.jpg)
លោក គីម ហ៊ាង (ឆ្វេង) បានទះដៃអបអរដល់ការលើកពានរបស់ក្រុម ISI Group United។ រូប សហការី
ភ្នំពេញៈ ស្ថាបនិកបង្កើតពានពាក់កណ្តាលអាជីព Keller Williams Cambodia League (KW Cambodia League) លោកបណ្ឌិត គីម ហ៊ាង បានប្រកាសពីការដំឡើងប្រាក់រង្វាន់នៃការប្រកួតពានមួយនេះរហូតដល់ ១ ម៉ឺនដុល្លារសម្រាប់រដូវកាលឆ្នាំ ២០២០ ប៉ុន្តែលោកបានកំណត់ថានឹងជ្រើសរើសយកតែក្រុមដែលមានគុណភាពល្អឲ្យចូលរួមប្រកួតប្រជែងប៉ុណ្ណោះ។
លោកបណ្ឌិត គីម ហ៊ាង បានថ្លែងថា៖ «សម្រាប់ការប្រកួតពាន KW Cambodia League ក្នុងរដូវកាលឆ្នាំ ២០២០ យើងនឹងបង្កើនប្រាក់រង្វាន់ពី ២៤ លានរៀលសម្រាប់ក្រុមជើងឯកនៅឆ្នាំ ២០១៩ នេះទៅជា ៤០ លានរៀល ឬ ១ ម៉ឺនដុល្លារសម្រាប់ឆ្នាំក្រោយ ប៉ុន្តែយើងមិនបង្កើនក្រុមចូលរួមនោះទេ ព្រោះយើងចង់ចម្រាញ់យកក្រុមចូលរួមដែលខ្លាំងៗ»។
ការលើកឡើងរបស់ស្ថាបនិករូបនេះត្រូវបានប្រកាសជាផ្លូវការនៅក្នុងពិធីបិទការប្រកួតពាន KW Cambodia League 2019 នៅលើទីលាន KMH កាលពីយប់ថ្ងៃអាទិត្យដោយការប្រកួតរដូវកាលទី ៨ នេះក្រុម ISI Group United ជាអ្នកលើកពានធំអមជាមួយប្រាក់រង្វាន់ ២៤ លានរៀល ព្រោះការប្រកួតវិលជុំទាំង ១៥ លើក ISI បានឈ្នះ ១៤ និងស្មើ ១ ប្រកួតមាន ៤៣ ពិន្ទុគឺលើសក្រុមម្ចាស់ជើងឯកឆ្នាំចាស់ Avatar FC ត្រឹម ១ ពិន្ទុ ព្រោះ Avatar បានឈ្នះ ១៤ និងចាញ់ចំនួន ១ ប្រកួត ខណៈ Khmer United A ឈរនៅលេខ ៣ Riel Phnom Penh ឈរនៅលេខ ៤ ហើយក្រុមម្ចាស់ជើងឯកឆ្នាំ ២០១៧ Bayon Wanderers ឈរនៅលេខ ៥។
ក្រុម Avatar បាននាំគ្នាស្រែកហ៊ោ បើទោះបីជាឆ្នាំនេះពួកគេបានឈ្នះត្រឹមពានតូចជំនួសពានធំ។ សហការី
លោក គីម ហ៊ាង បានបន្ថែមថា៖ «ក្រុមដែលបានឈរនៅតំបន់ Top5 យើងនឹងឲ្យពួកគេចូលរួមការប្រកួតនៅឆ្នាំក្រោយដោយស្វ័យប្រវត្តិ ប៉ុន្តែក្រុមផ្សេងទៀតដែលចង់ចូលរួម យើងអាចនឹងរៀបចំឲ្យមានការប្រកួតជម្រុះគ្នាសិន ហើយបើក្រុមណាមានសមត្ថភាពមិនដល់យើងមិនឲ្យចូលរួមទេ ព្រោះពានពាក់កណ្តាលអាជីពដែលនឹងកើនប្រាក់រង្វាន់ដល់ ១ ម៉ឺនដុល្លារទៅហើយនោះ គឺយើងត្រូវតែបង្កើនគុណភាពក្នុងការលេងឲ្យកាន់តែប្រសើរជាងឆ្នាំនេះ»។
ដោយឡែកការប្រកួតយកពានតូច KW Cambodia Cup 2019 វិញ ក្រុម Avatar FC បានទម្លាក់ក្រុម Khmer United A នៅវគ្គខ្វែងពាក់កណ្តាលផ្តាច់ព្រ័ត្រ និងបានវាយបកយកឈ្នះក្រុម Bayon Wanderers ៤-២ ក្នុងវគ្គផ្តាច់ព្រ័ត្រកាលពីថ្ងៃអាទិត្យដើម្បីលើកពានតូចនេះជំនួសការបាត់បង់ពានធំ អមជាមួយប្រាក់រង្វាន់ ១២ លានរៀល ឯក្រុមលេខ ២ Bayon បាន ៨ លានរៀល។
ចំណែកឯក្រុម Khmer United A ដែលជាម្ចាស់ពានតូចកាលពីឆ្នាំ ២០១៨ និងក្រុម Riel Phnom Penh ដែលធ្លាក់នៅវគ្គពាក់កណ្តាលផ្តាច់ព្រ័ត្រដូចគ្នា ត្រូវបានចាត់ឲ្យទទួលបានលេខ ៣ ស្ទួន និងបានប្រាក់រង្វាន់ ៦ លានរៀលដូចគ្នាហើយ Khmer United A ក៏ទទួលបានពាន Fair Play អមនឹងប្រាក់ ២ លានរៀលទៀតដែរ ខណៈខ្សែប្រយុទ្ធ Blessing របស់ក្រុម ISI Group United ក្លាយជាអ្នករកបានគ្រាប់បាល់ច្រើនជាងគេ ហើយ Dave Maguire របស់ក្រុម Riel PP ក្លាយជាអ្នកចាំទីល្អប្រចាំព្រឹត្តិការណ៍នេះដោយអ្នកទាំង ២ នេះបានប្រាក់រង្វាន់លើកទឹកចិត្ត ១ លានរៀលដូចគ្នា៕
