ក្រុងបាសេឡូណាៈ លោក Jurgen Klopp គ្រូបង្វឹកក្រុម Liverpool បានទទួលស្គាល់ថា ខ្សែប្រយុទ្ធ Lionel Messi គឺគ្មានកីឡាករណាអាចរារាំងគាត់បានទេ កាលពីថ្ងៃពុធក្រោយពីខ្សែប្រយុទ្ធរូបនេះបានធ្វើឲ្យក្រុម Liverpool បាត់បង់ក្ដីសង្ឃឹមក្នុងការបានឡើងដល់វគ្គផ្ដាច់ព្រ័ត្រសម្រាប់ក្របខ័ណ្ឌ Champions League។
ក្នុងការប្រកួតនេះខ្សែប្រយុទ្ធ Luis Suarez បានបើកឆាករកបាន ១ គ្រាប់មុនគេនៅនាទីទី ២៦ ហើយ ២ គ្រាប់ទៀតរកបានដោយខ្សែប្រយុទ្ធសញ្ជាតិអាហ្សង់ទីន Messi នៅនាទីទី ៧៥ និងនាទីទី ៨២ ធ្វើឲ្យឈ្នះក្រុម Liverpool ៣-០ ក្នុងជើងទី ១ នេះមុនពេលបន្តការប្រកួតនៅជើងទី ២ ក្នុងទឹកដី ក្រុម Liverpool វិញម្ដងនៅកីឡដ្ឋាន Anfield នៅថ្ងៃពុធសប្ដាហ៍ក្រោយ។
លោក Klopp បាននិយាយក្រោយពីការប្រកួតនេះថា៖ «គាត់ (Messi) គឺគ្មានអ្នកណាអាចរារាំងគាត់បានទេ។ ជាការពិតយើងមិនអាចរារាំងការទាត់បាល់ Free-kick របស់គាត់បានទេគឺពិតជាល្អមែន ប៉ុន្តែខ្ញុំមិនភ្ញាក់ផ្អើលទេព្រោះខ្ញុំបានដឹងរួចទៅហើយថា វានឹងបែបនេះឯង ហើយគាត់គឺជាកីឡាករលំដាប់ថ្នាក់ពិភពលោក ១ រូប»។
លោក Jurgen Klopp អាចត្រឹមតែញញឹមប៉ុណ្ណោះក្រោយពីកីឡាករ Messi បានស៊ុតបាល់កោងចូលសំណាញ់ទីយ៉ាងល្អបំផុតនៅកែងរបារទីខាងលើ ប៉ុន្តែលទ្ធផលនេះធ្វើឲ្យប៉ះពាល់ខ្លាំងលើក្រុមរបស់គាត់។
ក្នុងការប្រកួតនេះក្រុមទាំង ២ មានឱកាសគ្រប់គ្រងបាល់ស្មើគ្នានៅតង់ទី ១ ប៉ុន្តែក្រុម Liverpool ហាក់ដាក់សម្ពាធខ្លាំងលើគូប្រជែងនៅដើមតង់ទី ២ ប៉ុន្តែតែដូចជាគ្មានឱកាសស៊ុតទាល់តែសោះគឺមានតែម្ដងគត់ធ្វើដោយខ្សែប្រយុទ្ធ Mohamed Salah ប៉ុន្តែបាល់បានទៅបុកបង្គោលទី។
លោកបាននិយាយថា៖ «ខ្ញុំបាននិយាយនឹងកូនក្រុមខ្ញុំថា ខ្ញុំពេញចិត្តទម្រង់លេងរបស់យើងជាមួយក្រុមខ្លាំងមួយបែបនេះ។ ប្រសិនបើអ្នកចាញ់នៅក្រៅទឹកដី នោះវាមិនមែនជាបញ្ហាធំដែលតម្រូវឲ្យអ្នកត្រូវតែស៊ុតបញ្ចូលទីឲ្យខាងតែបាននោះទេ។ នោះជាបញ្ហារបស់យើងនៅរាត្រីនេះ ហើយវាធ្វើឲ្យជីវិតយើងមិនងាយស្រួលនោះទេ»។
ខ្សែប្រយុទ្ធ Messi និង Suarez តែងតែរកគ្រាប់បាល់បាននៅគ្រប់រដូវកាលទាំងអស់ ខណៈពេលនេះខ្សែប្រយុទ្ធ Messi រកបាន ៤៧ គ្រាប់ ហើយ Suarez រកបាន ២៧ គ្រាប់នៅក្នុងការប្រកួតសរុបទាំងអស់»។
ការតាមយកឈ្នះវិញគឺកាន់តែលំបាកហើយសម្រាប់ក្រុមហង្សក្រហមដោយហេតុថាក្រុម Barcelona ដែលទើបលើកពានអេស្ប៉ាញ La Liga ថ្មីៗនេះនឹងឲ្យកីឡាករល្អៗមួយចំនួនសម្រាកក្នុងការប្រកួតជាមួយក្រុម Celta Vigo នៅចុងសប្ដាហ៍នេះ ខណៈក្រុម Liverpool ត្រូវបន្ថែមកម្លាំងដើម្បីយកឈ្នះក្រុម Newcastle នៅថ្ងៃសៅរ៍ស្អែកនេះដើម្បីដណ្ដើមឈរនៅលើកំពូលតារាងជាមួយក្រុម Man City នៃក្របខ័ណ្ឌ Premier League។
លោក Ernesto Valverde គ្រូបង្វឹកក្រុម Barcelona បាននិយាយថា៖ «ពួកគេនៅតែអាចធ្វើឲ្យយើងរងគ្រោះនៅឡើយ។ ជាការពិតលទ្ធផលលើកនេះល្អហើយ ប៉ុន្តែការលើកពាននៅបើកចំហនៅឡើយទេ»៕ SN