ក្រុងប៉ារីស: លោក Jurgen Klopp អ្នកចាត់ការទូទៅរបស់ក្រុម Liverpool បាននិយាយថា ក្រុមរបស់លោក «បានធ្វើខ្លួនឯងដូចជាអ្នកលក់សាច់» ដោយសារតែការបញ្ចេញប្រតិកម្មរបស់កីឡាករនៃក្រុម Paris Saint-Germain ក្នុងការប្រជែង អំឡុងពេលក្រុមម្ចាស់ជើងឯកបារាំងមួយនេះបានយកឈ្នះ ២-១ ក្នុងការប្រកួតក្របខ័ណ្ឌ Champions League កាលពីថ្ងៃពុធ។
គ្រូបង្វឹកសញ្ជាតិអាល្លឺម៉ង់រូបនេះបានឲ្យដឹងថា៖ «របារតូចមួយដែលយើងត្រូវជម្នះ មានការបង្អាក់ដល់ទៅ ៥០០ ០០០ ដងក្នុងតង់ទី ២ ហើយអាជ្ញាកណ្តាលនៅតែគិតថា គាត់បានសម្រេចចិត្តត្រូវទាំងអស់។ យើងគឺជាក្រុម ១ ក្នុងចំណោមក្រុមលេងដោយយុត្តិធម៌បំផុតនៅអង់គ្លេស ប៉ុន្តែនៅរាត្រីនេះ យើងហាក់ដូចជាអ្នកលក់សាច់អ៊ីចឹង»។
ខ្សែការពារ Juan Bernat និងខ្សែប្រយុទ្ធ Neymar បានស៊ុតបាល់បញ្ចូលទីដើម្បីជួយឲ្យក្រុម PSG ស្ថិតក្នុងការគ្រប់គ្រងនៅតង់ទី ១ នៅ រដ្ឋធានីរបស់បារាំង ប៉ុន្តែគ្រាប់បាល់ប៉េណាល់ទី ១ គ្រាប់របស់ខ្សែបម្រើ James Milner នៅជិតបញ្ចប់តង់ទី ១ បានធ្វើឲ្យការប្រកួតដ៏សំខាន់នៃវគ្គចែកពូលនេះ ស្ថិតក្នុងភាពមិនច្បាស់ រហូតដល់វិនាទីចុងក្រោយ។
Liverpool ដែលបានរងបរាជ័យរាល់ការប្រកួតក្រៅទឹកដីរបស់ខ្លួនទាំង ៥ លើកក្នុងក្របខ័ណ្ឌ Champions League បច្ចុប្បន្នប្រឈមមុខនឹងការអវត្តមានក្នុងវគ្គបន្ត ត្រឹមតែរយៈពេល ៦ ខែ ក្រោយពីបានឈានទៅវគ្គផ្តាច់ព្រ័ត្រជាមួយនឹងក្រុម Real Madrid។
ស្របពេលជាមួយគ្នានេះ ក្រុម Napoli បានផ្តួលក្រុម Red Star Belgrade ៣-១ កាលពីថ្ងៃពុធ ហើយក្រុម Liverpool នឹងត្រូវតែឈ្នះដោយការរកគ្រាប់បាល់នាំមុខ ២ គ្រាប់ដាច់ ឬ ១-០ នៅលើទឹកដីក្រុម របស់អ៊ីតាលី ក្នុងរយៈពេល ២ សប្តាហ៍ទៀត ដើម្បីឈានទៅវគ្គបន្ត។
ដោយឡែក ខ្សែបម្រើដ៏មានឥទ្ធិពល Christian Eriksen បាននិយាយថា ក្រុម Tottenham «ដឹងពីអ្វីដែលយើងត្រូវធ្វើ» ក្នុងបេសកកម្មដ៏លំបាកមួយក្នុងនៅលើទឹកដីក្រុម Barcelona ក្រោយពីរូបគេបានរក្សាក្តីសង្ឃឹមរបស់ក្រុមខ្លួនក្នុងក្របខ័ណ្ឌ Champions League តាមរយៈការរកគ្រាប់បាល់ឈ្នះនៅជិតបញ្ចប់ការប្រកួត ពេលជួបក្រុម Inter Milan កាលពីថ្ងៃពុធ។
ក្រុមរបស់លោក Mauricio Pochettino នៅសល់ត្រឹមតែរយៈពេល ១០ នាទីទៀតប៉ុណ្ណោះក្នុងការត្រូវកាត់ចេញត្រឹមវគ្គចែកពូល ខណៈពួកគេបានជួបការលំបាកក្នុងការបំបែកតំបន់ការពារដ៏រឹងមាំរបស់ក្រុម Inter នាកីឡដ្ឋាន Wembley។
ប៉ុន្តែ Eriksen ដែលត្រូវបានដាក់ឲ្យលេងជាកីឡាករបម្រុងដ៏គួរឲ្យភ្ញាក់ផ្អើលដោយលោក Pochettino បានចូលទៅសង្គ្រោះក្រុម Tottenham នៅពេលដែលរូបគេបានស៊ុតបាល់បំប៉ោងសំណាញ់ទី ក្រោយពីការបញ្ជូនបាល់ដ៏ល្អពី Dele Alli ដើម្បីធ្វើឲ្យការប្រជែងកៅអីក្នុងពូល B របស់ពួកគេឈានទៅការប្រកួតចុងក្រោយ។
គ្រាប់បាល់នេះមានន័យថា ពួកគេនឹងធ្វើដំណើរទៅកាន់ Camp Nou ដើម្បីជួបក្រុមកំពុងនាំមុខ Barca នាថ្ងៃទី ១១ ខែធ្នូ ដោយដឹងថា ជ័យជម្នះមួយទៀតនឹងធ្វើឲ្យពួកគេឈ្នះកៅអីទៅវគ្គ ១៦ ក្រុមចុងក្រោយ មិនថា ក្រុម Inter ជួបលទ្ធផលបែបណាពេលប្រកួតជាមួយនឹងក្រុម PSV នៅរាត្រីដដែលនោះឡើយ»៕
លទ្ធផលគូផ្សេងទៀត
Atl. Madrid 2-0 Monaco
Lokomotiv 2-0 Galatasaray
Dortmund 0-0 Brugge
Porto 3-1 Schalke
PSV 1-2 Barcelona