.jpg)
Kompany (center) គ្រប់គ្រងបាល់ក្នុងការប្រកួតថ្មីៗនេះ។ រូប AFP
ក្រុងមេនឆេស្ទ័រៈ លោក Pep Guardiola ជាគ្រូបង្វឹកក្លិប Man City បានអរគុណប្រធានក្រុមសញ្ជាតិបែលហ្ស៊ិក Vincent Kompany យ៉ាងខ្លាំងចំពោះគ្រាប់បាល់ដ៏មានតម្លៃរបស់គាត់ជួយឲ្យឈ្នះក្រុម Leicester City ១-០ កាលពីរាត្រីថ្ងៃចន្ទ និងបន្តឆ្ពោះទៅរកការលើកពាន Premier League រដូវកាលនេះ។
ជ័យជម្នះនេះបានធ្វើឲ្យក្រុមមេឃខៀវ Man City នាំមុខក្រុមហង្សក្រហម Liverpool ១ ពិន្ទុក្រោយពីខ្សែការពារ Kompany បានជួយឲ្យក្រុមមេឃខៀវបាន ៣ ពិន្ទុទៀតដោយស៊ុតបាល់ពីចម្ងាយចូលទីយ៉ាងល្អនៅនាទីទី ៧០។
ក្រុមរបស់លោក Guardiola នឹងក្លាយជាក្រុមទី ១ ក្នុងរយៈពេល ១ ទសវត្សរ៍នេះដែលបានរក្សាការលើកពាននៃក្របខ័ណ្ឌនេះប្រសិនបើយកឈ្នះទៅលើក្រុម Brighton នៅរាត្រីថ្ងៃអាទិត្យសប្ដាហ៍នេះបើទោះជាក្រុមហង្សក្រហមបានប្រកួតស្មើ ឬឈ្នះក្រុមចកខ្មៅ Wolves ក្នុងទឹកដីខ្លួនឯងនៅថ្ងៃដូចគ្នានោះក៏ដោយ។
កីឡាករ Kompany ដែលស៊ូទ្រាំនឹងសំណាងគួរឱ្យភ័យខ្លាចជាមួយនឹងការរងរបួសក្នុងរយៈពេលប៉ុន្មានឆ្នាំថ្មីៗនេះបានរន្ធត់ចិត្តដល់ស្រក់ទឹកភ្នែកក្រោយពីបានជួយនាំកិត្តិយសដល់ក្រុម Man City ក្នុងការប្រកួតក្នុងទឹកដីខ្លួនឯងចុងក្រោយនៃរដូវកាលនេះនៅកីឡដ្ឋាន Etihad ស្របពេលកុងត្រារបស់គាត់នឹងបញ្ចប់នៅចុងរដូវកាលនេះ។
លោក Guardiola បាននិយាយថា៖ «មានកីឡាករជាច្រើនដែលបានជួយយើងរហូតបានស្ថិតនៅទីតាំងបច្ចុប្បន្ននេះក្នុងនោះក៏មានកីឡាករ Kompany ផងដែរ»។
គ្រូបង្វឹករូបនេះបានបន្តថា៖ «គាត់បានដើរតួនាទីជាខ្សែការពារ និងជាប្រធានក្រុមម្នាក់គួរឲ្យស្រឡាញ់ខ្លាំងណាស់។ ខ្ញុំសប្បាយចិត្តចំពោះគាត់ ចំពោះក្លិប និងចំពោះអ្នករាល់គ្នា»។
លោក Guardiola បានសារភាពថាគាត់បានព្យាយាមប្រាប់កីឡាករ Kompany កុំឲ្យស៊ុតចំពេលគាត់បានស៊ុតបញ្ចូលទីពីចម្ងាយយ៉ាងល្អជាលើកដំបូងតាំងពីគាត់បានលេងនៅក្រុម Hamburg នៅឆ្នាំ ២០០៧។
Kompany បាននិយាយថា៖ «វាមិនសំខាន់ថា តើយើងរកបានប៉ុន្មានគ្រាប់នោះទេ ប៉ុន្តែអ្វីដែលសំខាន់នោះគឺយើងបានស៊ុតបញ្ចូលទីដោយជោគជ័យដូចជាថ្ងៃនេះ អ៊ីចឹងគឺវាសំខាន់ខ្លាំងណាស់»។
Kompany បានបន្តថា៖ «គ្រប់ជំហានក្នុងរយៈពេល ៤ ខែចុងក្រោយនេះគឺសំខាន់ណាស់ ខណៈក្រុម Liverpool ក៏រក្សាការបន្តបោះជំហានរបស់ខ្លួនផងដែរស្របពេលយើងនៅសល់ ១ ប្រកួតចុងក្រោយនៅក្នុងទឹកដីរបស់ក្រុម Brighton ដែលយើងមិនទាន់ដឹងពីលទ្ធផលនៅឡើយនោះទេ»។
ក្រុម Man City ឥឡូវបានឈ្នះការប្រកួតលីក ១៣ លើកជាប់ៗគ្នាចុងក្រោយធ្វើឲ្យក្រុមនេះបានស្ថិតនៅលើកំពូលតារាងនៃក្របខ័ណ្ឌ Premier League ហើយលោក Guardiola បានអះអាងថាគឺក្រុមរបស់គាត់ទេដែលត្រូវលេងក្រោមសម្ពាធទោះបីជាក្រុម Liverpool បានរង់ចាំលើកពាននេះរយៈពេល ២៩ ឆ្នាំមកហើយក៏ដោយ។
លោកបានបន្ថែមថា៖ «វាជារឿងអស្ចារ្យណាស់ចំពោះទម្រង់លេងក្នុងតង់ទី ២ គឺថាវាលំបាកណាស់ដូច្នេះវាមិនមែនក្រុម Liverpool ជាអ្នករងសម្ពាធទេគឺក្រុមរបស់យើងព្រោះយើងអាចបាត់បង់ឱកាសនេះ ខណៈវាស្ថិតក្នុងដៃរបស់យើងរួចទៅហើយនោះ»៕ SN
