ក្រុងឡុងដ៍: Aymeric Laporte ប្រហែលជានៅតែកំពុងព្យាយាមដើម្បីទទួលបានការជឿជាក់ពីគ្រូបង្វឹកនៃក្រុមជម្រើសជាតិបារាំងលោក Didier Deschamps ប៉ុន្តែ ស្របពេលដែលក្រុម Manchester City នឹងធ្វើដំណើរទៅកាន់ទឹកដីកំណើតរបស់ Laporte ដើម្បីទៅជួបក្រុម Lyon នៅរាត្រីនេះ ការជឿជាក់របស់លោក Pep Guardiola ទៅលើខ្សែការពារកណ្តាលរូបនេះ ពិតជាគ្មានអ្វីប្រែប្រួលឡើយ។
ក្រោយពីបានផ្ទេរក្នុងតម្លៃខ្លួន ៥៧ លានផោន (ស្មើនឹង ៧៣ លានដុល្លារអាមេរិក) កាលពីខែមករា វាធ្លាប់មាននូវការសង្ស័យថា តើ Man City ត្រូវតែជះទឹកប្រាក់បន្ថែមទៀតសម្រាប់ខ្សែការពារកណ្តាលម្នាក់ ក្រោយពីបានបណ្តាក់ទុនច្រើនជាង ៨០ លានផោនទៅលើ John Stones និង Nicolas Otamendi និងការវិលត្រឡប់ពីរបួសរបស់ប្រធានក្រុម Vincent Kompany ឬយ៉ាងណា?
ក្រោយពីបានផ្ទេរមកពីក្លិប Athletic Bilbao ខ្សែការពារ Laporte បានចំណាយពេលដើម្បីសម្របខ្លួនក្នុងបរិយាកាសថ្មីរបស់គេ ខណៈរាល់ការប្រកួតទាំង ៣ លើកនៃក្របខ័ណ្ឌ Champions League របស់គេ កាលពីរដូវកាលមុន បានបញ្ចប់ដោយការបរាជ័យ។
ទោះបីជាយ៉ាងណា ក្រោយពីបានចំណាយពេលក្នុងរដូវក្តៅទាំងស្រុងរបស់គេក្រោមការដឹកនាំរបស់លោក Guardiola ក្នុងយុទ្ធនាការមុនបើករដូវកាល ខណៈដែលរូបគេបានអវត្តមានពីក្រុមដែលឈ្នះពាន World Cup របស់លោក Deschamps កីឡាករ Laporte បានក្លាយជាសមាជិកដ៏សំខាន់ក្នុងតំបន់ការពាររបស់ Man City ដែលបានរបូតគ្រាប់បាល់ត្រឹមតែ ៨ គ្រាប់គត់ក្នុងការប្រកួត ១៩ លើក។
ក្នុងក្រុមមួយប្រជុំដោយកីឡាករឆ្នើមៗ រួមជាមួយនឹងជម្រើសជាច្រើនសម្រាប់លោក Guardiola ខ្សែការពារវ័យ ២៤ ឆ្នាំរូបនេះ គឺជាកីឡាករតែម្នាក់ដែលបានលេងរាល់ការប្រកួតក្របខ័ណ្ឌ Champions League និង Premier League ទាំងអស់មកទល់ពេលនេះ៕
កម្មវិធីប្រកួតនៅរាត្រីនេះ
AEK Athens v Ajax-12:55 អាធ្រាត្រ
CSKA Moscow v Plzen-12:55 អាធ្រាត្រ
Roma v Real-3 ទៀបភ្លឺ
Bayern v Benfica
Hoffenheim v Shakhtar Donetsk-3 ទៀបភ្លឺ
Juventus v Valencia-3 ទៀបភ្លឺ
Lyon v Man City-3 ទៀបភ្លឺ
Man Utd v Young Boys-3 ទៀបភ្លឺ