ក្រុងដូហា៖ សហព័ន្ធកីឡាបាល់ទាត់ FIFA បាននិយាយពីថ្ងៃចន្ទថា ប្រទេស កាតា នឹងបើកសម្ពោធកីឡដ្ឋានទី ៣ ក្នុងចំណោម ៨ កីឡដ្ឋានដែលត្រៀមសម្រាប់ព្រឹត្តិការណ៍បាល់ទាត់ពិភពលោកនៅឆ្នាំ ២០២២ នៅថ្ងៃទី ១៨ ខែធ្នូ។
កីឡដ្ឋានដែលមាន ៤ ម៉ឺន កៅអីចម្ងាយ ៧ គីឡូម៉ែត្រពីទីក្រុងដូហា ប្រទេស កាតា នេះនឹងរៀបចំការប្រកួតជម្រុះ និងវគ្គផ្ដាច់ព្រ័ត្រនៃព្រឹត្តិការណ៍នេះ ដែលចាប់ផ្ដើមដំណើរការនៅថ្ងៃទី ១១ ខែធ្នូ។
ការសម្ពោធកីឡដ្ឋាននេះ នឹងមានការប្រកួតរវាងក្រុម Liverpool ជាម្ចាស់ជើងឯកអឺរ៉ុបដែលអាចប្រកួតជាមួយក្រុម Monterrey ជាម្ចាស់ជើងឯក CONCACAF Champions League ឬក្រុម Al Sadd ឬក៏ជាមួយក្រុម Hienghene Sport។
រហូតមកដល់ពេលនេះ ប្រទេស កាតា បានបើកសម្ពោធកីឡដ្ឋាន al-Janoub ដែលទើបសាងសង់ថ្មីនៅខែឧសភា ព្រមទាំងកីឡដ្ឋាន Khalifa International ដែលបានបើកដំណើរការក្នុងឆ្នាំ ១៩៧៦ និងត្រូវបានដាក់ឱ្យដំណើរការឡើងវិញកាលពីឆ្នាំ ២០១៧ បន្ទាប់ពីមានការកែលម្អពេញលេញរួចរាល់ហើយ។
សហព័ន្ធ FIFA និយាយនៅក្នុងសេចក្តីថ្លែងការណ៍មួយថា៖ «ជាមួយនឹងទីលានទាំង ៣ ដែលមានចម្ងាយអតិបរមា ១២ គីឡូម៉ែត្រពីទីក្រុងដូហានោះ ព្រឹត្តិការណ៍ FIFA Club World Cup 2019 នឹងផ្តល់នូវទស្សនីយភាពពីលក្ខណៈរបស់ប្រទេស កាតា នៅមុនពេលមានព្រឹត្តិការណ៍ FIFA World Cup ២០២២»។
សហព័ន្ធ FIFA បានបន្ថែមថា៖ «ព្រឹត្តិការណ៍ដ៏សំខាន់នេះ នឹងប្រព្រឹត្តទៅក្នុងពេលតែមួយនៃឆ្នាំនេះ និងជាមួយការប្រកួតដែលនឹងចាប់ផ្តើមនៅម៉ោង ១៧ ម៉ោង ក្នុងស្រុក (ម៉ោង ១៤:០០ GMT) ការប្រកួតនៅឆ្នាំនេះក៏នឹងផ្តល់បទពិសោធដល់ក្រុម និងអ្នកគាំទ្រពីរដូវរងាល្មមនៅកាតាផងដែរ»។
សីតុណ្ហភាពជាមធ្យមត្រូវបានគេរំពឹងថា នឹងមានចន្លោះពី ១៥ ទៅ ២៤ អង្សាសេ (ពី ៥៩ ទៅ ៧៥ ហ្វារិនហៃ)។
លោក Hassan al-Thawadi អគ្គលេខាធិការគណៈកម្មាធិការដឹកជញ្ជូន និងកេរដំណែលនៅប្រទេស កាតា បាននិយាយក្រោយពីការបើកដំណើរការកីឡដ្ឋានអាល់ហ្សានូប កាលពីខែឧសភា ថា កីឡដ្ឋានថ្មី ២ ទៀត នឹងរួចរាល់នៅចុងឆ្នាំនេះ (ឬ) នៅត្រីមាសទី ១ ឆ្នាំ ២០២០»។
លោក Hassan al-Thawadi បានបន្ថែមថា កាលបរិច្ឆេទពិតប្រាកដនឹងអាស្រ័យលើការកំណត់ពេលវេលានៃព្រឹត្តិការណ៍នេះ ដើម្បីចាប់ផ្តើមដំណើរការកីឡដ្ឋានទាំង ២ នេះ។
អគ្គលេខាធិការរូបនេះបានបន្ថែមទៀតថា៖ «កីឡដ្ឋានរបស់យើងទាំងអស់នឹងរួចរាល់ជាស្ថាបពរនៅត្រឹមឆ្នាំ ២០២១ ជាកំហិត»៕ AFP/SN