ក្រុងលីវើភូល: បើយោងទៅតាមការចេញផ្សាយរបស់គេហទំព័រ The Guardian របស់អង់គ្លេស ក្លិប Liverpool បានបើកការពិភាក្សាផ្សេងៗជាមួយនឹងក្លិប Roma ជុំវិញការផ្ទេរដែលអាចទៅរួចមួយសម្រាប់អ្នកចាំទីអន្តរជាតិប្រេស៊ីល Alisson ជាមួយនឹងតម្លៃខ្លួនជាកំណត់ត្រាពិភពលោក ចំនួន ៧០ លានអឺរ៉ូ (ស្មើនឹង ៨១,៦ លានដុល្លារអាមេរិក) ក្នុងនោះរាប់បញ្ចូលទាំងប្រាក់ឧបត្ថម្ភចំនួន ១០ លានអឺរ៉ូ ដែលត្រូវបានស្នើឲ្យក្លិបរបស់ក្របខ័ណ្ឌ Seria A មួយនេះ ផងដែរ។
Roma កំពុងតែទាមទារប្រាក់បន្ថែមចំនួន ៥ លានអឺរ៉ូ ដើម្បីធ្វើឲ្យតម្លៃសរុបកើនដល់ ៧៥ លានអឺរ៉ូ សម្រាប់អ្នកចាំទី វ័យ ២៥ ឆ្នាំរូបនេះ ប៉ុន្តែ ក្លិបទាំង ២ ពោរពេញដោយការជឿជាក់ថា ការព្រមព្រៀងគ្នាមួយ អាចនឹងឈានដល់ក្នុងពេលឆាប់នេះ។
តម្លៃខ្លួនកប់ពពកនេះ បានបង្កើនឲ្យមានការជឿជាក់ក្នុងក្លិប Liverpool Alisson នឹងក្លាយជាអ្នកចាំទីជម្រើសទី ១ ថ្មីរបស់ពួកគេនៅរដូវកាលក្រោយ។
ក្លិប Chelsea ក៏នៅតែចាប់អារម្មណ៍ផងដែរទៅលើអ្នកចាំទីអន្តរជាតិប្រេស៊ីលរូបនេះ ប្រសិនបើ Thibaut Courtois ចាកចេញ។
ក្លិប Real Madrid គឺជាគោលដៅដែលអាចទៅរួចមួយទៀត ប៉ុន្តែ ពួកគេមិនទាន់ធ្វើការទាក់ទងក្លិប Roma នៅឡើយទេ។
ប្រសិនបើការផ្ទេរនេះ កើនឡើង វានឹងធ្វើឲ្យ Alisson ក្លាយជាអ្នកចាំទីមានតម្លៃខ្លួនខ្ពស់បំផុតក្នុងពិភពលោក ពោលគឺច្រើនជាងតម្លៃខ្លួន៥៣លានអឺរ៉ូ ដែលត្រូវបានចំណាយដោយក្លិប Juventus សម្រាប់អ្នកចាំទី Gianluigi Buffon កាលពីឆ្នាំ ២០០១ និងតម្លៃខ្លួន ៤០ លានអឺរ៉ូ ដែលក្លិប Manchester City បានចំណាយទិញ Ederson ពីក្លិប Benfica កាលពីរដូវកាលមុន៕ IS