ក្រុងប៉ារីស: លោក Jurgen Klopp អ្នកចាត់ការទូទៅរបស់ក្រុម Liverpool កំពុងតែរីករាយនឹងការព្យាយាមបញ្ឈប់ Neymar និង Kylian Mbappe ខណៈដែលតារាឆ្នើមរបស់ក្លិប Paris Saint-Germain ទាំង២រូបនេះ បានជម្នះលើបញ្ហារបួសរបស់ខ្លួនទាន់ពេលវេលាយ៉ាងល្អសម្រាប់ការប្រកួតកាត់សេចក្តីដ៏សំខាន់ក្នុងក្របខ័ណ្ឌ Champions League នៅរាត្រីនេះ។
កីឡាករមានតម្លៃខ្លួនថ្លៃជាងគេបំផុតក្នុងពិភពលោកទាំង២រូបនេះ បានធ្លាក់ចូលក្នុងការបារម្ភលើភាពរឹងមាំ សម្រាប់ការប្រកួតនេះ នាកីឡដ្ឋាន Parc des Princes ក្រោយពីរងរបួសរៀងៗៗខ្លួនក្នុងពេលបំពេញការពត្វកិច្ចអន្តរជាតិ កាលពីសប្តាហ៍មុន។
កីឡាករទាំង ២ ត្រឹមតែអាចទស្សនា ក្នុងពេលក្រុម PSG យកឈ្នះលើក្រុម Toulouse កាលពីចុងសប្តាហ៦មុននេះ ប៉ុន្តែ លោកគ្រូបង្វឹក Thomas Tuchel បានប្រកាសថា ពួកគេរឹងមាំគ្រប់គ្រាប់ក្នុងការជួបជាមួយនឹងក្រុមរបស់អង់គ្លេស។
ក្នុងសន្និសីទសារព័ត៌មានមុនការប្រកួត កាលពីថ្ងៃអង្គារ លោក Klopp បានឲ្យដឹងថា៖ «ខ្ញុំពិតជារីករាយណាស់ចំពោះពួកគេ ដែលពួកគេមិនរងរបួសធ្ងន់ធ្ងរ។ បញ្ហានោះអាចកើតឡើង ហើយយើងតែងតែរំពឹងទុកថា ពួកគេនឹងលេង»។
Neymar បានជួយឲ្យ Mbappe រកបានគ្រាប់បាល់១គ្រាប់ ក្នុងពេលក្រុម PSG ចាញ់ក្រុម Liverpool លើទឹកដី Anfield ក្នុងលទ្ធផល ៣-២ កាលពីខែកញ្ញា។
ហេតុនេះ ក្រុមរបស់លោក Klopp មានប្រៀបជាង មុននឹងឈានទៅកាន់ការប្រកួតនៅរដ្ឋធានីរបស់បារាំង ខណៈដែលពួកគេត្រូវតែទប់ស្កាត់ខ្សែប្រយុទ្ធដ៏ឆ្នើមទាំង២នាក់របស់ក្រុមម្ចាស់ផ្ទះ ម្តងទៀត។
ការប្រកួតនេះ នឹងចាប់ផ្តើមនៅម៉ោង ៣ ទៀបភ្លឺ៕ IS