរបាយការណ៍ថា៖ «តាមរយៈការបង្កើតមូលដ្ឋានប្រតិបត្តិការផ្ទាល់ខ្លួននៅទីក្រុងហុងកុងនេះ ក្រុមហ៊ុនកំពុងសម្ដែងពីឆន្ទៈយ៉ាងខ្លាំងក្នុងការខិតកាន់តែជិតដល់អ្នកគាំទ្រជាសក្ដានុពលចំនួន ១៧១ លាននាក់ និងដើម្បីចាក់គ្រឹះសម្រាប់ផែនការរយៈពេលយូរជាមួយគ្រឹះដែលបានបង្កើតឡើងនេះ»។
ក្រុមសេះបង្កង់ Juventus បានធ្វើដំណើរមកតំបន់អាស៊ីនៅរដូវក្តៅនេះដោយធ្វើការប្រកួតមួយចំនួននៅប្រទេសសិង្ហបុរី ចិន និងកូរ៉េខាងត្បូង ប៉ុន្តែការសម្រេចចិត្តរបស់ Ronaldo មិនចូលលេងនៅទីក្រុងសេអ៊ូលបានបង្កឱ្យអ្នកគាំទ្រខឹងយ៉ាងខ្លាំងដោយគំរាមដាក់ពាក្យប្តឹងផងដែរ។
ក្រុម Juventus មានសាលាបាល់ទាត់ចំនួន ១០ កន្លែងនៅតំបន់នេះគឺ ៦ កន្លែងនៅប្រទេសចិន ១ កន្លែងនៅជប៉ុន ១ កន្លែងនៅវៀតណាម ១ កន្លែងនៅអូស្ត្រាលី និង ១ កន្លែងទៀតនៅនូវែលសេឡង់។
របាយការណ៍ក្លិបនេះបានបន្ថែមថា៖ «សាខានៅក្រុងហុងកុងនេះបានក្លាយជាភស្តុតាងមួយបង្ហាញពីតម្រូវការ ក្ដីប្រាថ្នា និងចំណង់ចំណូលចិត្តរបស់អ្នកគាំទ្រក្លិប Juventus នៅតំបន់អាស៊ីប៉ាស៊ីហ្វិក»។
ក្រុម Juventus បាននិងកំពុងជំរុញឲ្យក្របខ័ណ្ឌអ៊ីតាលី Serie A ដាក់ចេញផែនការថ្មីៗថែមទៀត ដើម្បីជួយឲ្យក្លិបនេះរីកចម្រើននៅតំបន់អាស៊ី។
ប្រធានមន្ត្រីចំណូលក្លិប Juventus លោក Giorgio Ricci បានប្រាប់ BBC Sport ថា៖ «យើងត្រូវរកតុល្យភាពត្រឹមត្រូវរវាងទស្សនិកជនទាំងក្នុង និងក្រៅស្រុក»។
ប្រធានមន្ត្រីចំណូលរូបនេះបាននិយាយថា៖ «វាមិនត្រឹមតែជាពេលវេលាផ្សព្វផ្សាយប៉ុណ្ណោះទេប៉ុន្តែវាជាការចែកចាយត្រឹមត្រូវផងដែរ»។
នាយកគ្រប់គ្រងសាខាក្រុងហុងកុងគឺ លោក Federico Palomba បាននិយាយថា តំបន់នេះមាន «វិសាលភាពធំធេងសម្រាប់ការរីកចម្រើនរបស់ក្រុមនេះ»។
នាយកសាខារូបនេះបានបន្ថែមទៀតថា៖ «ក្នុងទសវត្សរ៍ឆ្នាំ ១៩៩០ ក្របខ័ណ្ឌ Serie A មានប្រជាប្រិយភាពខ្លាំងនៅប្រទេសចិន ហើយឥឡូវនេះវាកំពុងតែកើតឡើងម្ដងទៀតហើយ»៕ SN